Na die Woord – Dag 130

Wanneer die Here uit Sion brul,

wanneer Hy sy stem uit Jerusalem laat hoor,

verdor die weivelde van die herders

en verdroog die top van Karmelberg.

Selfs as Damaskus net drie keer sonde gedoen het,

sou Ek sy straf nie herroep het nie.

Maar nou het hy 'n vierde sonde daarby gevoeg:

hy het vir Gilead met skerp ysters gemartel.

₄Daarom sal Ek in die paleis van Gasael 'n vuur laat losbreek

en dit sal die mooi huise van Ben-Hadad verteer.

₅Ek sal die grendels van Damaskus stukkend breek,

die inwoners van Bikat-Awen

en die regeerder van Bet-Eden uitroei.

Die Arameërs sal in ballingskap na Kir toe weggevoer word,

sê die Here.

Selfs as Gasa net drie keer sonde gedoen het,

sou Ek sy straf nie herroep het nie.

Maar nou het hy 'n vierde sonde daarby gevoeg:

hy het mense voor die voet as ballinge weggevoer

en aan Edom uitgelewer.

₇Daarom sal Ek binne die mure van Gasa 'n vuur laat losbreek

en dit sal sy mooi huise verteer.

₈Ek sal die inwoners van Asdod

en die regeerder van Askelon uitroei.

Ek sal my hand teen Ekron oplig,

en die Filistyne wat nog oor is, sal omkom,

sê die Here my God.

Selfs as Tirus net drie keer sonde gedoen het,

sou Ek sy straf nie herroep het nie.

Maar nou het hy 'n vierde sonde daarby gevoeg:

hy het mense voor die voet as ballinge aan Edom uitgelewer

en nie aan die ooreenkoms met sy bondgenote gedink nie.

₁₀Daarom sal Ek binne die mure van Tirus 'n vuur laat losbreek

en dit sal sy mooi huise verteer.

Selfs as Edom net drie keer sonde gedoen het,

sou Ek sy straf nie herroep het nie.

Maar nou het hy 'n vierde sonde daarby gevoeg:

hy het die Israeliete, sy broers, agtervolg met die swaard

en die broederliefde verloën,

hy het hulle in sy toorn verskeur,

sy woede het bly kook.

₁₂Daarom sal Ek in Teman 'n vuur laat losbreek

en dit sal die mooi huise van Bosra verteer.

Selfs as die Ammoniete net drie keer sonde gedoen het,

sou Ek hulle straf nie herroep het nie.

Maar nou het hulle 'n vierde sonde daarby gevoeg:

hulle het swanger vrouens in Gilead oopgesny

en hulle eie gebied uitgebrei.

₁₄Daarom sal Ek binne die mure van Rabba 'n vuur aansteek

en dit sal sy mooi huise verteer.

Dié dag sal daar geskreeu word

en sal daar oorlog wees, 'n storm, 'n orkaan.

₁₅Hulle koning sal in ballingskap weggevoer word,

hy en sy amptenare saam met hom,

sê die Here.

Selfs as Moab net drie keer sonde gedoen het,

sou Ek sy straf nie herroep het nie.

Maar nou het hy 'n vierde sonde daarby gevoeg:

hy het die bene van Edom se koning tot kalk verbrand.

₂Daarom sal Ek in Moab 'n vuur laat losbreek

en dit sal die mooi huise van Kerijot verteer.

Moab sal omkom onder oorlogsrumoer,

onder die blaas van die ramshoring.

₃Ek sal sy regeerder uit hom wegvat

en al sy amptenare saam met hom doodmaak, sê die Here.

Selfs as Juda net drie keer sonde gedoen het,

sou Ek sy straf nie herroep het nie.

Maar nou het hy 'n vierde sonde daarby gevoeg:

hulle het die wet van die Here verwerp,

hulle nie aan sy voorskrifte gehou nie

en toe het die vals gode hulle verlei,

die afgode agter wie hulle voorvaders aangeloop het.

₅Daarom sal Ek in Juda 'n vuur laat losbreek

en dit sal die mooi huise van Jerusalem verteer.

Selfs as Israel net drie keer sonde gedoen het,

sou Ek sy straf nie herroep het nie.

