Troos uit die Woord – Dag 41

₂Hoor tog my hulpgeroep, o God,

slaan tog ag op my gebed.

₃Ver uit die vreemde uit, in wanhoop, roep ek na U.

Bring my op 'n rots waar ek veilig sal wees.

₄U is vir my 'n toevlug,

'n sterk vesting buite bereik van die vyand.

₅Laat my by U 'n blywende tuiste vind.

Laat my skuil onder u vleuels. Sela

₆U, o God, hoor my geloftes,

U vervul die wens van hulle wat u Naam eer.

₂Red my, o God, want die water het

tot by my keel gekom.

₃Ek het weggesak in diep modder

waarin ek nie kan staan nie.

Ek het in diep waters beland

waarin die stroom my meegesleur het.

₄Ek het my moeg geroep om hulp,

my keel is hees geroep,

selfs my oë het ingegee soos ek vir my God gewag het.

₅Dié wat my sonder rede haat,

is meer as die hare op my kop.

Dié wat my vir altyd wil stilmaak, is sterk.

My vyande dwing my met vals beskuldigings

om af te gee wat ek nie geroof het nie.

₆U weet hoe sondig ek is, o God,

my verkeerde dade kan ek tog nie vir U wegsteek nie.

₇Here, almagtige God, moenie dat dié wat op U vertrou,

deur my toedoen teleurgestel word nie.

God van Israel, moenie dat dié wat by U hulp soek,

deur my toedoen beskaam word nie.

₈Omdat ek op U vertrou,

word ek beledig en verkleineer.

₉Ek het vreemd geword vir my broers,

my familie wil my nie meer ken nie.

₁₀Omdat ek u huis liefhet,

moet ek ly;

die beledigings teen U het ook vir my getref.

₁₁Ek het gevas en gehuil

en daarvoor net beledigings gekry.

₁₂Ek het rouklere aangetrek,

maar hulle het met my gespot.

₁₃Die leeglêers in die stadspoort maak praatjies oor my,

en dronklappe maak liedjies oor my.

₁₄My gebed is tot U gerig, Here,

antwoord my tog gou, Here,

antwoord my in u groot liefde, o God;

u hulp staan vas.

₁₅Red my uit die modder, dat ek nie wegsak nie,

laat my wegkom van my vyande af,

weg uit die diep waters.

₁₆Moenie dat die stroom my meesleur

en die diep water my insluk nie,

en moenie dat hierdie put toegaan bokant my nie.

₁₇Antwoord my, Here, in u wonderlike liefde,

verhoor my in u groot barmhartigheid!

₁₈Moet tog nie u dienaar alleen laat nie!

Ek is in groot gevaar, antwoord my tog gou!

₁₉Kom red my lewe,

bevry my van my vyande.

₂₀U weet hoe ek beledig en verkleineer is,

hoe sleg ek daarvan afgekom het voor al my vyande.

₂₁Beledigings het my gebreek,

ek is gedaan.

Ek het gehoop op meegevoel, maar tevergeefs,

op mense om my te troos,

maar daar was nie een nie.

₂₂Toe ek honger was, het hulle my gif aangebied,

toe ek dors was, wou hulle my asyn laat drink.

₂₃Laat hulle feeste hulle tot 'n val bring

en hulle offermaaltye hulle ondergang wees.

₂₄Laat hulle stokblind word,

laat hulle gebreklik word.

₂₅Laat u straf hulle tref

en die vlam van u toorn hulle oorval.

₂₆Laat hulle blyplekke verwoes word

sodat daar niemand oor is in hulle wonings nie,

₂₇want hulle vervolg hom wat swaar deur U getref is

en verlustig hulle in die pyn van hom wat deur U deurboor is.

₂₈Reken ook dít by hulle skuld

sodat hulle nie vrygespreek word nie!

₂₉Skrap hulle name uit die boek van die lewe

dat dit nie saam met dié van die regverdiges opgeskryf staan nie!

₃₀Ek is 'n hulpelose mens, vol pyn,

maar U, o God, sal my red en my beskerm.

₃₁Dan sal ek die Naam van God besing,

Hom met 'n danklied prys.

₃₂So 'n offer is vir die Here verkiesliker

as selfs 'n volmaakte offerdier.

