1 BAKORINTHE 5

₁Go utlwetse tota gore mo go lona go na le boaka, mme e le boaka jwa mokgwa o le mo baheitaneng o seng teng, wa gore mongwe o na le mosadi wa ga rraagwe. ₂Mme lona lo sa ntse lo budulogile; bogolo lo ka bo lo utlwa botlhoko gore yo o dirileng tiro e e ntseng jalo a tlosiwe mo go lona! ₃Fa e le nna yo ke seng teng koo ka mmele, mme ka mowa ke le teng, ke setse ke atlhotse yo o dirileng jalo, fela jaaka e kete ke ne ke le teng, ₄ka re: E re re sena go kgobokana ka leina la Morena Jesu, lona le mowa wa me, re na le thata ya ga Jesu, Morena wa rona, ₅yo o ntseng jalo a neelwe Satane gore nama ya gagwe e senyege, mme mowa ona o tle o phologe ka letsatsi la Morena.

₆Maipoko a lona ga a mantle. A ga lo itse gore matlhabego a mannye a bedisa modubo otlhe? ₇Tlosang he matlhabego a bogologolo gore lo nne modubo o mošwa, jaaka lo le ba ba sa bedisiwang; gonne le rona, kwana ya Tlolaganyo re e tlhabetswe, e bong Keresete. ₈Ka moo, a re direng moletlo ka go sa bedisiwang ga bophepa le boammaaruri, e seng ka matlhabego a bogologolo, le fa e le matlhabego a bosula le bolotsana.

₉Ke lo kwaletse mo lokwalong gore lo se tlhakane le baakafadi; ₁₀ke sa ree gotlhe le baakafadi ba lefatshe leno gongwe ba ba pelotshetlha gongwe dinokwane gongwe badiredi-medimo; gonne foo lo ka bo lo na le go tlogela lefatshe. ₁₁Mme tota ke lo kwaletse gore lo se tlhakane le ope yo o bidiwang modumedi, etswe e le moakafadi gongwe yo o pelotshetlha gongwe modiredi-medimo gongwe mokgadi gongwe letagwa gongwe senokwane; ke raya gore yo o ntseng jalo le go ja lo se ka lwa ja nae.

₁₂Kana nka sekisetsang ba ba kwa ntle? Ke eng lo sa sekise ba ba mo teng? ₁₃Ba ba kwa ntle Modimo o tla ba atlhola. “Tlosang mosulafatsi yoo mo go lona!”