Nahum 1

₂Die Here is 'n besitlike God,

en Hy wreek Hom.

Die Here neem wraak met woede.

Die Here wreek Hom

op sy teenstanders,

Hy is toornig teenoor sy vyande.

₃Die Here is geduldig,

maar geweldig sterk.

Die Here laat beslis

niks ongestraf nie.

Deur donderstorm en orkaan

loop sy pad,

wolke is die stof van sy voete.

₄Hy berispe die see

en laat dit opdroog;

al die riviere laat Hy wegdroog.

Basan en Karmel verdor,

die bloeisels van Libanon verwelk.

₅Die berge bewe voor Hom,

die heuwels stort ineen.

Die aarde lê verwoes voor Hom,

ja, die wêreld met al sy bewoners.

₆Wie kan staande bly

voor sy verontwaardiging,

wie kan sy brandende toorn

weerstaan?

Wanneer sy woede uitbars soos vuur,

spat rotse voor Hom uiteen.

₇Die Here is goed,

'n toevlugsoord in tye

van bedreiging.

Hy sorg vir wie by Hom skuil,

₈maar met 'n vloedgolf

vernietig Hy die stad

geheel en al,

sy vyande agtervolg Hy

tot in die duisternis.

₉Wat kan julle teen die Here

beplan?

Hy rig 'n totale vernietiging aan!

Bedreiging sal nie 'n tweede keer

toeslaan nie.

₁₀Selfs al word hulle saamgevleg

tot 'n doringskerm,

en omring deur rankplante,

hulle sal verteer word soos stoppels

wat heeltemal droog is.

₁₁Uit jou het hy weggetrek,

hy wat onheil beraam

teen die Here,

wat boosheid beplan.

₁₂So sê die Here:

“Al was hulle ook in volle sterkte,

so baie as wat hulle was,

soveel is afgemaai

en het verdwyn.”

“Ek het jou verneder,

maar Ek sal jou nie weer

verneder nie.

₁₃Daarom gaan Ek sy juk breek

wat op jou rus,

jou stroppe gaan Ek aan stukke ruk.”

₁₄Maar die Here beslis oor jou,

koning:

“Jou naam sal nie meer voortleef nie.

In die huis van jou gode

sal Ek die gesnede beelde

en gegote beelde vernietig.

Ek berei jou graf voor,

want jy is onbenullig.”

₁₅Kyk! Op die berge is die voete

van die een wat 'n goeie

boodskap bring,

wat 'n vredesboodskap

laat hoor:

“Vier maar jou feeste, Juda!

Betaal jou geloftes,

want die booswigte

sal nooit weer deur jou trek nie;

hulle is almal uitgeroei.”