Maar nou het hy nog sondes daarby gevoeg:

hulle verkoop onskuldige mense vir geld,

arm mense oor 'n paar sandale;

₇hulle trap swakkes se koppe plat in die grond

en veronreg dié wat hulleself nie kan verweer nie;

pa en seun kuier by dieselfde meisie

en doen my heilige Naam oneer aan;

₈langs elke altaar strek die Israeliete hulle uit

op klere wat as pand gevat is;

in die huis van hulle God

drink hulle die wyn van dié wat uitgebuit is.

₉Ek het die Amoriete wat hoog soos seders is,

sterk soos eike, uitgeroei om vir julle plek te maak, Israeliete!

₁₀Ek het julle uit Egipte laat trek,

Ek het julle veertig jaar lank in die woestyn gelei,

Ek het julle die land van die Amoriete in besit laat neem,

₁₁Ek het van julle seuns as profete laat optree

en van julle jongmanne as nasireërs.

Is dit nie so nie, Israeliete?

vra die Here.

₁₂Maar julle het die nasireërs laat wyn drink

en die profete belet om as profete op te tree.

₁₃Daarom laat ek julle vasval net waar julle is

soos 'n wa vasval wat te vol gerwe is.

₁₄Die vinnige sal nie kan vlug nie,

die sterke se krag sal hom niks baat nie,

die dapper soldaat sal homself nie kan red nie.

₁₅Wie met pyl en boog veg, sal nie kan weerstand bied nie,

die vinnige sal nie kan weghardloop nie,

die ruiter sal homself nie kan red nie.

₁₆Selfs die sterkste soldaat sal daardie dag kaal wegvlug,

sê die Here.

₁Luister na die woord wat die Here

teen julle rig, Israeliete,

teen al die stamme wat Hy uit Egipte laat trek het:

₂Ek het net vir julle uitgekies uit al die volke van die aarde,

daarom sal Ek julle straf oor al julle sondes.

₃Sal twee saamloop as hulle dit nie afgespreek het nie?

₄Sal 'n leeu in die bos brul as hy niks het om te vreet nie?

Sal hy in sy boerplek roep as hy nie gevang het nie?

₅Sal 'n voël in 'n wip op die grond val

as daar nie 'n strik vir hom gestel is nie?

Sal 'n wip op die grond toeklap

as dit nie iets gevang het nie?

₆Sal daar in 'n stad op 'n ramshoring geblaas word

as die inwoners nie geskrik het nie?

Sal daar 'n ramp oor 'n stad kom

as die Here dit nie gebring het nie?

₇Die Here God doen niks as Hy nie sy besluit

bekend gemaak het aan sy dienaars die profete nie.

₈Die leeu het gebrul, wie sal nie bang wees nie?

Die Here God het gepraat, wie sal nie as profeet optree nie?

₉Maak dit bekend in die mooi huise in Asdod,

in die mooi huise in Egipte,

sê vir die mense daarin:

Kom bymekaar op die Samariaberge,

kyk na die groot verwarring in Samaria,

die verdrukking daarbinne.

₁₀Hulle wat geweld en verwoesting in hulle mooi huise herberg,

weet nie hoe om reg te doen nie, sê die Here.

₁₁Daarom, so sê die Here my God:

'n Vyand sal die land inneem,

hy sal jou vesting bo-op jou afbreek,

jou mooi huise kaalstroop.

₁₂So sê die Here:

Soos 'n skaapwagter twee pootjies

of 'n stukkie oor weggryp uit 'n leeu se bek,

so sal die Israeliete weggegryp word,

hulle wat in Samaria op rusbanke sit,

op oorgetrekte gemakstoele!

₁₃Luister hierna, en lê getuienis af teen Jakob,

sê die Here my God, die almagtige God!

₁₄Die dag as Ek Israel oor sy sondes straf,

sal Ek die altare van Bet-El verwoes;

die horings van sy altare sal afgebreek word

en op die grond val.

₁₅Ek sal die winterhuis platslaan

saam met die somerhuis,

die huise met ivoorinleg sal vergaan,

baie huise sal verdwyn, sê die Here.

₁Luister na hierdie woord,

vrouens wat op Samariaberg lekker lewe,

lewe soos die koeie van Basan,

julle deur wie die swakkes verdruk

en die armes mishandel word,

julle wat vir julle mans sê:

“Bring wyn dat ons kan drink!”

₂Die Here my God wat heilig is, het 'n eed afgelê:

Pas op, daar kom dae oor julle dat julle met hake opgetel sal word,

dat julle van agter met haakdorings aangedryf sal word.

₃Elke vrou sal reg voor haar uit oor die afgebreekte stadsmuur loop,

julle sal na Hermon toe uitgedryf word, sê die Here.

