GENESI 9

₁Jaanong Modimo wa tshegofatsa Noa le bomorwawe, wa ba raya wa re: “Atang lo ntsifale lo tlale ka lefatshe! ₂A diphedi tsotlhe tsa lefatshe le dinonyane tsotlhe tsa legodimo di lo boife, di lo tshabe; di neetswe mo diatleng tsa lona mmogo le tsotlhe tse di gagabang fa fatshe le ditlhapi tsotlhe tsa lewatle. ₃Tsotlhe tse di phelang e tla nna dijo tsa lona; ke di lo file tsotlhe fela jaaka ditlhogi tse ditala. ₄Fela lo se ka lwa ja nama e e nang le bophelo jwa yona, e bong madi a yona. ₅Mme madi a lona a e leng maphelo a lona ke tla a busolosetsa; ke tla a busolosetsa mo sebateng sengwe le sengwe le mo seatleng sa motho. Ke tla busolosetsa bophelo jwa motho mo seatleng sa motho-ka-ene. ₆Yo o tshololang madi a motho, le ene madi a gagwe a tla tshololwa ke batho; gonne Modimo o dirile motho ka fa setshwanong sa ona.

₇“Mme lona, atang lo ntsifale; farafarang mo lefatsheng, lo tlale mo go lone!”

₈Modimo wa raya Noa le bomorwawe wa re: ₉“Bonang, ke tlhomamisa kgolagano ya me le lona le losika lwa lona morago ga lona; ₁₀ke e tlhomamisetsa le dilo tsotlhe tse di phelang tse di nang le lona; e bong dinonyane le diruiwa le diphologolo tsotlhe tsa lefatshe tse di nang le lona; le tsotlhe tse di duleng mo mokorong, e leng diphedi tsotlhe tsa lefatshe. ₁₁Ke tlhomamisa kgolagano ya me le lona ka re: Ga go kitla go tlhola go nyelediwa nama epe ka metsi a morwalela; morwalela wa metsi ga o kitla o tlhola o nna teng gape go senya lefatshe.” ₁₂Modimo wa ba wa re: “Sesupo sa kgolagano e e sa khutleng e ke e dirang fa gare ga me le lona le dilo tsotlhe tse di phelang tse di nang le lona ke se: ₁₃Motshewabadimo wa me ke o beile mo marung gore e nne sesupo sa kgolagano fa gare ga me le lefatshe. ₁₄Jaanong e tla ne e re fa ke kgobokanya maru kwa godimo ga lefatshe, motshewabadimo o bonale mo marung. ₁₅Foo ke tla gopola kgolagano ya me e e leng teng fa gare ga me le lona le diphedi tsotlhe. Metsi ga a kitla a tlhola a nna morwalela o o senyang nama yotlhe. ₁₆Jaanong e tla ne e re fa motshewabadimo o le mo marung, ke o lebe go ikgakolola kgolagano e e sa khutleng e e fa gare ga Modimo le mewa yotlhe e e phelang mo nameng yotlhe e e mo lefatsheng.” ₁₇Modimo wa raya Noa wa re: “Ke sona sesupo sa kgolagano e ke e tlhomamisitseng fa gare ga me le nama yotlhe e e mo lefatsheng.”

₁₈Bomorwa Noa ba ba duleng mo mokorong ke Seme le Hame le Jafethe; mme Hame ke rraagwe Kanana. ₁₉Ba bararo ba ke bona bomorwa Noa; batho botlhe ba ba mo lefatsheng ba tswa mo go bone.

₂₀Jaanong Noa a simolola go nna molemi wa masimo; a dira tshimo ya moweine. ₂₁Mme ya re a sena go nwa weine, a tlhapelwa, a robala mo tenteng ya gagwe a sa ikatega. ₂₂Ke fa Hame rraagwe Kanana a bona bosaikatega jwa ga rraagwe, a ya a bolelela bomorwa-rraagwe ba babedi ka fa ntle. ₂₃Mme Seme le Jafethe ba tsaya kobo, ba e baya mo magetleng a bone babedi, ba kata ka sa morago, ba bipa bosaikatega jwa ga rraabo, ba ntse ba fapositse difatlhego tsa bone gore ba se bone bosaikatega jwa ga rraabo. ₂₄Mme ya re Noa a sena go tlhaphogelwa, a thanya, a utlwela se morwawe yo mmotlana a se mo diretseng, ₂₅a bua a re:

₂₆A ba a re:

₂₈Noa o phedile dinyaga di le 350 morago ga morwalela wa metsi. ₂₉Malatsi otlhe a ga Noa ya nna dinyaga di le 950; ke fa a swa.