Psalms 55

₂O God, luister na my gebed,

verberg U nie vir my smeekbede nie.

₃Luister tog aandagtig na my

en antwoord my.

Klaend dwaal ek rond;

ek is verward

₄oor die geraas van vyande,

oor die getier van goddeloses,

want hulle laat onreg op my neerstort,

en in toorn is hulle vyandig teenoor my.

₅My hart krimp ineen in my binneste,

doodsangs het my oorval.

₆Vrees en bewing oorweldig my,

'n rilling trek deur my liggaam.

₇Ek het gedink,

het ek maar vlerke gehad soos 'n duif!

Ek sou wegvlieg en 'n tuiste vind;

₈ja, ek sou ver weggaan om te ontvlug;

ek sou in die woestyn oornag. •Sela

₉Ek sou haastig vir my 'n skuilplek soek,

weg van die rukwind,

van die hewige storm.

₁₀My Heer, verwar,

verdeel hulle tonge,

want in die stad sien ek net

geweld en stryd.

₁₁Dag en nag doen dit die rondte

op die stadsmure,

en binne die stad

is daar onreg en geweld.

₁₂Vernietiging is binne-in die stad,

verdrukking en bedrog wyk nie

van die stadsplein nie.

₁₃Dit is immers nie 'n vyand

wat my uittart nie –

ek sou dit nog kon verduur;

dit is nie my hater wat selfvoldaan

is teenoor my nie;

ek sou my vir hom kon versteek.

₁₄Maar dat dit jy is, 'n mens soos ek,

my boesemvriend en vertroueling –

₁₅ons wat vertroulike gesprekke

saam geniet het

terwyl ons in die huis van God loop

in die gedrang van mense!

₁₆Mag die dood hulle

onverhoeds betrap,

mag hulle lewendig afdaal

na die •doderyk;

want boosheid is by hulle tuis,

dit is in hulle midde.

₁₇Ek, ek roep tot God,

en die Here sal my verlos.

₁₈In die aand, in die oggend

en in die middag

het ek gekla en gesteun;

maar Hy het my stem gehoor.

₁₉Met vrede koop Hy my lewe vry

van 'n geveg wat teen my gerig is,

al is hulle in hulle hordes teen my.

₂₀God hoor en sal hulle verneder

– Hy regeer immers van die voortyd af, – Sela

hulle by wie daar geen

verandering is nie,

en wat nie ontsag het vir God nie.

₂₁Teen sy vriende het hy

sy hand uitgesteek;

hy het sy verbond geskend.

₂₂Sy mond is gladder as botter,

maar sy hart is die ene oorlog.

Sy woorde is strelender as olie,

maar dit is ontblote swaarde.

₂₃Werp jou las op die Here;

Hy sal jou versorg,

Hy sal nooit toelaat

dat die regverdige wankel nie.

₂₄U, o God, laat hulle afdaal

in die put van die graf.

Die manne van bloed en bedrog

haal nie eers die helfte

van hulle jare nie.

Maar ek, ek vertrou op U.