2 Emakhosi 6

₁Ngalelinye lilanga kwesuka licembu lebaphrofethi laya ku-Elisha, labengumholi walo, lafike latsi: “Buka lapha, lendzawo lesihlala kuyo lapha embikwakho, seyincane kakhulu. ₂Sivumele sihambe siye emfuleni iJordane siyewugawula khona tingodvo, kuze sitakhele indlu yekuhlala.”

Elisha watsi: “Hambani.”

₃Lomunye wabo wamncenga watsi: “Sicela mane uhambe netinceku takho.”

Elisha watsi: “Kulungile, ngitawuhamba nani.” ₄Nembala Elisha wahamba nabo.

Bahamba baya eJordane, befike bagawula tingodvo. ₅Lomunye wabo watsi asagawula sihlahla, lizembe lakhe lanyomuka emphinini walo lagcumkela ekhatsi emantini. Wakhala kakhulu watsi: “Awu! Nkhosi yami, lizembe lebantfu, bengilebolekile!”

₆Elisha wabuta watsi: “Liwelephi?” Watsi kube amkhombise lapho liwele khona, Elisha wagawula lutsi walujika lapho beliwele khona, lizembe lakhuphuka, lantanta. ₇Elisha watsi: “Litsatse,” nembala lomuntfu welula sandla walenyula.

₈Bekunekulwa emkhatsini wenkhosi yemaSiriya nesive saka-Israyeli. Lenkhosi yaseSiriya yahlangana netindvuna tayo, yatikhetsela indzawo lapho itawukamba khona.

₉Elisha wase utfumela livi enkhosini yema-Israyeli, watsi: “Caphela ungendluli ngakuleyo ndzawo, ngobe emaSiriya asehlela khona.” ₁₀Ngako inkhosi yema-Israyeli yayibohle iyawuhlola leyo ndzawo. Njalo nje Elisha abehle ayeluleka inkhosi kutsi ihlale icaphele imphi kuleto tindzawo.

₁₁Loko kwayitfukutselisa kakhulu inkhosi yemaSiriya, yabutsa tindvuna tayo yabuta yatsi: “Ase ningitjele kahle kutsi ngubani lona lolapha emkhatsini wetfu loyimpimpi yenkhosi yema-Israyeli?”

₁₂Lenye yaletindvuna tayo yaphendvula, yatsi: “Kute namunye lapha kitsi, nkhosi yami, nkhosi, kute loyimpimpi. Kodvwa ngu-Elisha, umphrofethi waka-Israyeli, lotjela inkhosi yema-Israyeli onkhe emagama lowakhuluma usendlini yakho yekulala.”

₁₃Inkhosi yemaSiriya yatsi: “Hambani nimfune lapho akhona, kuze ngitfumele emadvodza ambambe.” Imphendvulo yabuya; inkhosi yabikelwa kwatsiwa: “Elisha useDothani.” ₁₄Ngako yase ikhipha umhlambi wemahhashi, netincola temphi, nemadvodza lanemandla, aphuma ebusuku ayawukaka lelo dolobha laseDothani.

₁₅Inceku yemuntfu waNkulunkulu Elisha yatsi iyavuka ekuseni, iphumela ngephandle, yakhangwa ngulenkhulu imphi yemahhashi netincola leyase itungelete lonkhe lidolobha. Yaphutfuma ku-Elisha kuyawuhlaba umkhosi, yatsi: “Awu! nkhosi yami! Sitakwenta njani?”

₁₆Elisha waphendvula, watsi: “Ungesabi. Laba labangakitsi banyenti kakhulu kunalaba labangakubo.”

₁₇Elisha wathandaza, watsi: “Awu, Simakadze, vula emehlo akhe kuze abone.” Nembala, Simakadze wavula emehlo alenceku ya-Elisha, yatsi iyabuka, yabona tindimbane temabutfo, nemahhashi, netincola temphi tivutsa umlilo ticancele intsaba, kutungeleta Elisha.

₁₈Titsa tatsi tehlela kubo, Elisha wathandaza kuSimakadze, watsi: “Shaya labantfu ngebumphumphutse.” Simakadze wavele wabashaya ngebumphumphutse njengekucela kwa-Elisha.

