1 KORONIKA 15

₁Musi Dafita a tshi ḓifhaṱela dzinnḓu Muḓini wa Dafita, a lugisa na fhethu hune mbulungelo ya Mudzimu ya ḓo dzula hone, a i akhela dennde. ₂Ndi hone Dafita a tshi ri, “Mbulungelo ya Mudzimu i nga hwalwa nga Vhalivi fhedzi, e si muṅwe muthu, ngauri Muṋe washu o nanga vhone uri vha hwale mbulungelo yawe, vha mu shumele lini na lini.” ₃Dafita a kuvhanganya Vhaisraele vhoṱhe Jerusalema uri vha yo dzhia mbulungelo ya Mudzimu vha i ḓise fhethu he a i lugisela. ₄Dafita a vhidzisa vhoṱhe vha lutsinga lwa Aroni na Vhalivi vha kuvhangana. ₅Vhalivi vha mutupo wa Kehathi ha ḓa vha 120, murangaphanḓa wavho e Uriele. ₆Vha mutupo wa Mirari ha ḓa vha 220, murangaphanḓa wavho e Asaya. ₇Vha mutupo wa Gerisoni ha ḓa vha 130, murangaphanḓa e Juele. ₈Vha mutupo wa Elitsafani ha ḓa vha 200, murangaphanḓa e Shemaya. ₉Vha mutupo wa Hebroni ha ḓa vha 80, murangaphanḓa e Eliele. ₁₀Vha mutupo wa Uziele ha ḓa vha 112, murangaphanḓa e Aminadaba.

₁₁Ndi hone Dafita a tshi vhidza vhotshifhe Tsadoko na Abiathara, na Vhalivi, Uriele na Asaya na Juele na Shemaya na Eliele na Aminadaba. ₁₂Dafita a vhudza Vhalivi a ri, “Inwi ni ṱhoho dza miṱa ya Vhalivi, inwi na Vhalivi vha haṋu ḓikumedzeni Mudzimu, ni yo dzhia mbulungelo ya Muṋe washu Mudzimu wa Israele, ni ḓe nayo fhano, ni i vhee fhethu he nda i lugisela. ₁₃Mudzimu Muṋe washu o ri huvhadza nge lwa u thoma ya si hwalwe nga inwi Vhalivi. A ro ngo mu vhudzisa uri zwi itwa hani nga nḓila yo teaho.”

₁₄Ndi hone vhotshifhe na Vhalivi vha tshi ḓikumedza Mudzimu uri vha yo dzhia mbulungelo ya Muṋe washu Mudzimu wa Israele, vha vhuye nayo. ₁₅Vhalivi vha hwala mbulungelo ya Mudzimu nga thanda vho dzi vhea kha mahaḓa avho, nga he Mushe a laya zwi tshi tevhedza zwe Muṋe washu a amba.

₁₆Dafita a vhudza vharangaphanḓa vha Vhalivi uri vha khethe mashaka avho vha vhe vhaimbi vha imbe nyimbo dza u pembela hu tshi lidzwa zwilidzo zwa madende na dziharipa na tshele. ₁₇Ndi hone Vhalivi vha tshi khetha Hemani ṅwana wa Juele na shaka ḽawe Asafu ṅwana wa Berekhia, na Ethani ṅwana wa Kushaya wa mutupo wa Mirari. ₁₈Vha tikedzwa nga mashaka avho vhane vha vha tevhela nga vhuimo, vhone vhalindakhoro, Zakaria na Jaasiele na Shemiramotho na Jehiele na Uni na Eliaba na Benaya na Maaseya na Mathithia na Elifelehu na Mikineya na Obede Edomo na Jeiele. ₁₉Vhasiki vha nyimbo, Hemani na Asafu na Ethani, vho vha vha tshi lidza tshele dza musinaseṱha. ₂₀Zakaria na Asiele na Shemiramotho na Jehiele na Uni na Eliaba na Maaseya na Benaya vho vha vha tshi lidza madende a mubvumo musekene. ₂₁Mathithia na Elifelehu na Mikineya na Obede Edomo na Jeiele na Azasia vha tshi lidza madende a mubvumo mudenya.

₂₂Khenania ene Mulivi muhulwane o vha e ene wa u langa vhahwali vha mbulungelo, ngauri o vha e na nḓivho ya uyo mushumo. ₂₃Berekhia na Elikana vho vha vhe vhalindamuṋango wa hune mbulungelo ya vha hone. ₂₄Vhotshifhe Shebania na Josafati na Nathaniele na Amasai na Zakaria na Benaya na Eliesere vho vha vha tshi lidza phalaphala phanḓa ha mbulungelo ya Mudzimu, Obede Edomo na Ihia vha tshi i linda.

₂₅Ndi hone khosi Dafita na vhahulwane vha Israele na vhalangammbi vha vhanna vha tshigidi vha tshi ya nḓuni ya Obede Edomo u yo dzhia mbulungelo ya mulanga ya Muṋe washu, vha tshi khou pembela. ₂₆Ha ṱhavhiwa mboho ṱhanu na mbili na thutha ṱhanu na mbili dza ṋekedzwa dza vha tshiṱhavhelo nge Mudzimu a farisa Vhalivi vhe vha vha vho hwala mbulungelo ya mulanga ya Muṋe washu. ₂₇Dafita o vha o ambara phuraphura ya sila ḽa lukhaha lu songo vangiwaho, na Vhalivi vhoṱhe vhe vha vha vho hwala mbulungelo vho ambara nga u ralo, na vhaimbi na Kenania we a vha a tshi khou langa vhahwali. Dafita o vha o ita na u pakata na luvhemba lwa lukhaha. ₂₈Vhaisraele vhoṱhe vha dzhia mbulungelo ya Muṋe washu vha vhuya nayo vha tshi khou ṱavha mikosi ya dakalo, hu tshi khou lidzwa ṋanga dza thutha na phalaphala na tshele na madende na dziharipa.

₂₉Musi mbulungelo ya mulanga ya Muṋe washu i tshi khou dzhena Muḓini wa Dafita, Mikhala ṅwananyana wa Saulo a sedza nga fasiṱere, a vhona khosi Dafita a tshi khou tshina a tshi tou ḓiṱhakha, a mu nyadza mbiluni yawe.