₄Kom na Bet-El toe as julle wil sonde doen,

na Gilgal toe as julle nog meer sonde wil doen.

Bring julle offers vroegmôre,

julle tiendes op die derde dag.

₅Verbrand die ongesuurde brood as dankoffer,

kondig julle vrywillige offers aan,

laat die mense dit hoor.

So hou julle mos daarvan, Israeliete,

sê die Here my God.

₆Ek het hongersnood in al julle stede laat kom,

broodsgebrek in al julle dorpe,

maar julle het julle nie tot My bekeer nie, sê die Here.

₇Ek het die reën drie maande voor oestyd

van julle af weggehou;

Ek het laat reën oor een stad

en oor 'n ander die reën laat wegbly;

die een stuk grond het goed reën gekry

en die ander waar dit nie gereën het nie, het uitgedroog.

₈Twee, selfs drie stede se mense het hulle na 'n stad toe aangesleep

om water te kry, sonder om hulle dors te les,

en tog het julle julle nie tot My bekeer nie, sê die Here.

₉Ek het julle gestraf met brandkoring en met heuningdou,

Ek het julle tuine en wingerde laat verdroog,

sprinkane het julle vyebome en julle olyfbome kaalgevreet,

en tog het julle julle nie tot My bekeer nie, sê die Here.

₁₀Ek het plae soos dié van Egipte na julle toe gestuur;

Ek het julle jongmans en hulle spogperde

met die swaard doodgemaak;

Ek het die stank van julle laer in julle neuse laat opwalm,

en tog het julle julle nie tot My bekeer nie, sê die Here.

₁₁Ek het julle stede verwoes soos Ek Sodom en

Gomorra geheel en al verwoes het,

julle het soos 'n stuk hout geword

wat uit die vuur uit geruk is,

en tog het julle julle nie tot My bekeer nie, sê die Here.

₁₂Daarom sal Ek dit alles weer aan jou doen, Israel!

En omdat Ek jou dít sal aandoen, Israel,

maak jou klaar om voor jou God te kom verskyn!

₁₃Jy moet besef:

Hy wat berge vorm en die wind skep,

Hy wat sy gedagtes aan die mens bekend maak,

Hy wat die dagbreek donker maak,

Hy wat oor die hoogtes van die aarde gaan,

sy Naam is Here, almagtige God!

₁Hoor hierdie woord wat ek teen julle moet sê,

hierdie treurlied, Israel:

₂Israel het geval en hy sal nie weer opstaan nie;

hy lê neergegooi op sy grond

en niemand help hom op nie.

₃So het die Here my God gesê:

Die stad wat met duisend gaan aanval,

hou net honderd oor,

en dié een wat met honderd aanval,

hou net tien oor vir Israel.

Vra na my wil, dan sal julle lewe!

₅Moenie in Bet-El gaan raad soek nie,

moenie na Gilgal toe gaan

of verbygaan Berseba toe nie.

Gilgal sal in ballingskap weggevoer word,

en Bet-El sal tot niet gaan.

₆Vra na die wil van die Here, dan sal julle lewe!

As julle dit nie doen nie,

sal die Here vir Josef soos 'n vuur tref,

'n vuur wat vir Bet-El sal verteer

sonder dat iemand dit kan blus.

₇Julle maak van die regspraak 'n bitter saak,

julle trap die reg in die grond in.

₈Hy deur wie die Sewester en Orion gemaak is,

Hy wat die donker in oggendlig verander

en die dag donker nag laat word,

Hy wat die water van die see roep

en dit oor die aarde uitstort,

sy Naam is die Here.

₉Dit is Hy wat die magtige met vernietiging tref,

wat vernietiging oor die vestingstad bring.

₁₀Julle haat dié wat vir die reg opkom in die howe,

julle verafsku dié wat die waarheid praat.

₁₁Omdat julle die arm mens vertrap

en van hom koring afpers,

sal julle nie woon in die huise van gekapte klip wat julle bou nie

en sal julle nie die wyn drink van die pragtige wingerde

wat julle plant nie.

₁₂Ek weet hoe baie julle oortredings is,

hoe groot julle sondes is,

julle wat die vyande is van dié wat reg doen,

julle wat julle laat omkoop

en nie aan die armes reg laat geskied nie.

₁₃Dit is daarom dat 'n verstandige mens maar stilbly in hierdie tyd,

want dit is 'n bose tyd.

