GENESI 10

₁Losika lwa bomorwa Noa Seme le Hame le Jafethe ke lo. Ba ne ba tsalelwa bomorwa morago ga morwalela wa metsi.

₂Bomorwa Jafethe ke Gomere le Magogo le Matai le Jafane le Thubale le Mesege le Thirase. ₃Bomorwa Gomere ke Asekenase le Rifathe le Thogarama. ₄Bomorwa Jafane ke Elisa le Tharesise le Bakhithime le Badotane. ₅Ditšhaba tse di anameng tsa dinaga tse di fa lewatleng di tswa mo go bao. Ke bone bomorwa Jafethe le mafatshe a bone le dipuo tsa bone le ditso tsa bone le ditšhaba tsa bone.

₆Mme bomorwa Hame ke Khuše le Miseraime le Phute le Kanana. ₇Bomorwa Khuše ke Seba le Hawila le Sabetha le Raema le Sabetheka; bomorwa Raema ke Šeba le Detane. ₈Khuše a tsala Nimerote; ke ene mogale wa ntlha mo lefatsheng. ₉E ne e le motsomi yo mogolo fa pele ga Morena; ke ka moo go a tleng go twe: “Mokete ke motsomi yo mogolo fa pele ga Morena jaaka Nimerote.” ₁₀O simolotse go busa kwa Babele le Erege le Akate le Kalene mo nageng ya Sineare. ₁₁A ba a tswa mo lefatsheng leo, a ya kwa Asiria, a aga Ninife le Rehobothe-Ire le Kalaga ₁₂le Resene, fa gare ga Ninife le Kalaga; ke ona motse o mogolo.

₁₃Miseraime a tsala Baludi le Baanami le Balehabi le Banafethugi ₁₄le Baphatharusi le Bakhaselugi le Bakhafethori ba Bafelesita ba duleng mo go bone.

₁₅Kanana a tsala Sitone, morwawe wa ntlha, le Hethe ₁₆le Bajebusi le Baamori le Bagiregasi ₁₇le Bahewi le Baareki le Basini ₁₈le Baarwadi le Basemari le Bahamathe. Morago ga moo ditso tsa Bakanana tsa phatlalala. ₁₉Naga ya Bakanana e ne e simologa kwa Sitone go ya go fitlha kwa Gerara le go ya kwa Gasa le go ya kwa Sotoma le Gomora le Atema le Seboime go fitlha kwa Leša. ₂₀Ke bone bomorwa Hame ka fa ditsong tsa bone le dipuong tsa bone mo mafatsheng a bone le mo ditšhabeng tsa bone.

₂₁Mme Seme, rraa-Bahebere botlhe, mogoloa Jafethe, le ene a tsalelwa bana. ₂₂Bomorwa Seme ke Elame le Asure le Arephagasadi le Lute le Arame. ₂₃Bomorwa Arame ke Use le Hule le Gethere le Maše. ₂₄Mme Arephagasadi a tsala Sela; Sela a tsala Hebere. ₂₅Hebere a tsalelwa bomorwa ba le babedi; leina la wa ntlha ke Phelege – gonne batho ba lefatshe ba ne ba kgaogana mo metlheng ya gagwe – leina la monnawe ke Jokotane. ₂₆Jokotane a tsala Alemotate le Selefe le Hasaremawethe le Jera ₂₇le Hatorame le Usale le Dikela ₂₈le Obale le Abimaele le Šeba ₂₉le Ofire le Hawila la Jobabe. Botlhe bao ke bomorwa Jokotane. ₃₀Ba ne ba agile go simolola kwa Meša go ya go fitlha kwa Sefare le kwa dithabeng tsa botlhabatsatsi. ₃₁Ke bone bomorwa Seme ka fa ditsong tsa bone le ka fa dipuong tsa bone mo mafatsheng a bone ka fa ditšhabeng tsa bone.

₃₂Ke tsona ditso tsa bomorwa Noa ka fa ditshikeng tsa bone mo ditšhabeng tsa bone. Ditšhaba tse di mo lefatsheng di dule mo go bone, tsa anama mo lefatsheng morago ga morwalela.