1 KORONIKA 14

₁Zwino Hiramu khosi ya Tiro a ruma vhaḓinḓa ha Dafita, vha ṱuwa na matanda a mukedara na vhatsheṱi vha matombo na vhavhaḓi uri vha mu fhaṱele pfamo. ₂Dafita a zwi ḓivha uri Muṋe washu o mu vhumba khosi ya Israele na uri muvhuso wawe o u pfumbisa tshoṱhe a tshi itela vhathu vhawe Vhaisraele.

₃Henefho Jerusalema Dafita a dzea vhafumakadzi vhanzhi a beba vhana vhanzhi vha vhatuka na vhasidzana. ₄Vhana vhe Dafita a vha beba henefho Jerusalema ndi Shamua na Shobaba na Nathani na Solomoni ₅na Ibihara na Elishua na Eliphelete ₆na Noga na Nefege na Jafia ₇na Elishama na Bieliada na Elifelete.

₈Musi Vhafilista vha tshi zwi pfa uri Dafita o vhumbwa khosi ya ḽoṱhe ḽa Israele, vha ḓa na mmbi yavho yoṱhe u yo mu ṱoḓa, Dafita a zwi pfa, a bva a yo vha ṱanganedza. ₉Zwino Vhafilista vho vha vho imisa mmbi yavho Govhani ḽa Refaimi. ₁₀Dafita a vhudzisa Mudzimu a ri, “Ndi ṱuwe ndi yo lwa na Vhafilista? U ḓo nkumedza vhone nda vha kunda?” Muṋe washu a mu fhindula a ri, “Tshimbila u yo lwa navho, ndi ḓo u kumedza vhone wa vha kunda.”

₁₁Ndi hone Dafita na vhanna vhe a vha e navho vha tshi gonya vha ya Baali Pheratsimu, henefho a vha kunda. Dafita a ri, “Mudzimu o kumba maswina anga nga tshanḓa tshanga unga maḓi a muḓalo a tshi kumba.” Fhethu henefho ha mbo ḓi pfi Baali Pheratsimu (Muṋe wa Muḓalo). ₁₂Vhafilista vha shavha vha sia midzimu yavho ya zwitungulo henefho, Dafita a ri zwi fhiswe nga mulilo.

₁₃Vhafilista vha dovha vha ḓa vha imisa mmbi yavho govhani ḽeneḽo. ₁₄Dafita a dovha a vhudzisa Mudzimu, Mudzimu a mu fhindula a ri, “U songo tou gonya wo livhana navho, itou vha mona u vha die u tshi bva nga matungo u livhana na miri ya maswi. ₁₅Hezwi u tshi tou pfa mutsindo matavhini a miri ya maswi, u mbo ḓi vha wela ngauri ndi ḓo vha ndo u ranga phanḓa u yo kunda mmbi ya Vhafilista.” ₁₆Dafita a ita zwe Mudzimu a mu laya, vha kunda mmbi ya Vhafilista, vha vha vhilimedza u bva Gibioni u vhuya u swika Gezere.

₁₇Bvumo ḽa Dafita ḽa swika mashangoni oṱhe, Muṋe washu a ita uri tshakha dzoṱhe dzi mu ofhe.