Rig jou geloofsoog op Hom – Dag 12

Paulus se laaste woorde aan die Korintiërs is ʼn woord van vrede. Hy kyk verby al die verdeeldheid in Korinte na die basiese eensgesindheid van die kerk. God het daardie eenheid geskep en dit bestaan al is daar onenigheid, twis, jaloesie en verdeeldheid in die gemeente. Christene behoort aan mekaar. Hulle is deel van God se familie en hulle behoort ook so op te tree, sê Paulus aan die Korinte.

Paulus vra nog iets van hierdie Christene. Verander julle manier van doen. As Christus in julle is, kan julle dit doen. Die punt is dat ons nie kan voortgaan om soos almal om ons te leef as Jesus in ons is nie. Jesus wat in ons is, is die fundamentele rede hoekom Christene anders moet wees. Ons moet vriendelik, liefdevol, openhartig en vergewensgesind wees – ons moenie veroordelend, geslote en bitter wees nie. Dit geld ons privaatlewens, sowel as ons openbare lewe by die werk, die kerk of waar ons ookal in ons gemeenskappe betrokke is. Ons is anders, want Christus is in ons.

Die geskiedenis vertel nie vir ons wat met die kerk in Korinte gebeur het en of hulle herstel het en gehoorsaam aan die Woord was nie. Maar Paulus het vir ons ʼn ongelooflike getuienis nagelaat oor hoe ons as Christene in ʼn sekulêre wêreld moet lyk en werk. Ons word geroep om vandag steeds te leef soos hy aan die Christene in Korinte geskryf het. Ons moet besef dat jy nie meer dieselfde mens is wanneer Jesus Christus in jou is nie.

Vanjaar, wanneer jy gekonfronteer word met onenigheid, twis en jaloesie, maak dit jou nommer een voorneme om jou geloofsoog op Jesus gerig te hou en daarna te streef om vriendelik, liefdevol, openhartig en vergewensgesind teenoor almal te wees.