2 BAKORINTHE 9

₁Kana tota ga go batlege gore ke lo kwalele ka ga tirelo ya go thusa baitshepi. ₂Gonne ke itse ketleetsego ya lona e ke e lo bokelang mo go ba Maketonia gore Agaya o sa le a ipaakanya ngogola, mme tlhoafalo ya lona e tlhotlheleditse ba bantsi. ₃Mme ke romile bakaulengwe gore go lo boka ga rona go se nyelele ntlheng ya tiro eo, mme lona lo nne ba ba ipaakantseng jaaka ke buile; ₄e se re gongwe fa ba Maketonia ba tla le nna, mme ba fitlhela lo ise lo ipaakanye, rona – tota nka bo ke re: Lona – ra tlhajwa ke ditlhong ntlheng ya go lo ikanya jalo. ₅Ke ka moo ke fitlhetseng go batlega gore ke kgothatse bakaulengwe ba gore ba re etelele pele go tla koo go lona, ba baakanye neo ya tshegofatso ya lona go sa le kwa pele, e e begilweng pele, gore e nne e e baakantsweng jaaka neo ya tshegofatso, e seng jaaka ya bohula.

₆Mme akanyang tse: Yo o jwalang go le gonnye le gona o tla roba go le gonnye; mme yo o jwalang go le gontsi le gona o tla kotula go le gontsi. ₇A mongwe le mongwe a abe ka fa a ikaeletseng ka teng mo pelong, e seng ka bohutsana gongwe ka go patelediwa; gonne Modimo o rata yo o nayang ka boitumelo. ₈Mme Modimo o nonofile go lo atisetsa neo nngwe le nngwe ya bopelotlhomogi, gore lo nne le tsotlhe tse di lekanyeng ntlheng tsotlhe ka gale, le letlotlo la go ka dira tiro nngwe le nngwe e e molemo; ₉jaaka go kwadilwe ga twe:

₁₀Mme yo o nayang mojwadi peo le senkgwe sa go jewa, le lona o tla lo naya peo ya lona, a e atisa, a ba a godisa maungo a tshiamo ya lona, ₁₁gore lo hume dilo tsotlhe go ka dira tiro nngwe le nngwe ya lorato e e direlang Modimo tebogo ka rona. ₁₂Gonne tirelo ya go thusa jalo ga e tlatse go tlhoka ga baitshepi fela, mme e bile e atile ka malebogo a mantsi mo Modimong; ₁₃gonne boikanyego jwa lona jo bo itshupang ka tirelo eo bo dira gore ba galaletse Modimo ka ntlha ya maipolelo a lona a go utlwa Efangele ya ga Keresete le ka ntlha ya nnete ya go kopana nabo le botlhe. ₁₄Mme le bone ba tla lo rapelela, ka ba lo tlhologeletswe ka ntlha ya bopelotlhomogi jwa Modimo jo bogolo mo go fetisang mo go lona. ₁₅Mme Modimo a o lebogelwe neo ya ona e e fetang go ka bolelwa!