Troos uit die Woord – Dag 12

₆Die hemel loof u wondermag, Here,

die hemelinge loof u trou.

₇Wie in die hemel kan met die Here vergelyk word?

Wie onder die hemelwesens is soos die Here?

₈Hy is God, vir Hom het die hemelse vergadering 'n heilige ontsag.

Hy is magtig, gevrees onder almal rondom Hom.

₉Here, almagtige God, wie is soos U?

U krag is groot, Here, u trou is oral!

₁₀U heers oor die onstuimige see:

as sy golwe opstaan, laat U hulle bedaar.

₂Here, ons Here,

hoe wonderbaar is u Naam oor die hele aarde,

hoe glansryk alles wat U in die hemelruim geplaas het!

₃Kinders en suigelinge besing die magtige werk

wat U tot stand gebring het.

So word u teëstanders,

die vyande en wraakgieriges, tot swye gebring.

₄As ek u hemel aanskou,

die werk van u vingers,

die maan en die sterre waaraan U 'n plek gegee het,

₅wat is die mens dan

dat U aan hom dink,

die mensekind dat U na hom omsien?

₂Die hemel getuig van die mag van God,

die uitspansel maak die werk van sy hande bekend.

₃Die een dag gee die berig deur aan die ander

en die een nag deel die kennis aan die volgende mee.

₄Sonder spraak en sonder woorde,

onhoorbaar is hulle stem.

₅Tog gaan daarvan 'n boodskap uit oor die hele wêreld

en hulle taal bereik die uithoeke van die aarde.

Vir die son is daar in die hemel 'n tent opgeslaan.

₆As hy stralend begin om sy baan te volg,

is hy soos 'n bruidegom wat uit sy slaapkamer kom.

₇Aan die een kant van die hemel kom hy op

en aan die ander kant gaan hy onder,

en niks ontkom aan sy gloed nie.

₂Die Here is groot!

Aan Hom kom al die lof toe

hier in die stad van ons God,

hier op sy heilige berg,

₁₁Net soos u Naam, o God, so strek u lof oor die hele aarde.

U mag het groot redding gebring.

₁₂Sionsberg moet bly wees,

die stede van Juda moet oor u reddingsdade juig!