Word wakker en besef geloof is belangrik - 13 Augustus 2024

Die apostel Paulus se woorde in Romeine 13:11, is ‘n dringende versoek dat ons meer bewus moet wees van die tye waarin ons leef. Hy spoor gelowiges aan om uit die slaap wakker te word want “ons finale verlossing is nou nader as toe ons tot die geloof gekom het”. Hierdie kragtige vermaning beklemtoon hoe dringend dit is om ons geloof waaksaam en doelgerig uit te leef.

Paulus skryf hierdie brief aan die Christene in Rome in ‘n tyd van groot uitdagings en afwagting. Die vroeë kerk het vervolging in die gesig gestaar en hulle het gretig gewag op Christus se wederkoms. Paulus se boodskap was duidelik: die tyd van selfvoldaanheid was verby. Gelowiges word geroep om in die lig van Christus se naderende wederkoms te leef en moet volkome wakker en betrokke in hulle geloof wees.

In vandag se wêreld is dit maklik om geestelik selfvoldaan te raak en ons aandag deur al die eise en plesier van ons daaglikse lewe te laat aflei. Christus se wederkoms is vandag nader as wat dit gister was, en ons moet met ‘n gevoel van dringendheid en doelgerigtheid leef, ten volle bewus van die geestelike realiteit en die ewige implikasies van ons aksies.

Besin vanoggend oor jou geestelike lewe en dink na oor die areas waar jy miskien laks en traag geword het. Vra die Here om jou hart wakker te maak en jou passie vir Hom te hernieu. Wend ‘n doelbewuste poging aan om jou verhouding met God ‘n prioriteit te maak. Sit gereeld tyd uit vir gebed, Bybelstudie en gemeenskap met ander gelowiges.

Kom ons leef met ‘n ewigheidperspektief, en herinner onsself daagliks daaraan dat ons tyd op aarde tydelik is en dat ons aksies ewigheidsgevolge het. Laat hierdie perspektief ons besluite, prioriteite en interaksie met mekaar vorm.

Gebed: Hemelse Vader, dankie dat U ons daaraan herinner dat ons geloof belangrik is. Help ons om wakker te word uit ons geestelike slaap, om doelgerig en met ‘n gevoel van dringendheid te leef, want u wederkoms is vandag nader as ooit tevore. Gee aan ons die krag en wysheid om ons verhouding met U ‘n prioriteit te maak, met ewigheidsperspektief te leef, en om die hoop van die evangelie met diegene om ons te deel. Help ons om waaksaam te wees en vas in ons geloof te staan, gereed vir u wederkoms. In Jesus se Naam. Amen