Psalms 73

God is waarlik vir Israel goed,

vir hulle wat rein harte het.

₂Maar ek, my voete het amper gegly

my treë was amper wankelrig.

₃Want ek het verwaande mense beny;

ek het die voorspoed

van goddeloses gesien.

₄Hulle het immers tot hulle dood

geen sorge nie;

en hulle liggame is vet.

₅Aan die sorge van sterflinge

het hulle nie deel nie,

en hulle word nie geteister

saam met gewone mense nie.

₆Daarom versier hoogmoed

hulle nekke,

bedek 'n kleed van geweld hulle.

₇Van vet peul hulle oë uit,

die versinsels van hulle hart

oorskry alle perke.

₈Smalend onderhandel hulle

met bose bedoelings;

uit die hoogte dreig hulle

met afpersing.

₉Hulle rek hulle monde teen die hemel,

en laat hulle tonge gaan oor die aarde.

₁₀Daarom draai sy volk hierheen.

Wie vol is,

word deur hulle uitgepers,

₁₁en hulle sê:

“Hoe sal God dit weet?

Is daar dan kennis by die Allerhoogste?”

₁₂Kyk, dit is hoe goddeloses is:

Immer sorgeloos vermeerder hulle

hulle rykdom.

₁₃Ja, tevergeefs het ek my hart

rein gehou

en my hande in onskuld gewas.

₁₄Ek is die hele dag geteister;

my kastyding was elke oggend

opnuut daar.

₁₅As ek sou dink,

ek wil soos hulle praat,

kyk, dan sou ek ontrou wees

aan die nageslag van u kinders.

₁₆Ek het toe probeer om dit te verstaan,

maar het dit as vermoeiend beskou,

₁₇totdat ek in die heiligdom

van God ingegaan het.

Ek het insig gekry in hulle uiteinde.

₁₈Waarlik, U laat hulle

op gladde plekke beland,

U bring hulle tot 'n val

oor hulle geknoei.

₁₉Hoe word hulle in 'n oogwink

'n skrikbeeld,

hoe kom hulle volledig tot 'n einde

deur verskrikking!

₂₀Asof dit 'n droom is

waaruit mens wakker word,

verag U hulle beeld, my Heer,

wanneer U ontwaak.

₂₁Toe my hart verbitterd was

en my niere gepyn het,

₂₂was ek dom en sonder begrip;

ek was 'n dier teenoor U.

₂₃En tog was ek altyd by U;

U het my regterhand vasgehou.

₂₄Deur die raad wat U gee, lei U my,

en daarna neem U my eervol weg.

₂₅Wie is daar vir my in die hemel?

As ek by U is,

begeer ek niks op aarde nie.

₂₆My liggaam en my hart

kan maar wegkwyn,

God is die rots van my hart

en my erfdeel vir altyd.

₂₇Want kyk, dié wat ver

van U af is, gaan ten gronde;

U vernietig dié wat aan U ontrou is.

₂₈Maar wat my betref,

die nabyheid van God is vir my goed.

Ek het my Heer, die Here,

my skuilplek gemaak,

sodat ek van al u werk kan vertel.