₃₃Die verdruktes sal my lied hoor en bly wees,

dié wat by God hulp soek, sal moed skep,

₃₄want die Here slaan ag op die armes,

Hy vergeet nie sy mense wat gevangenes is nie.

₃₅Laat hemel en aarde Hom prys,

die see met alles wat daarin wemel.

₃₆God sal Sion red

en die stede van Juda herbou.

Sy volk sal daarin woon en die land besit.

₃₇Die nasate van God se dienaars sal dit erf

en dié wat sy Naam liefhet, sal daarin woon.

₂Ek roep na God om hulp,

ek roep na God, want Hy sal my hoor.

₃In my nood soek ek hulp by die Here;

ook in die nag bly my hande in gebed uitgestrek

sonder om moeg te word;

maar ek vind geen troos nie.

₄Ek dink aan God en ek sug,

ek dink na en ek is verslae. Sela

₅U laat my wakker lê,

ontsteld en sprakeloos.

₆Ek dink aan vroeër dae,

aan jare lank gelede.

₇As ek so in die nag lê en terugdink

en peins, vra ek my af:

₈“Sal die Here vir altyd verstoot

en nooit weer genade betoon nie?

₉Het daar vir altyd 'n einde gekom aan sy trou?

Geld sy beloftes dan glad nie meer nie?

₁₀Het God vergeet om medelye te hê?

Het Hy in sy toorn

sy ontferming onttrek?” Sela

₁₁En ek sê:

“My grootste smart is dat die Allerhoogste nie handel soos voorheen nie.”

₁₂Ek wil dink aan die dade van die Here,

ja, ek wil dink aan u wonderdade van vroeër.

₁₃Ek wil nadink oor al u werk

en oor al u dade peins.

₁₄Alles wat U doen, is heilig, o God.

Waar is 'n god so groot soos God?

₁₅U is die God wat wonderdade doen;

U het u mag onder die volke geopenbaar.

₁₆U het u volk deur u krag gered,

die kinders van Jakob en Josef. Sela

₁₇Toe die waters U sien, o God,

toe die waters U sien, het hulle gebewe,

die diep waters het gesidder.

₁₈Die wolke het water uitgegiet,

uit die donderwolke het dit gedreun,

u weerligte het in alle rigtings geblits.

₁₉U donderslae het die lugruim gevul,

weerligstrale het die wêreld verlig,

die aarde het geskud en gebewe.

₂₀U het deur die see gekom,

u weg deur magtige waters gebaan.

Niemand het u spoor gesien nie.

₂₁U het u volk soos 'n kudde gelei

deur die hand van Moses en Aäron.

Luister tog na my, Here, verhoor my gebed,

want ek is hulpeloos en arm.

₂Beskerm my, want ek is u troue dienaar,

red my, want U is my God, op U vertrou ek.

₃Wees my genadig, Here,

ek roep die hele dag deur na U.

₄Maak my bly, Here,

ek hunker na U.

₅U is goed, Here, U vergewe altyd weer,

U is getrou teenoor dié wat na U roep om hulp.

₆Luister na my gebed, Here,

gee tog ag op my smeekgebed.

₇Op die dag van my nood roep ek na U,

U sal my gebed verhoor.

₈Daar is geen god soos U nie, Here,

niks kan met u werk vergelyk word nie.

₉U het al die nasies gemaak;

hulle sal voor U kom buig, Here,

en aan u Naam die eer gee,

₁₀want U is groot en doen magtige dade,

U alleen is God.

₁₁Leer my u pad, Here,

ek wil wandel in u waarheid;

leer my U met toewyding dien.

₁₂Met my hele hart sal ek U prys, Here my God,

u Naam altyd eer,

₁₃want u liefde vir my was groot:

uit die dieptes van die dood het U my gered.

₁₄Dit is hovaardige mense wat my aanval, o God,

'n bende geweldenaars wat my wil doodmaak,

mense wat met U nie rekening hou nie.

₁₅U, Here, is 'n barmhartige en genadige God,

lankmoedig, vol liefde en trou.

₁₆Sien my, u dienaar van my geboorte af, in genade aan,

gee U my tog krag en red my.

₁₇Maak my 'n voorbeeld van u goedheid,

sodat dié wat my haat, verleë sal moet toesien

dat U, Here, my help en vir my uitkoms gee.