FILEMONE 1

₁Nna Paulo, mogolegwi wa ga Keresete Jesu, le Timotheo morwa-rre, re kwalela Filemone, moratiwa wa rona, modiri-ka-rona, ₂le Apia, kgaitsadia-rona, le Aregipo, motlhabani-ka-rona, le phuthego ya mo ntlong ya gago:

₃A bopelotlhomogi le kagiso tse di tswang mo go Modimo Rraetsho le mo go Morena Jesu Keresete di nne le lona!

₄Ke leboga Modimo wa me ka gale, fa ke go gopola mo merapelong ya me, ₅ka ke utlwa ka ga tumelo ya gago ya go dumela mo go Morena Jesu le ka ga lorato lwa gago lo o ratang baitshepi botlhe ka lone, ₆gore tumelo ya gago e re kopanyeng nao ka yona e itshupe ka kitso ya tse di molemo tsotlhe tse di mo go rona, e le go direla Keresete. ₇Gonne ke ne ka nna le boitumelo jo bogolo le kgomotso ka ntlha ya lorato lwa gago; ka gonne dipelo tsa baitshepi di tsitsibositswe ke wena, morwa-Rra.

₈Ka ntlha ya moo, le fa nka go laela se se tshwanetseng ka Keresete ka pelo e e phuthologileng, ₉bogolo ke go rapela ka ntlha ya lorato, ke le Paulo, monnamogolo, yo kajeno e bileng ke le mogolegwi wa ga Keresete Jesu; ₁₀ke go rapela ka ntlha ya ga Onesimo ngwanake yo ke mo tsetseng ke le mo dikgoleng, ₁₁yo e rileng pele a bo a se molemo ope mo go wena, mme kajeno o molemo mo go wena le mo go nna.

₁₂Ke mmusetsa koo go wena; mo tshole ene yo e leng pelo ya me. ₁₃Ke ne ke rata go mo thibela gore a nne le nna, a ntirele mo boemong jwa gago, ke le mo dikgoleng ka ntlha ya Efangele. ₁₄Mme ke ne ke sa rate go dira sepe kwa ntle ga tetlelelo ya gago, gore molemo wa gago o se dirafale jaaka e kete ke ka pateletso, mme e nne ka pelotshweu.

₁₅Gonne motlhamongwe o ne a kgaogantswe le wena ka sebakanyana, e le gore o tle o nne nae ka bosakhutleng, ₁₆e sa tlhole e le motlhanka, mme e le yo o gaisang motlhanka, e le mokaulengwe yo o rategang; ke wa me tota, mme bogolo ke wa gago ka fa nameng le mo Moreneng.

₁₇Fa jaanong nna o nkaya molekane wa gago, mo tshole jaaka o ka tshola nna. ₁₈Mme fa a go senyeditse sengwe, gongwe a le molato nao, o se batle mo go nna. ₁₉Ke le Paulo, ke kwadile ka letsogo la me ka re: Nka lefa, ka tloga ka go bontsha gore wena ka wesi o molato mo go nna ka bojotlhe jwa gago. ₂₀Ee, ngwana wa ga rra, a nke ke bone thuso ya gago mo Moreneng: Lapolosa pelo ya me mo go Keresete.

₂₁Ke go kwaletse ka go ikanya kutlo ya gago, ke bile ke itse gore o tla dira le go fetisa se ke se buang.

₂₂Le gona o ke o mpaakanyetse bonno koo; gonne ke solofela gore ke tla lo neelwa gape ka merapelo ya lona.

₂₃Epafera mogolegwi-ka-nna mo go Keresete Jesu o a go dumedisa, ₂₄le Mareko le Aristarego le Demase le Luka, badiri-ka-nna.

₂₅A bopelotlhomogi jwa Morena wa rona Jesu Keresete bo nne le mewa ya lona! Amen.