Job 26

₂“Hoe het jy nie die kragtelose

te hulp gekom nie,

die arm van die een

wat nie krag oor het nie, gehelp!

₃Hoe het jy nie raad gegee

aan die onwyse,

en vindingrykheid in oormaat

geopenbaar nie!

₄Met wie se hulp het jy

die woorde meegedeel,

en wie se asem het uit jou

na vore gekom?

₅“Die skimme krimp ineen –

dié wat onder die water is,

en dié wat daarin woon.

₆Die •doderyk staan naak voor Hom;

daar is geen bedekking

vir die onderwêreld nie –

₇voor Hom wat die noorde

oopspan oor die niet,

wat die aarde ophang aan niks;

₈wat die waters in sy wolke

saambind,

sonder dat die wolkmassa

daarvan oopskeur;

₉Hy wat die aansig van die troon versper

deur sy wolkmassa daaroor

uit te sprei.

₁₀Hy het sirkelvormig

'n grens getrek oor

die oppervlakte van die water

tot waar lig by donker eindig.

₁₁Die pilare van die hemel wankel

en staan verslae deur sy dreiging.

₁₂Deur sy krag het Hy die see

laat bedaar,

deur sy insig het Hy Rahab verbrysel.

₁₃Deur sy asem maak Hy

die hemel helder;

sy hand deurboor die vinnige slang.

₁₄Kyk, dit is maar net die buitelyne

van sy weë.

Wat ons van Hom hoor,

is maar 'n gefluisterde woord.

Sy donderende krag –

wie begryp dit?”