Na die Woord – Dag 108

₁Ek het my wil geopenbaar aan 'n volk

wat nie na My gevra het nie.

Ek het My laat vind deur mense

wat My nie in die gebed gesoek het nie.

Vir 'n nasie wat My nie aangeroep het nie,

het Ek gesê: Hier is Ek! Hier is Ek!

₂Ek het gedurig my hande uitgesteek na 'n opstandige volk

wat 'n pad geloop het wat nie goed is nie,

wat hulle eie kop gevolg het.

₃Hierdie volk beledig My gedurig in my gesig,

hulle bring soos heidene offers in tuine

en brand wierook op hulle altare.

₄Hulle sit tussen die grafte

en bly snags in geheime plekke.

Hulle eet varkvleis,

en daar is onrein vleis in hulle borde.

₅Hulle sê: “Bly waar jy is! Moenie naby my kom nie!

Ek is te heilig vir jou!”

Hierdie mense maak My woedend,

hulle laat my toorn losbreek.

₆By My staan dit vas:

Ek gaan ingryp,

Ek gaan hulle straf,

Ek gaan hulle straf volgens wat hulle verdien.

₇Ek gaan hulle straf oor hulle en hulle voorvaders se sondes,

sê die Here.

Hulle het wierook gebrand op die berge

en My beledig op die heuwels.

Ek gaan hulle straf vir hulle dade van vroeër,

volgens wat hulle verdien.

₈So sê die Here:

Wanneer 'n druiwetros nog sap het,

sê die mense: “Moet dit nie weggooi nie,

want dit het nog nut.”

So sal Ek doen ter wille van my dienaars,

Ek sal hulle nie almal verwerp nie.

₉Ek sal aan Jakob 'n nageslag gee,

aan Juda 'n nageslag wat my bergland sal besit.

Dié wat Ek uitverkies het, sal dit in besit neem,

my dienaars sal daar woon.

₁₀Die Saronvlakte sal 'n weiveld wees vir die kleinvee,

die Akorlaagte 'n lêplek vir die beeste,

vir dié uit my volk wat vra na my wil.

₁₁Maar julle wat van die Here afvallig geword het,

julle wat my heilige berg vergeet het,

julle wat vir die afgod Gad offermaaltye hou,

wyn inskink vir die afgod Meni,

₁₂Ek gaan julle straf met die dood,

julle sal almal inmekaarsak en doodgesteek word,

omdat julle nie geantwoord het toe Ek geroep het nie,

nie geluister het toe Ek gepraat het nie.

Julle het gedoen wat verkeerd is in my oë,

julle het gekies vir wat My nie aanstaan nie.

₁₃Daarom, so sê die Here my God,

sal my dienaars genoeg hê om te eet,

maar julle sal honger ly;

my dienaars sal genoeg hê om te drink,

maar julle sal dors ly;

my dienaars sal bly wees,

maar julle sal teleurgestel staan.

₁₄My dienaars sal jubel omdat dit met hulle goed gaan,

maar julle sal skreeu van pyn,

julle sal huil van hartseer.

₁₅Dié wat Ek uitverkies het, sal julle naam gebruik

om mense mee te vervloek.

Die Here my God sal júlle ombring,

maar aan dié wat Hom dien,

gee Hy 'n nuwe toekoms.

₁₆Elkeen in die land wat om voorspoed bid,

sal dit doen in die Naam van die God wat getrou is,

en elkeen in die land wat 'n eed aflê,

sal dit doen in die Naam van die God wat getrou is.

Die swaarkry van vroeër sal vergeet wees,

Ek laat dit verdwyn.

₁₇Ek gaan 'n nuwe hemel en 'n nuwe aarde skep;

aan dié wat daar nou is, sal daar nie meer gedink word nie,

hulle sal nie onthou word nie.

₁₈Wees bly, en jubel sonder ophou oor wat Ek gaan skep:

Ek gaan 'n Jerusalem skep wat vol blydskap is,

sy inwoners sal vreugde hê.

₁₉Ek sal jubel oor Jerusalem,

Ek sal bly wees oor my volk.

