Psalms 101

Oor troue liefde en oor regspraak

wil ek sing;

U, Here, wil ek besing.

₂Ek wil my toespits

op 'n onberispelike lewenswyse.

Wanneer sal ek dit bereik?

Ek sal met 'n opregte hart leef

in my huis.

₃Ek sal nie iets boos voor my oë

verdra nie.

In die pleeg van wandade

het ek 'n weersin;

dit mag nie aan my kleef nie.

₄'n Vals hart moet van my wegbly;

van boosheid wil ek niks weet nie.

₅Wie sy medemens in die geheim

belaster,

hom sal ek vernietig.

Hovaardige oë en 'n hoogmoedige hart,

dit kan ek nie verdra nie.

₆Ek is op die uitkyk

vir betroubares in die land,

sodat hulle by my kan bly;

wie 'n onberispelike lewenswyse

handhaaf, hulle mag my dien.

₇Daar sal niemand in my huis

woon wat bedrog pleeg nie.

Wie leuens vertel,

sal nie voor my oë standhou nie.

₈Elke môre sal ek al die goddeloses

in die land vernietig,

om so almal wat onreg pleeg,

uit die stad van die Here uit te roei.