Mense betrokke by die geboorte van Jesus – Dag 8

Alhoewel die sinoptiese Evangelies (Matteus, Markus en Lukas) baie dieselfde gebeure en verhale in Jesus se lewe bevat, het elke skrywer tog sy eie temas en skryfstyl. Een van Lukas se uitstaande kenmerke is die prominente plek wat hy aan vroue in sy Evangelie gee.

Een van hulle is Anna — een van die min mense wat Jesus as die Messias herken het toe sy ouers Hom as baba na die tempel geneem het. Anna was nie soos die meeste vroue van haar tyd nie. Na haar man se dood, sou mense haar aangemoedig het om weer te trou en kinders te hê. Anna het egter gekies om te vas en te bid en God dag en nag te dien.

Wat het haar gemotiveer om so ʼn lewe te lei?

Anna was ʼn vrou met hoop. Sy het nie een oomblik getwyfel dat God sy beloftes sou nakom nie. Gevul met die Heilige Gees, was sy daagliks in die huis van die Here waar sy Hom deur gebed gedien het en met mense gepraat het oor die Here se belofte dat Hy ʼn Verlosser sou stuur.

Ons word almal ouer, en as ons ons hoop op wêreldse goed vestig, kan die teleurstellings van die lewe ons maklik siniese mense sonder hoop maak. Anna se hoop in God en die wete dat Hy sy beloftes sou nakom, het soos sy ouer geword het, net sterker gegroei. Sy het nooit opgehou om God in geloof te dien en met hoop te bid nie.

Waarvoor hoop jy? Die hoop wat God in ons harte plaas, is ʼn begeerte na die koninkryk van die Hemel en na die ewige lewe wat volkome geluk sal bring. Hoop groei deur gebed en volharding.