Daar sal in Jerusalem nie meer iemand gehoor word

wat huil of om hulp roep nie.

₂₀Daar sal geen kind sterf

wat maar 'n paar dae oud is nie

en geen grysaard wat nie sy jare uitgeleef het nie.

As iemand op honderdjarige leeftyd sterf,

sal dit beskou word asof hy jonk gesterf het;

as hy nie honderd word nie,

sal hy beskou word as iemand wat vervloek is.

₂₁Dan sal mense huise bou en self daarin woon,

hulle sal wingerde plant en self die druiwe eet.

₂₂Hulle sal nie huise bou waarin ander sal woon nie,

hulle sal nie wingerde plant

waarvan ander die druiwe sal eet nie.

My volk sal so oud word soos 'n boom.

Dié wat Ek uitverkies het,

sal self die vrug van hulle handewerk geniet.

₂₃Hulle sal hulle nie tevergeefs vermoei nie,

hulle sal nie kinders hê vir wie daar rampe wag nie,

want hulle sal 'n volk wees wat deur die Here geseën word,

hulle en hulle afstammelinge.

₂₄Voor hulle nog roep, sal Ek antwoord,

terwyl hulle nog praat, sal Ek hulle gebed verhoor.

₂₅Die wolf en die lam sal saam wei,

die leeu sal strooi vreet soos 'n bees,

en stof sal die kos van die slang wees.

Op my heilige berg sal niks verkeerds gedoen word nie,

niks vernietig word nie,

sê die Here.

Die hemel is my troon

en die aarde die rusplek vir my voete.

Hoe moet die huis dan wees

wat julle vir My bou,

die plek waar Ek kan woon?

₂Ek het alles gemaak

en so het alles ontstaan,

sê die Here.

Ek slaan ag op die mens in nood,

op dié een wat berou het oor sy sonde,

wat ontsag het vir my woord.

₃Die mense offer bulle

maar hulle maak ook mense dood as offers,

hulle offer lammers

maar hulle breek ook honde se nekke as offers,

hulle bring graanoffers maar ook offers van varkbloed,

hulle offer wierook maar hulle prys ook afgode;

hulle het besluit om hulle eie kop te volg,

hulle is lief vir hulle afskuwelike afgodsoffers.

₄Daarom besluit Ek dat hulle gestraf moet word

en bring Ek verskrikking oor hulle.

Toe Ek geroep het, het niemand geantwoord nie,

toe Ek gepraat het, het niemand geluister nie;

hulle het gedoen wat verkeerd is in my oë,

hulle het gekies vir wat My nie aanstaan nie.

₅Hoor die woord van die Here,

julle wat ontsag het vir sy woord:

Julle broers deur wie julle gehaat word,

deur wie julle verstoot word ter wille van my Naam, sê:

“Laat die Here sy mag bewys,

dat ons kan sien waarom julle so bly is!”

Maar hulle sal ontnugter word:

₆hoor die rumoer daar in die stad,

hoor daar in die tempel,

hoor hoe die Here sy vyande straf

oor hulle dade.

₇Bring 'n vrou 'n kind in die wêreld

voordat sy geboortepyne het?

Kry sy 'n kind voordat die pyne haar oorval?

₈Wie het al so iets gehoor?

Wie het dit al gesien?

Word 'n land op een dag gebore,

of word 'n nasie in een oomblik in die wêreld gebring?

Maar Sion het skaars geboortepyne gekry

of sy het haar kinders in die wêreld gebring.

₉Sou Ek die moederskoot laat oopgaan

en nie 'n geboorte laat plaasvind nie?

vra die Here.

Of sou Ek wat geboortes laat plaasvind,

die moederskoot toesluit?

vra jou God.

₁₀Wees bly saam met Jerusalem

en juig saam met haar,

almal wat haar liefhet.

Wees vrolik saam met haar,

almal wat oor haar getreur het.

₁₁Julle sal aan haar drink

totdat julle genoeg het,

totdat julle veilig voel;

julle sal drink van die oorvloed wat sy het,

en dit geniet.

₁₂So sê die Here:

Ek laat vrede na haar toe aankom soos 'n rivier,

Ek laat die rykdom van die nasies na haar toe stroom.

