Troos uit die Woord – Dag 24

₁₃Soos 'n vader hom ontferm oor sy kinders,

so ontferm die Here Hom oor dié wat Hom dien.

₁₄Hy weet waarvan ons gemaak is,

Hy hou dit in gedagte dat ons stof is.

₂By U, Here, skuil ek.

Laat my tog nooit teleurgestel staan nie!

Bevry my, want U is getrou.

₃Luister na my, red my tog gou.

Wees vir my 'n rots om na toe te vlug,

'n bergvesting om my te red.

₄Ja, U is my rots en my bergvesting,

ter wille van u Naam sal U my voorgaan en my lei.

₅Bevry my uit die vangnet wat hulle vir my gestel het,

want U is my toevlug.

₆In u hande gee ek my lewe oor,

want, Here, troue God, U het my vrygemaak.

₉My ellende het nie ongemerk by U verbygegaan nie,

U het op my trane gelet.

In u boek staan hulle opgeteken.

₁₀Die dag wanneer ek na U roep om hulp,

val my vyande terug.

Dít weet ek: God is aan my kant.

₂Ek het gesmag na die hulp van die Here.

Hy het na my toe afgebuig

en my hulpgeroep gehoor.

₃Hy het my uitgetrek uit die put van die dood,

uit die slymerige modder,

my op 'n rots laat staan

en my weer op vaste grond laat loop.

₄Hy het my 'n nuwe lied in die mond gelê,

'n loflied vir ons God.

Baie sal daarvan hoor en Hom die eer toebring,

hulle sal op die Here vertrou!

As die Here ons nie gehelp het nie,

dit moet Israel bely,

₂as die Here ons nie gehelp het

toe mense ons aangeval het nie,

₃dan het hulle ons lewendig verslind

toe hulle woede teen ons ontvlam het;

₄dan het die waters ons weggespoel

en die vloed ons oorweldig;

₅dan het die skuimende waters ons oorweldig.

₆Aan die Here kom die lof toe:

Hy het nie toegelaat dat ons hulle prooi word nie.

₇Ons is bevry soos 'n voël uit die wip van 'n voëlvanger;

die wip het gebreek en ons was vry!

₈Ons hulp kom van die Here

wat hemel en aarde gemaak het.