Levitikus 4

₁Die Here het vir Moses gesê: ₂“Sê vir die Israeliete, ‘Iemand sondig dalk onopsetlik teen een van al die Here se gebooie en doen iets wat nie gedoen mag word nie. ₃As die gesalfde priester sondig, sodat die volk skuldig is, moet hy vir die sonde wat hy gedoen het, 'n jong bul sonder gebrek vir die Here as •reinigingsoffer bring. ₄Hy moet die bul na die ingang van die •Tent van Ontmoeting voor die Here bring, sy hand op die kop van die bul lê en dit voor die Here keelaf sny. ₅Dan moet die gesalfde priester van die bul se bloed neem en dit in die Tent van Ontmoeting invat. ₆Die priester moet sy vinger in die bloed doop en van die bloed sewe maal voor die Here sprinkel aan die voorkant van die voorhangsel van die heiligdom. ₇Die priester moet ook van die bloed smeer aan die horings van die altaar vir die geurige reukwerk wat in die Tent van Ontmoeting voor die Here staan. Die res van die bul se bloed moet hy uitgooi teen die basis van die brandofferaltaar wat by die ingang van die Tent van Ontmoeting staan. ₈Die een wat die offer bring, moet ál die vet uit die bul vir die reinigingsoffer uithaal: die vet wat die binnegoed bedek en al die vet aan die binnegoed, ₉sowel as die twee niere met die vet daaraan wat teen die kruis lê. Die lewerlob moet hy saam met die niere verwyder, ₁₀soos wat dit uit die bul vir die •maaltydoffer uitgehaal word. Daarna moet die priester dit alles op die brandofferaltaar verbrand. ₁₁Maar die vel van die bul en al sy vleis, asook sy kop, pote, binnegoed en pensmis, ₁₂ja, die hele bul moet hy uit die kamp uitvat na 'n rein plek, na die stortplek van die vetterige as en dit op 'n houtvuur verbrand. By die stortplek van die vetterige as moet dit verbrand word.

₁₃“ ‘As die hele volksvergadering van Israel onopsetlik iets verkeerds doen en die geloofsgemeenskap merk nie eers op dat hulle gedoen het wat een van die gebooie van die Here sê nié gedoen mag word nie, is hulle skuldig. ₁₄As die oortreding wat hulle begaan het, bekend word, moet die geloofsgemeenskap 'n jong bul as reinigingsoffer bring. Hulle moet hom tot voor die Tent van Ontmoeting neem. ₁₅Die oudstes van die volksvergadering moet voor die Here hulle hande op die kop van die bul lê. Hulle moet die bul voor die Here keelaf sny ₁₆en die gesalfde priester moet van die bul se bloed na die Tent van Ontmoeting neem. ₁₇Die priester moet sy vinger in die bloed doop en van die bloed sewe maal voor die Here sprinkel aan die voorkant van die voorhangsel. ₁₈Hy moet ook van die bloed smeer aan die horings van die altaar wat in die Tent van Ontmoeting voor die Here staan. Die res van die bul se bloed moet hy uitgooi teen die basis van die brandofferaltaar wat by die ingang van die Tent van Ontmoeting staan. ₁₉Al die vet moet hy uit die bul uithaal en dit op die altaar verbrand. ₂₀Hy moet met die bul maak soos hy met die bul van die reinigingsoffer gemaak het. So sal die priester oor hulle versoening doen en sal hulle vergewe word. ₂₁Hy moet die bul uit die kamp neem en dit verbrand soos hy die eerste bul verbrand het. Dit is die geloofsgemeenskap se reinigingsoffer.

₂₂“ ‘Wanneer 'n leier gesondig het en onopsetlik gedoen het wat een van die gebooie van die Here sy God sê nié gedoen mag word nie, is hy skuldig. ₂₃As die sonde wat hy gedoen het, aan hom bekend gemaak word, moet hy as sy offer 'n bokram sonder gebrek bring. ₂₄Hy moet sy hand op die kop van die bok lê en dit keelaf sny op die plek waar die •brandoffer voor die Here keelaf gesny word. Dit is 'n reinigingsoffer. ₂₅Die priester moet van die bloed van die reinigingsoffer neem en dit met sy vinger aan die horings van die brandofferaltaar smeer en die res van die bloed teen die basis van die brandofferaltaar uitgooi. ₂₆Al die vet moet hy, soos die vet van die maaltydoffer, op die altaar verbrand. So sal die priester vir die leier versoening doen vir sy sonde en sal hy vergewe word.

₂₇“ ‘As iemand uit die volk van die land onopsetlik sondig deur te doen wat een van die gebooie van die Here sê nié gedoen mag word nie, is hy skuldig. ₂₈As die sonde wat hy gedoen het aan hom bekend gemaak word, moet hy 'n bokooi sonder gebrek bring as offer vir die sonde wat hy gedoen het. ₂₉Hy moet sy hand op die kop van die reinigingsoffer lê en dit op dieselfde plek as die brandoffer keelaf sny. ₃₀Die priester moet van die bloed neem en dit met sy vinger aan die horings van die brandofferaltaar smeer en die res van die bloed teen die basis van die altaar uitgooi. ₃₁Al die vet moet hy verwyder, soos hy die vet van die maaltydoffer verwyder. Die priester moet dit op die altaar verbrand as 'n geurige offer vir die Here. So sal die priester vir die persoon versoening doen en sal hy vergewe word.

₃₂“ ‘As hy 'n skaap as sy reinigingsoffer bring, moet dit 'n ooi sonder gebrek wees wat hy bring. ₃₃Hy moet sy hand op die reinigingsoffer se kop lê en dit as 'n reinigingsoffer keelaf sny op die plek waar die brandoffer keelaf gesny word. ₃₄Die priester moet van die bloed van die reinigingsoffer neem en dit met sy vinger aan die horings van die brandofferaltaar smeer en al die oorblywende bloed teen die basis van die altaar uitgooi. ₃₅Al die vet moet hy verwyder, soos hy die vet van die skaap vir die maaltydoffer verwyder het. Die priester moet dit op die altaar verbrand saam met die ander offergawes vir die Here. So sal die priester vir die persoon versoening doen vir die sonde wat hy gedoen het en sal hy vergewe word.