Julle sal aan haar drink,

aan haar bors gedra word

en op haar skoot getroetel word.

₁₃Soos 'n moeder haar kind laat veilig voel,

so laat Ek julle veilig voel.

Julle sal veilig voel in Jerusalem.

₁₄Julle sal dit beleef en julle sal bly wees;

julle sal nuwe lewe kry soos groen gras wat uitspruit.

So sal die mag van die Here geopenbaar word aan sy dienaars,

en sal Hy sy vyande straf.

₁₅Die Here kom in vuur,

sy strydwaens is soos 'n stormwind.

Hy kom sy toorn koel,

Hy kom die straf voltrek met vuur.

₁₆Die Here kom om al wat leef, te straf

met vuur en swaard,

Hy sal baie laat sterf.

₁₇Die mense wat hulleself wy en reinig

om in 'n optog

na die tuine toe te gaan,

wat varkvleis eet en afskuwelike afgodsoffers en muise,

sal almal uitgeroei word,

sê die Here.

₁₈Ek weet wat hulle doen en dink;

die tyd kom dat Ek al die nasies en al die taalgroepe

bymekaar gaan maak.

Hulle sal kom en hulle sal sien hoe magtig Ek is.

₁₉Ek sal 'n teken onder hulle oprig

en Ek sal van dié van hulle wat die oordeel oorleef het,

uitstuur na ander nasies toe,

na Tarsis, na Pul, na Lud met sy bedrewe boogskutters,

na Tubal, na Griekeland,

en na die ver eilande toe

wat nie van my roem gehoor het nie

en nie my mag ervaar het nie.

So sal dié wat Ek gestuur het,

onder die nasies verkondig

hoe magtig Ek is.

₂₀Hulle sal al julle volksgenote uit al die nasies

as 'n geskenk vir die Here saambring op perde, op waens,

op drastoele, op muile en op kamele.

Hulle sal hulle bring na my heilige berg toe,

na Jerusalem toe, sê die Here.

Hulle sal hulle bring soos die Israeliete die graanoffers

in rein skottels na die huis van die Here toe bring.

₂₁Ek sal van hulle as priesters en Leviete aanstel,

sê die Here.

₂₂Soos die nuwe hemel en die nuwe aarde wat Ek gaan maak,

in my diens sal staan,

sê die Here,

so sal julle nageslag en julle roem in my diens staan.

₂₃Elke nuwemaansfees en elke sabbat sal al wat leef, voor My in aanbidding kom buig,

sê die Here.

₂₄Wanneer hulle uit die stad uitgaan,

sal hulle die lyke sien

van die mense wat hulle teen My verset het.

Die wurms wat aan hulle vreet, sal nie vrek nie,

en die vuur waarin hulle brand, sal nie geblus word nie;

hulle sal iets afgrysliks wees vir al wat leef.

Ek roep na U, Here, kom tog gou na my toe,

luister tog na my, ek roep na U.

₂Mag my gebed voor U wees soos 'n wierookoffer,

die uitstrek van my hande soos 'n graanoffer in die aand.

₃Sit 'n wag voor my mond, Here,

hou tog wag oor wat ek sê.

₄Hou my gedagtes weg van verkeerde dinge,

dat ek nie in sonde verval

saam met manne wat onreg doen nie,

en dat ek nie deelneem aan hulle feeste nie.

₅'n Regverdige kan my in liefde slaan en teregwys,

maar van die goddeloses sal ek nie eens gasvryheid aanvaar nie,

want my gebede is gedurig teen hulle boosheid gerig.

₆As hulle leiers van 'n krans afgegooi word,

sal hulle my hoor sê: “Goed so!”

₇Soos 'n land vol kluite lê as die ploeër dit oopbreek,

so sal hulle bene versprei lê by die bek van die doderyk.

₈Op U, Here my God aan wie ek behoort, is my oë gerig,

by U skuil ek, moenie dat my lewe wegkwyn nie.

₉Beskerm my teen die strik wat hulle vir my gestel het,

teen die valstrikke van dié wat onreg doen.

