1 BAKORINTHE 6

₁Fa mongwe wa lona a na le kgang le yo mongwe, a ka beta pelo jang go e seka fa pele ga baheitane, mme e se fa pele ga baitshepi? ₂A kampo ga lo itse gore baitshepi ba tla atlhola lefatshe? Mme fa lefatshe le tla atlholwa ke lona, a ga lo a tshwanela go atlhola dilo tse dipotlana bogolo tsa tsheko? ₃A ga lo itse gore re tla atlhola baengele? Bogolo jang dilo tsa bophelo jono! ₄Jaanong ke eng? E a re fa lo seka dilo tsa botshelo jono, lo di batlele bone ba ba sa kaiweng sepe mo phuthegong gore ba di atlhole. ₅Ke bua jalo go lo tlhabisa ditlhong. A ruri ga go na ope yo o botlhale mo go lona, le fa e le a le mongwe fela, yo o ka atlholang fa gare ga modumedi le mongwe-ka-ene? ₆Mme mo go lona modumedi o a tle a seke le mongwe-ka-ene, e bile e le fa pele ga ba ba sa dumeleng!

₇Kana e setse e le molato tota, fa lo sekisanya. Ga lo ineeleleng bogolo go siamololelwa? Ga lo itshokeleleng bogolo go thukhuthiwa? ₈Mme jaanong ke lona ba lo siamololelang ba bangwe, lo a ba thukhutha, e bile e le badumedi-ka-lona! ₉A kampo ga lo itse gore basiamolodi ga ba kitla ba rua puso ya Modimo? Se tsietsegeng; le fa e le diaka gongwe badiredi-medimo gongwe batlhadi gongwe banna ba ba akafalang le banna ₁₀gongwe magodu gongwe ba ba bohula gongwe matagwa gongwe bakgadi gongwe dinokwane, ga go ope wa bone yo o tla ruang puso ya Modimo. ₁₁Bangwe ba lona ba ne ba ntse jalo; mme jaanong lo tlhapisitswe, lo itshepisitswe, lo siamisitswe ka leina la Morena Jesu Keresete le ka Mowa wa Modimo wa rona.

₁₂Ke letleletswe tsotlhe, mme ga di thuse tsotlhe; ke letleletswe tsotlhe, mme ga ke leseletse sepe sa tsona go ntaola. ₁₃Dijo ke tsa mpa, mpa ke ya dijo; mme Modimo o tla di nyeletsa ka bobedi jwa tsona. Mmele ona ga se wa boaka, mme ke wa Morena, mme Morena ke wa mmele. ₁₄Kana Morena ke yo Modimo o mo tsositseng; le rona o tla re tsosa ka thata ya ona.

₁₅A ga lo itse gore mebele ya lona ke ditokololo tsa ga Keresete? A jaanong nka tsaya ditokololo tsa ga Keresete, ka di dira ditokololo tsa seaka? Le go ka! ₁₆A kampo ga lo itse gore yo o ngaparetseng seaka, o mmele o le mongwe fela naso? Gonne go a twe: “Ba babedi bao ba tla nna nama e le nngwe fela.” ₁₇Mme yo o kgomaretseng Morena ene o mowa o le mongwe fela nae. ₁₈Tshabang boaka! Maleo otlhe a motho o a dirang a kwa ntle ga mmele; mme yo o akafalang o leofela mmele wa gagwe. ₁₉A kampo ga lo itse gore mebele ya lona ke Tempele ya Mowa o o Boitshepo o o mo teng ga lona, o lo o amogetseng mo Modimong, e bile ga lo ba lona? ₂₀Lo rekilwe ka tlhwatlhwa e kgolo; galaletsang he Modimo ka mebele ya lona e e leng ya Modimo!