₁₄Probeer goed doen, nie verkeerd nie, dat julle kan lewe!

Dan sal die Here die almagtige God so by julle wees

soos julle sê dat Hy is.

₁₅Julle moet haat wat verkeerd is,

julle moet liefhê wat goed is,

julle moet opkom vir die reg in die howe.

Dan sal die Here die almagtige God Hom dalk ontferm

oor wat daar van Josef oor is.

₁₆So sê die Here, die almagtige God, die Here:

Die mense sal treur op al die oop ruimtes,

hulle sal op al die strate sê: “Ag tog, ag tog!”

Hulle sal die boere en die treursangers roep

om saam te kom treur.

₁₇Daar sal ook in al die wingerde getreur word,

want Ek gaan tussen julle deur om julle te straf,

sê die Here.

₁₈Ellende wag vir dié wat smag na die dag van die Here!

Waarom verlang julle na die dag van die Here?

Dit sal donker bring, nie lig nie;

₁₉dit sal wees soos wanneer iemand vir 'n leeu vlug

en 'n beer val hom aan,

of soos wanneer iemand tuiskom

en hy leun met sy hand teen die muur

en 'n slang pik hom.

₂₀Die dag van die Here bring donker, nie lig nie,

net duisternis, nie 'n ligstraal nie.

₂₁Ek haat, Ek verafsku julle feeste,

Ek het niks aan julle feestye nie.

₂₂Al bring julle vir My brandoffers en graanoffers,

dit is nie vir My aanneemlik nie,

en Ek kyk nie eens na julle maaltydoffers

van vetgevoerde kalwers nie.

₂₃Gee pad voor My met die rumoer van jou gesing;

Ek wil nie jou harpmusiek hoor nie!

₂₄Maar laat die reg en die geregtigheid te voorskyn kom,

laat dit aanrol soos watergolwe, soos 'n standhoudende stroom.

₂₅Moes julle vir My die veertig jaar in die woestyn

diereoffers en graanoffers bring, Israel?

₂₆Julle sal julle koning Sikkut en julle afgodsbeeld Kijun,

dié stergode wat julle vir julle gemaak het,

moet dra ₂₇wanneer Ek julle in ballingskap laat wegvoer

ver by Damaskus verby, sê die Here.

Sy Naam is Almagtige God.

Tot U, Here, rig ek my,

₂my God, op U vertrou ek.

Laat my vertroue tog nie tevergeefs wees nie,

laat my vyande nie juig oor wat met my gebeur nie.

₃Niemand wat sy verwagting in U stel,

sal beskaam word nie.

Dié wat nie op U vertrou nie,

hulle kom in die skande.

₄Maak my u wil bekend, Here,

leer my u paaie.

₅Laat u waarheid my lei en onderrig my daarin,

want U is God, my redder.

In U stel ek elke dag my verwagting.

₆Dink aan die liefde en trou, Here,

wat U van altyd af betoon het.

₇Moet tog nie dink aan die sondes en oortredinge van my jeug nie.

Dink aan my in u trou, Here, omdat U goed is.

₈Die Here is goed en regverdig:

Hy wys selfs vir sondaars die pad aan,

₉Hy laat aan hulpeloses reg geskied

en Hy leer hulle sy pad.

₁₀Liefde en trou is die paaie wat die Here bewandel

met dié wat sy verbond en verordeninge bewaar.

₁₁Ter wille van u Naam, Here,

vergewe my my sonde,

want dit is groot.

₁₂As iemand die Here dien,

leer Hy hom watter pad hy moet kies,

₁₃sodat hy voorspoed sal geniet

en sy nageslag die land sal bly bewoon.

₁₄Die Here neem dié wat Hom dien, in sy vertroue

en maak sy verbond aan hulle bekend.

₁₅My oë is altyd op die Here gerig,

want dit is Hy wat my voete uit die vangnet sal hou.

₁₆Sien my in genade aan, Here,

want ek is eensaam en verstote.

₁₇Ek verkeer in die allergrootste nood;

bevry my tog uit my ellende.

₁₈Kyk hoe sleg gaan dit met my

en hoe swaar kry ek.

Vergewe tog al my sondes.

₁₉Kyk hoe baie vyande het ek

en hoe fel haat hulle my.

₂₀Beskerm my en red my,

laat my nie beskaamd staan nie,

want by U skuil ek.

₂₁Laat onskuld en opregtheid oor my die wag hou,

want op U vertrou ek.

₂₂O God, red Israel uit al sy nood.