Sielsreis – dag 22

Vier weke voor Kersfees vier ons die begin van Advent. Ons kan dan begin om die slapies af te tel na Kersfees. Die ster van Advent is ongetwyfeld Christus. Gedurende die jaar is ons aandag so op onsself en ons eie gesinne gerig en is ons so besig met ons eie probleme dat hierdie maand ons ʼn geleentheid bied om op die aanloop tot die Kersgebeure te fokus.

Te midde van talle redders en messiase wat deur die jare gekom en gegaan het, staan Jesus nie as ʼn blote voetnoot tot die een of ander filosofie of as ʼn ontoeganklike stukkie etiek wat slegs ʼn klein groepie mense verstaan nie. Hy verskyn ook nie as die een of ander sjamaan of heilige wat beloof om jou nader aan God te bring of jou op ʼn reis van selfontdekking te neem nie.

Wie is Hy? Hy is die Goddelike wat teenwoordig is sedert die begin van tyd en ruimte. Anders as die mens is Hy nie na die beeld van God geskape nie maar is God self.

Hy is die Skepper, want “deur Hom en tot Hom is alle dinge”.

Hy is die “hoof” van sy kerk op aarde, want Hy was die eerste om die dood te oorwin. Maar meer nog, God het gekies om in Hom teenwoordig te wees in al sy mag en krag om Hom sigbaar te maak vir ons.

Ons het nie te doen met ʼn blote afskynsel van God of ʼn hulpelose kind in ʼn krip nie. Christus staan as Pantokrator – heerser van die heelal. Die diepste waarheid oor Hom is egter dat Hy Hom kwesbaar gestel het om in ons harte gebore te word.