₁₀Laat die goddeloses gevang word in hulle eie nette,

maar laat my ongedeerd verbykom.

₂Ek roep na die Here om hulp,

ek smeek die Here om genade,

₃ek stort my klag voor Hom uit

en vertel Hom van my nood.

₄Ek het alle moed verloor,

U weet wat ek moes deurmaak.

Op die pad waar ek loop,

het hulle vir my 'n strik gestel.

₅Ek soek hulp, maar niemand wil help nie,

daar is vir my geen vlugkans nie

en niemand gee vir my om nie.

₆Ek roep na U om hulp, Here,

ek sê: “U is my toevlug,

buiten U het ek geen deel in die land van die lewendes nie!

₇Luister tog na my hulpgeroep,

want ek is magteloos.

Red my van my vervolgers,

want hulle is te sterk vir my.

₈Bevry my uit my gevangenskap,

dat ek u Naam kan loof.

Die regverdiges sal dankbaar om my kom staan

wanneer U aan my goed doen.”

₁Die goddelose hardloop weg al jaag niemand hom nie;

die regverdiges het die moed van 'n leeu.

₂As daar opstand is in 'n land, is daar baie wat na mag gryp;

as daar iemand met wysheid en kennis is, bly hy lank aan die bewind.

₃'n Man wat self arm is en arm mense uitbuit,

is soos 'n reën wat alles verspoel,

sodat daar niks te ete oorbly nie.

₄Wie die wet van die Here verontagsaam, praat met lof van goddelose mense;

wie die wet onderhou, beveg hulle.

₅Slegte mense het geen begrip van wat reg is nie;

dié wat na die wil van die Here vra, het 'n goeie begrip van alles.

₆Liewer arm wees en eerbaar lewe

as oneerlik lewe en ryk wees.

₇'n Verstandige seun hou hom aan die wet van die Here;

as die seun maats maak met mense wat vir niks eerbied het nie,

bring hy skande oor sy vader.

₈Wie groot rykdom versamel deur mense uit te buit,

versamel dit vir iemand wat hom oor arm mense sal ontferm.

₉As iemand hom doof hou vir die wet van die Here,

sal die Here 'n afsku hê van so 'n man se gebed.

₁₀Wie eerlike mense mislei sodat hulle die verkeerde pad loop,

sal self in die gat val wat hy gegrawe het;

die opregte sal voorspoed geniet.

₁₁'n Ryk man kan dink hy het die wysheid in pag,

maar 'n arm mens met insig sien deur hom.

₁₂As regverdiges rede tot blydskap het, praat almal met trots daaroor,

as goddelose mense aan die bewind kom, kruip die mense weg.

₁₃Wie sy sonde wegsteek, moet niks goeds te wagte wees nie;

wie sy sonde bely en daarvan afsien, sal genade ontvang.

₁₄Dit gaan goed met 'n mens wat altyd versigtig is;

maar iemand wat moedswillig is, sal ondergaan.

₁₅'n Brullende leeu, 'n beer wat wil rondstorm,

so is 'n goddelose regeerder oor 'n weerlose volk.

₁₆As 'n heerser verstandigheid kortkom,

is daar baie verdrukking;

wie uitbuiting haat, lewe lank.

₁₇'n Man wat moord op sy gewete het,

moet op die vlug bly tot sy dood toe.

Niemand moet hom help nie.

₁₈Wie 'n eerbare lewe lei, sal hulp ontvang;

wie 'n oneerlike lewe lei, sal onverwags tot 'n val kom.

₁₉Wie sy grond bewerk, het volop om te eet;

wie hom besig hou met nuttelose dinge, word brandarm.

₂₀'n Betroubare man is baie voorspoedig;

een wat gou ryk wil word, sal sy straf kry.

₂₁Dit is nie reg dat mense partydig is en sondig nie,

selfs nie ter wille van 'n stukkie kos nie.

₂₂'n Inhalige mens wil gou ryk word;

hy besef nie dat daar vir hom gebrek wag nie.

₂₃Wie iemand teregwys, kry eerder agterna dank

as wat 'n vleier dit kry.

