Kuphiliswa kwaNamani labenebulephelo
1Namani abeyindvuna yelibutfo lenkhosi yaseSiriya. Abengumuntfu lomkhulu kabi enkhosini yakhe, futsi ahlonishwa kakhulu, ngobe ngaye Simakadze wanika iSiriya kuncoba. Abelichawe lelinesibindzi, kodvwa abenebulephelo.
2Kulenye yetimphi tawo emaSiriya ahlasela ema-Israyeli atfumba nentfombatana yaka-Israyeli, leyafike yaba sidzandzane semkaNamani. 3Lentfombatana yakhuluma kumkaNamani, yatsi: “Kube mane inkhosi yami ingake ibonane nemphrofethi loseSamariya, beyingaphiliswa kulobulephelo bayo.”
4Namani wahamba waya enkhosini yakhe, wafike wayitjela loko lekwakushiwo ngulentfombatana leyayiphuma ka-Israyeli. 5Inkhosi yaseSiriya yaphendvula, yatsi: “Kulungile, hamba. Mine ngitawutfumela incwadzi lena enkhosini yaka-Israyeli.”
Ngako Namani wahamba; abephetse isiliva leyayingemakhilogremu labengaba ngema-340, negolide leyayingemakhilogremu labengaba ngema-70, kanye netimphahla tekwembatsa tekuntjintja letilishumi. 6Lencwadzi leyayibhalelwe inkhosi yaka-Israyeli yayifundzeka kanje: “Ngalencwadzi ngetfula nanso inceku yami Namani, kutsi umphilise kulobulephelo bakhe.”
7Yatsi kube inkhosi yaka-Israyeli iyifundze lencwadzi, yaklebhula tingubo tayo, yatsi: “Mine nginguNkulunkulu yini? Nginawo yini emandla ekubulala nekuphilisa? Lomuntfu uyitfumeleleni lapha kimi lenceku yakhe kutsi ngitekuyiphilisa kulobulephelo bayo? Niyabona-ke kutsi ufuna kususa imphi alwe nami!”
8Watsi kube Elisha, umuntfu waNkulunkulu, eve kutsi inkhosi iklebhule tingubo tayo, watfumela umlayeto watsi: “Utiklebhuleleni tingubo takho? Letsa lowo muntfu lapha kimi, futsi yena utawukwati kutsi kukhona umphrofethi ka-Israyeli!”
9Ngako-ke Namani wahamba ngemahhashi kanye nangetincola takhe, wafike wema emnyango wendlu yaka-Elisha. 10Elisha watfumela sitfunywa kuye watsi: “Hamba, ufike ugeze kasikhombisa emfuleni iJordane, umtimba wakho utawuphila ube musha, uhlambuluke.”
11Kodvwa Namani wancandzeka atfukutsele abila, watsi: “Bengicabanga kutsi utawuphuma ete kimi, afike eme, bese umemeta libito laSimakadze Nkulunkulu wakhe, ajikitise nesandla sakhe etikwaletilondza, angiphilise kulobulephelo bami. 12Bo-Abana naboPhaphari akusiyo yini imifula yaseDamaseko lencono kunayo yonkhe imifula yaka-Israyeli? Bengingeke yini ngigeze kuyo, bese ngiyahlambuluka?” Ngako wancandzeka atfukutsele abila.
13Tinceku taNamani taya kuye, tafike tatsi: “Babe, kube lomphrofethi abetsite yenta intfo lelukhuni, bewungeke uyente yini leyontfo? Kakhulu kanganani-ke njengobe akutjele watsi: ‘Geza utewuhlambuluka.’ ” 14Ngako wavele wahamba wafike waticwilisa kasikhombisa emfuleni iJordane, njengobe umuntfu waNkulunkulu abeshito kuye, umtimba wakhe wahlambuluka wabuyela waba musha, waba njengewemfanyana losemncane.
