Sielsreis – dag 1

Vandag word jy uitgenooi, of uitgedaag, om op reis te gaan sonder om ʼn voet uit jou huis te sit. Dit is ʼn reis na die siel om bestekopname van jou geestelike landskap te doen. Jy hoef nie eens op jou eie te gaan nie. In die Ou Testament lees ons van God wat saam met sy volk reis, Jesus praat oor die koninkryk wat altyd by ons is, terwyl Paulus gereeld praat van die gemeenskap van gelowiges wat rondom ons is. Ons kan dus ʼn sielsreis op soek na ons geloof onderneem in die voetstappe van dié wat ons voorafgegaan het.

Waar begin ek? Deur ontslae te raak van alles wat jou aandag in beslag neem en jou gedagtes van jou reis aflei. Ignoreer die gemorspos, die katalogusse, die koerantartikels, en as jy kan, of veral, die televisie.

Verfris jou innerlike. Ontdek weer die vreugde van geloof. Wat maak jou opgewonde oor jou geloof? Wat dink jy sal God se hart verbly oor die manier waarop jy glo? Probeer om jou eerste liefde vir God te herwin. Gaan soek weer na die werking van Heilige Gees in jou siel. Paulus sê mos êrens: Moenie die Gees in jou blus nie.

Moenie verskoning maak vir jou geloof nie. As iemand jou vra wat belangrik is in jou lewe, sê sonder skroom: My geloof in Jesus Christus.

Die wonderlikste van so ʼn innerlike reis is om te ontdek dat al wys jou liggaam die tekens van die tyd, jou siel oor en oor hernu en verfris kan word.

Voorspoedige reis!