Rig jou geloofsoog op Hom – Dag 7
Skatte in kleipotte
Bybelteks(te)
'n Skat in kleipotte
Toe hierdie brief geskryf is, was kleipotte die Tupperware van die wêreld. Dit was maklik om aan te koop, dit het maklik gebreek en enigiets kon daarin gestoor word soos water, kos, geld en juwele. Paulus vergelyk ons lewens met kleipotte, hy noem dat ons soos gewone kleipotte is wat maklik breek. En alhoewel ons breekbaar is, is die skat wat ons in ons het onberekenbaar.
God het ʼn skat van onskatbare waarde in hierdie breekbare “kleipotte” geplaas. Hoekom? Sodat ander die skat van Jesus se lewe kan sien en ervaar eerder as om deur ons beïndruk te word. Ons lewens is nie uit gewapende beton, vlekvrye staal, silwer of goud aanmekaar gesit sodat ons die krediet vir ons sukses vir onsself kan toe-eien nie. Ons is maar net van gewone klei uit die aarde gemaak sodat die heerlikheid van God in ons lewens duidelik sigbaar kan wees.
Wat gebeur met ʼn kleipot wanneer dit val en breek? Die inhoud vloei uit. En wat gebeur met ʼn brose mens wat met Christus gevul is wanneer hy baie druk ervaar, sake vir hom bemoeilik word, hy vervolg word of as hy tot ʼn val kom? Jesus, sy lewe, dood en opstanding vloei uit.
Al die woelinge en kwaai slae wat die lewe ons toedien is nie omdat God ons verlaat het nie, maar wel omdat ons betroubare draers van sy heerlikheid is. Die Here laat die slae van die lewe toe en Hy laat toe dat ons soms gebreek word, want dit is alles deel van die Christelike groeiproses. Dit is goed om ʼn “kleipot” te wees.
