Psalms 34

₂Ek wil die Here die hele tyd prys,

my mond is voortdurend vol van sy lof.

₃In die Here sal ek roem;

verdruktes sal dit hoor

en hulle verheug.

₄Maak saam met my

die Naam van die Here groot,

ja, laat ons saam sy Naam verheerlik.

₅Ek het die Here geraadpleeg,

en Hy het my geantwoord;

van al my verskrikkinge

het Hy my gered.

₆Verdruktes kyk op na Hom

en hulle straal;

hulle gesigte hoef nie rooi

van skaamte te wees nie.

₇Hierdie magtelose het geroep

en die Here het gehoor,

en uit al sy benoudhede

het Hy hom verlos.

₈Die •Engel van die Here

trek 'n laer rondom hulle

wat vir die Here ontsag het

en Hy red hulle.

₉Beproef dit en ervaar:

Die Here is goed,

gelukkig is die mens

wat by Hom skuil.

₁₀Julle moet ontsag hê vir die Here,

julle wat aan Hom toegewy is;

want wie vir Hom ontsag het,

ly geen gebrek nie.

₁₁Jong leeus kry swaar en ly honger,

maar wie die Here soek,

ly geen gebrek aan alles wat goed is nie.

₁₂Kom, kinders, luister na my,

ontsag vir die Here sal ek julle leer.

₁₃Wie is die mens wat lewe begeer,

graag jare wil hê

om die goeie te ervaar?

₁₄Weerhou jou tong van kwaad

en jou lippe daarvan

om bedrieglik te praat.

₁₅Vermy die kwaad, en doen die goeie;

soek vrede, en jaag dit na.

₁₆Die oë van die Here

is op die regverdiges,

sy ore op hulle hulpgeroep.

₁₇Die gesig van die Here

is gerig teen kwaaddoeners

om hulle gedagtenis uit te roei

van die aarde af.

₁₈Regverdiges roep om hulp

en die Here luister,

uit al hulle benoudhede red Hy hulle.

₁₉Die Here is na aan hulle

wat gebroke harte het;

wie se gees verpletter is, verlos Hy.

₂₀'n Regverdige ervaar baie teenspoed,

maar uit dit alles red die Here hom.

₂₁Hy beskerm al sy bene;

nie een van hulle word gebreek nie.

₂₂Boosheid veroorsaak

'n goddelose se dood

en hulle wat 'n regverdige haat,

sal daarvoor boet;

₂₃die Here red die lewens

van sy diensknegte

en niemand wat by Hom skuil,

sal boet nie.