₁₉Elisha wase uyabedukisa watsi: “Akusiyo indlela lena, nalelidolobha akusilo leli lenilifunako. Ngilandzeleni nginimikise kulomuntfu lenimfunako.” Wase uyabahola, wabangenisa eSamariya.

₂₀Batsi nase bangekhatsi edolobheni laseSamariya, Elisha watsi: “Simakadze vula emehlo alamadvodza kuze abone.” Nembala, Simakadze wavula emehlo abo; batsi bayabuka, batikhandza bangekhatsi eSamariya.

₂₁Inkhosi yema-Israyeli yatsi nayikubona loko, yabuta Elisha yatsi: “Babe, ngibabulale yini? Ngibabulale?”

₂₂Elisha wayiphendvula, watsi: “Ungababulali. Ungababulala yini bantfu lobatfumbe ngenkemba yakho nangebutjoki bakho? Baphe kudla nemanti, kuze badle besutse banatse, bese babuyela enkhosini yabo.” ₂₃Ngako inkhosi yabalungiselela lelikhulu lidzili, yabapha, batsi nasebadle bacedza, banatsa, wase uyabakhulula, babuyela enkhosini yabo eSiriya. Kusukela ngalelo langa emaSiriya agcina atsi mfo, kuhlasela live lema-Israyeli.

₂₄Kwatsi emvakwesikhatsi Bheni Hadadi, inkhosi yemaSiriya, wahola yonkhe imphi yakhe wayawuvimbetela iSamariya. ₂₅Kwaba nendlala lenkhulu kabi eSamariya ngenca yaloko kuvinjetelwa kwayo. Inhloko yembongolo yase ibita tinhlavu tesiliva letingema-80, bese kutsi umbhidvo lowawungagcwala sandla wona ubite tinhlavu tesiliva letisihlanu.

₂₆Inkhosi yaka-Israyeli yatsi yendlula ngendlela lesetulu elubondzeni, yeva umfati ayimemeta atsi: “Ngelekelele, nkhosi yami, nkhosi!”

₂₇Inkhosi yaphendvula, yatsi: “Nangabe Simakadze angakwelekeleli, mine ngingalutsatsaphi lusito lwekwelekelela wena? Ebaleni lekubhulela kolo? Esigayweni sekuhluta emagelebisi?” ₂₈Yase iyabuta, yatsi: “Kwente njani?”

Lomfati wayiphendvula, watsi: “Ngunangu umfati, utsite kimi itolo: ‘Buyisa indvodzana yakho sidle yona lamuhla, khona kusasa sitewudla lena yami.’ ₂₉Ngako sayipheka indvodzana yami, sayidla. Ngakusasa nase ngitsi kuye: ‘Letsa phela indvodzana yakho siyidle,’ wabe asayifihlile.”

₃₀Inkhosi yatsi nayiva lamavi alomfati, yaklebhula timphahla tayo, njengobe yayihambahamba lapha etulu elubondzeni, bantfu batsi bayayibuka, bakhandza kutsi ivunule emasaka ngaphansi kwetimphahla tayo. ₃₁Yamemeta yatsi: “Nkulunkulu wami, ngibulale ngife, nangabe lamuhla lingashona inhloko ya-Elisha, umsa waShafati, isengetulu kwemahlombe akhe!”

₃₂Ngaleso sikhatsi Elisha abehleti endlini kakhe akanye nebaholi lababemvakashele. Inkhosi yase ikhipha sigijimi kutsi silandze Elisha. Kodvwa satsi sisengakefiki, Elisha wakhuluma kulabaholi, watsi: “Aniboni-ke kutsi lelijabhane selisitfumele sigijimi salo kutsi sitengijuba inhloko? Bukani la; nasifika lesigijimi lapha, nibovala sivalo, nisicindzetele ningasivuleli. Inkhosi itabe isilandzela etincatseni.”

₃₃Watsi aselibele kulayetela ngaloko, sabe sitseleka sigijimi. Inkhosi yatsi: “NguSimakadze lona losehlisele lenhlupheko lengaka. Ngingabe ngisamlindzelelani kutsi asisite?”