Verandering, Advent en Kersfees – Dag 8

Wanneer dit by die oorsprong van Kersfees kom, moet ons probeer om ten minste die kennis wat ons daaroor uit die Woord kry, te onderskei van tydgeheiligde waarhede of sentimentele tradisies. Die drie sterrewiggelaars uit die Ooste was nie by Christus se geboorte in die stal soos al die kerskaartjies ons probeer wysmaak nie. Al was hulle daar het ons nie hulle name geken nie. En as diere teenwoordig was by die geboorte en dalk eerbiedig gebulk het was dit nie omdat hulle enige insig gehad het in wie die kind was en wat sy sending op aarde is nie, maar bloot omdat hulle gedoen het wat diere doen. Die verhaal wat Matteus en Lukas vertel verskil hemelsbreed van mekaar en Markus maak geen melding van hierdie buitengewone gebeurtenis nie.

So wat kan ons glo as waar en eg oor Christus se geboorte?

Eerstens dat dit nie ʼn onverwagte gebeurtenis was nie. Verskeie Ou Testamentiese profesieë voorspel die geboorte van die Messias, die Gesalfde, wat sou kom om die volk van God te red. Dit word deur die meeste gelowiges aanvaar dat Jesus Christus gebore is uit die maagd Maria in vervulling van die profeet Jesaja se voorspellings in Jesaja 7:14. Vanuit ʼn meer teologies beskrywende oogpunt sê Johannes dat die ewige en die goddelike woord vlees geword het en dat God dus by die mensdom sy “tent opgeslaan het”. Die leer van die inkarnasie of vleeswording beteken dat die tweede persoon in die Drie-eenheid die gestalte van ʼn mens aangeneem het en onder ons kom woon het. Jesus is dus volmaak – goddelik sowel as menslik – sonder om sy goddelikheid prys te gee of sy menslikheid op te offer.

Hoekom het God mens geword? Om tot die redding van die mensdom te kom en om as Koning oor hulle te heers. So het Hy die belofte van die langverwagte koning vervul. In sy rol as Heer en Koning onthul Hy God aan die mens. Dit, in kort, is waaroor Kersfees gaan. Vier dit vanjaar in die vreugde van jou Redder en Heer!