2 BAKORINTHE 10

₁Mme nna Paulo ka nosi ke lo rapela ka bopelonolo le bopelonomi jwa ga Keresete, yo e a reng fa ke le koo go lona, ke be ke le boikokobetso, mme fa ke se yo, ke be ke le pelokgale mo go lona. ₂Ke kopa gore e re fa ke le teng koo, ke se ka ka tshwanela go ema senna ka bopelokgale jo ke ikaeletseng go beta pelo ka jona go tlhasela bangwe ba ba reng, re tshela ka fa nameng. ₃Gonne le fa re sepela mo nameng, ga re tlhabane ka fa nameng; ₄kana dibolai tsa tlhabano ya rona ga se tsa nama, mme di nonofile ka Modimo go ka diga dikago tsa phemelo; ₅re senya maano le kago nngwe le nngwe e e godimo ya phemelo e e tsogelang kitso ya go itse Modimo, re be re golega kakanyo nngwe le nngwe gore e utlwe Keresete; ₆e bile re ntse re iketleeditse go betsa bosautlweng bongwe le bongwe, fa kutlo ya lona e sena go tladiwa.

₇Lebang tse di fa pele ga matlho! Fa motho a ikaya a le wa ga Keresete, a a akanye gape gore le rona re ba ga Keresete jaaka ene. ₈Gonne le fa nka ipoka go feta moo ka ntlha ya thata ya rona e Morena o e re neileng go lo aga, e seng go lo rutla, ga nka ke ka tlhajwa ke ditlhong. ₉Mme ga ke ipoke gore ke se nne jaaka e kete ke lo tshosa ka dikwalo. ₁₀Gonne ba re: “Dikwalo tsona di bokete, di thata, mme fa a le teng ka boene, o bokoa, e bile puo ya gagwe e a nyatsega.” ₁₁A yo o reng jalo a akanye gore se re leng sona ka lefoko mo dikwalong, fa re se yo, re ntse re le sona le ka tiro, fa re le teng.

₁₂Gonne ga re ne re leka go ikopanya le bone gongwe go itshwantshanya le bone ba ba ipokang; kana ba selekanyo sa bone e leng bone ka bosi, ba ba tshwantshang le bone ka bosi, ga ba na tlhaloganyo. ₁₃Mme rona ga re nke re ipoka go feta selekanyo, mme e tla nna ka fa selekanyong sa karolo ya tiro e Modimo o re abetseng selekanyo sa yona go fitlha le koo go lona. ₁₄Gonne ga re ikotlolole ka go fetisa jaaka e kete ga re ise re fitlhe koo go lona; kana re fitlhile le koo go lona, ra ba raka ka thero ya Efangele ya ga Keresete. ₁₅Ga re ipoke go feta selekanyo ka tiro ya ba bangwe, mme e le ka go nna le tsholofelo ya gore, fa tumelo ya lona e gola, re godisiwe mo go lona ka fa karolong ya tiro ya rona mo go fetisang, ₁₆gore Efangele e be e rerwe ke rona mo mafelong a a kwa pele ga lona, re sa ipoke ka tiro e e setseng e dirilwe mo mafelong a a laoletsweng o sele.

₁₇“Yo o ipokang a a ipoke mo Moreneng!” ₁₈Gonne moikanyegi ga se yo o ipokang, mme ke yo o bokwang ke Morena.