TITO 3

₁O ba gakolole gore ba ikokobeletse mebuso e e laolang, ba e utlwe, ba etleetsegele tiro nngwe le nngwe e e molemo, ₂ba se kgale ope, ba se batle kgang, mme ba nne bopelontle, ba itshupe ka bonolo jotlhe mo bathong botlhe. ₃Gonne le rona re kile ra bo re le bosilo, re sa utlwe, re timetse, re direla dikeletso le dikgatlhego dingwe le dingwe, re phela ka bosula le ka lefufa, re ilega, re tlhoanye. ₄Mme e rile go bonala bopelontle jwa Modimo, Morepholosi, le go rata batho ga ona, ₅wa re pholosa, e seng ka ntlha ya ditiro tsa tshiamo tse rona re di dirileng, mme e le ka fa boutlwelong-botlhoko jwa ona ka tlhapo ya go tsalwa gape le ka ntšhwafatso ya Mowa o o Boitshepo ₆o o o goromeditseng mo go rona ka Jesu Keresete, Morepholosi, ₇gore e tle e re fa re sena go siamisiwa ka bopelotlhomogi jwa ona, re nne barua-boswa ba botshelo jo bo sa khutleng jo re bo solofelang. ₈Lefoko leo ke le le ikanyegang.

Mme ke rata gore dilo tseo o di bolele ka tlhomamo gore ba ba dumetseng mo Modimong ba tlhoafalele go dira ditiro tse di molemo. Dilo tseo di siame, e bile di thusa batho. ₉Mme o katoge dipotso tsa bosilo le dithulaganyo tsa maina a ditshika le dikgang le dikganetsanyo ka ga molao; gonne ga di thuse sepe, ke tsa boithamako fela. ₁₀Motho yo o simololang kereke ya maitirelo e re fa o sena go mo tlhagisa gangwe gongwe gabedi, a gana, o mo tlogele, ₁₁ka o itse gore yo o ntseng jalo o kgopo, o a leofa; o bile o ikatlhotse.

₁₂E re fa ke romela Aretema gongwe Tigiko koo go wena, o itlhaganele go tla go nna kwano Nikopodi; gonne ke ikaeletse go dika mariga teng. ₁₃Senase, moitse-molao, le Apolo o ba thuse ka tlhoafalo go ka etela pele, gore ba se ka ba tlhoka sepe. ₁₄A ba ga rona le bone ba ithute go nna tlhaga mo ditirong tse di molemo go thusa ka tse di batlegang gore ba se nne ba ba sa ungweng sepe.

₁₅Botlhe ba ke nang nabo ba a go dumedisa. Ntumedisetsa ba ba re ratang mo tumelong.

A bopelothomogi bo nne le lona lotlhe! Amen.