15Namani kanye netinceku takhe tonkhe wahamba wabuyela kulomuntfu waNkulunkulu. Wafike wema embikwakhe watsi: “Manje sengiyati kutsi emhlabeni wonkhe kute nkulunkulu lofanana naNkulunkulu wema-Israyeli. Ngicela kutsi wemukele nasi sipho lesiphuma kimi, inceku yakho.”
16Elisha, umphrofethi, waphendvula watsi: “Ngifunga kuphila kwaSimakadze lengimkhontako, ngitsi, ngingeke ngisemukele lesipho.” Kwala nome Namani asamncenga, kodvwa wagcina alile.
17Namani watsi: “Nangabe awusemukeli lesipho, ngicela kutsi ngimane ngetfwale imitfwalo yenhlabatsi lengetfwalwa ngiminyuzi lemibili, ngihambe nayo ngiye ekhaya, ngobe inceku yakho ingeke inikele ngemihlatjelo nome ngukumuphi nkulunkulu ngaphandle kwaSimakadze. 18Shangatsi Simakadze angayitsetselela inceku yakho kuloku: Inkhosi yami nayingena ethempelini laRimoni kuyawukhotsama yeyame emkhonweni wami, nami ngikhotsame lapho, nangikhotsama ethempelini laRimoni, shangatsi Simakadze angayitsetselela inceku yakho ngaloko.”
19Elisha wakhuluma watsi: “Hamba kahle.”
Watsi Namani nasahambe libanga lelidze, 20Gehazi, inceku ya-Elisha, umuntfu waNkulunkulu, wacabanga watsi: “Inkhosi yami ihambise Namani, umSiriya, ngaphandle kwekumkhokhisa lutfo; ngabe ukwemukele loku abemnika kona. Ngifunga kuphila kwaSimakadze, mine ngitamlandzela, khona ngitawufike ngitsatse intfo letsite.”
21Ngako Gehazi wavele wagijima walandzela Namani. Watsi Namani nambona eta kuye agijima, wehla encoleni wamhlangabeta, wambuta, watsi: “Kungabe kukhona yini lesekonakele?”
22Gehazi waphendvula, watsi: “Cha, kute lokonakele, konkhe kuhamba kahle; intfo nje, inkhosi yami ingitfume kuwe kutsi ngibofike ngitsi: ‘Emajaha lamabili labephuma kulabanye baphrofethi efike lapha kulaka-Efrayimu. Ngicela kutsi ubanike tinhlavu tesiliva letingemakhilogremu langaba ngema-34 netimphahla letinhle letimbili tekuntjintja.’ ”
23Namani wakhuluma watsi: “Ngicela sale sewutsatsa isiliva lengemakhilogremu langaba ngema-68.” Wabelesela Gehazi ngaloko kutsi akwemukele, wabe sewuyambophela etikhwameni letimbili kanye netimphahla letimbili tekuntjintja. Wakunika tinceku takhe letimbili, tametfwalela, tihamba embikwaGehazi. 24Watsi kube Gehazi efike egcumeni, wabe sewuyatitsatsa letintfo kuletinceku, watifaka endlini; wancandzekisa letinceku, tahamba. 25Yena wase uyahamba, wangena, wema embikwenkhosi yakhe Elisha.
Elisha wambuta, watsi: “Uphumaphi, Gehazi?”
Gehazi wamphendvula, watsi: “Inceku yakho beyingakayi ndzawo.”
26Kodvwa Elisha wakhuluma kuye, watsi: “Umoya wami bewungekho edvute nawe yini ngesikhatsi lendvodza yehla encoleni yayo itekuhlangabeta? Lesikhatsi lesi ngiso yini sikhatsi sekwemukela timali, netimphahla, nemasimi emncumo, netivini, nemihlambi yetimbuti, neyetimvu, neyetinkhomo, netinceku, netincekukati? 27Bulephelo baNamani sebutawunamatsela kuwe kanye nasetitukulwaneni takho siphelane.”
Watsi Gehazi nakaphuma, esuka embikwa-Elisha, wabe asanebulephelo asamhlophe njengangcocwane.