₂₄Wie sy ouers besteel en sê:

“Ek doen niks verkeerds nie,”

is niks anders as 'n rower nie.

₂₅'n Gierige mens veroorsaak rusie;

een wat op die Here vertrou, is voorspoedig.

₂₆Wie op homself vertrou, is 'n dwaas;

wie hom deur wysheid laat lei, is veilig.

₂₇Wie vir 'n arm mens iets oor het, sal self niks kortkom nie,

maar wie anderpad kyk, sal baie verwensings hoor.

₂₈As goddelose mense aan die bewind kom, kruip die mense weg,

as die goddeloses ondergaan, kry die regverdiges die mag.

₁'n Man wat hom bly verset teen teregwysings,

kom skielik tot 'n val en staan nie weer op nie.

₂'n Volk juig as regverdige mense die mag kry;

'n volk sug as 'n goddelose mens regeer.

₃'n Man wat wysheid hoog aanslaan, maak sy vader gelukkig;

een wat hom met prostitute ophou, vermors sy besittings.

₄'n Koning wat reg laat geskied, maak 'n land veilig;

een wat net belastings oplê, ruïneer 'n land.

₅'n Man wat 'n ander vlei,

is besig om hom in 'n strik te laat loop.

₆'n Mens se sonde is sy grootste gevaar.

Iemand wat reg doen, kan vrolik sing.

₇'n Regverdige mens is besorg oor die reg van arm mense,

'n goddelose mens het nie begrip vir dié besorgdheid nie.

₈Ligsinnige mense bring 'n stad in oproer;

wyse mense kalmeer die gemoedere.

₉Wanneer 'n wyse man 'n saak maak teen 'n dwaas,

raak die dwaas opgewonde en beledigend,

en kom daar nie vrede nie.

₁₀Moordenaars haat 'n onskuldige mens;

mense wat reg lewe, probeer sy lewe red.

₁₁'n Dwaas gee vrye teuels aan sy woede;

'n wyse mens kry die dwaas naderhand gekalmeer.

₁₂'n Regeerder wat hom aan leuens steur,

het naderhand net goddeloses in sy diens.

₁₃'n Arm mens en sy verdrukker het een ding gemeenskaplik:

die Here hou hulle altwee in die lewe.

₁₄As 'n koning reg aan arm mense laat geskied,

sal hy lank regeer.

₁₅'n Pak slae en 'n teregwysing bring wysheid;

'n kind wat sonder dissipline grootword, steek sy moeder in die skande.

₁₆As goddelose mense regeer, regeer die sonde ook,

maar die mense wat die wil van die Here doen,

sal sien hoe die goddeloses ondergaan.

₁₇Gee jou seun 'n goeie opvoeding

en jy sal gerus wees oor hom;

hy sal jou baie vreugde verskaf.

₁₈Waar die wil van die Here nie bekend gemaak word nie, verwilder 'n volk;

dit gaan goed met elkeen wat die wet van die Here onderhou.

₁₉Met woorde alleen laat 'n slaaf hom nie waarsku nie;

hy verstaan wat jy sê, maar hy reageer nie.

₂₀Jy sien self: vir die man wat praat sonder om eers te dink,

is daar minder hoop as vir 'n dwaas.

₂₁As jy 'n slaaf van kleins af bederf,

is hy rebels as hy groot is.

₂₂'n Opvlieënde mens veroorsaak rusie;

iemand wat kort van draad is, doen sonde op sonde.

₂₃Hoogmoed bring 'n mens tot 'n val;

nederigheid bring eer.

₂₄Iemand wat gesteelde goed ontvang, gee nie om vir sy lewe nie;

hy weet die vloek sal hom tref, maar hy wil nie praat nie.

₂₅As jy vir mense bang is, kan jy in 'n strik beland,

maar as jy jou vertroue in die Here stel, is jy veilig.

₂₆Almal soek die guns van die regeerder,

maar dit is die Here wat aan 'n mens reg laat geskied.

₂₇Mense wat die wil van die Here doen, het 'n afsku in iemand wat onwys optree;

'n goddelose mens het 'n afsku in dié wat reg lewe.