Mense betrokke by die geboorte van Jesus – Dag 5

Ons is geneig om baie meer oor Maria as oor Josef te praat. Hy is, na alles, nie Jesus se biologiese pa nie, en daarom dink ons partykeer aan hom bloot as die man wat seker gemaak het hulle het ʼn veilige reis na Betlehem.

Matteus se weergawe van die geboorte sluit ʼn deel in wat ons ʼn kykie gee op hoe Josef miskien daardie eerste Kersfees ervaar het. Ons het hier te make met ʼn man wie se verloofde hom vertel het dat sy swanger is. Verder vertel sy Hom dat die swangerskap van die Heilige Gees kom. Die mense van die eerste-eeuse Palestina het net so goed soos ons geweet hoe babas gemaak word, en Josef het nie haar storie geglo nie. Sou jy haar geglo het?

Ek stel my voor hoe Josef in die nag wakker lê, sy hart is gebreek, hy is kwaad en probeer om sy opsies te oorweeg. Alles in ag geneem, het Josef alle reg gehad om van haar te skei. Die Joodse owerhede kon haar gestenig het (Deuteronomium 22:23-24). Josef moes Maria baie liefgehad het, want hy besluit om die verlowing stilweg te verbreek sodat sy nie in die skande gesteek word nie.

Maar dan verskyn God op die toneel. Toe ʼn engel van die Here in ʼn droom aan Josef verskyn en aan hom vertel wie Jesus is, twyfel hy nie een oomblik nie; hy verander sy plan en trou met Maria (Matteus 1:21). Maria het met sekerheid geweet, maar Josef het met slegs die droom en Maria se woord, die onmoontlike geglo.

Josef leer ons om vas te staan wanneer dinge moeilik raak en om in geloof gehoorsaam te wees selfs wanneer ons nie verstaan nie. Hy wys ons dat ons in geloof moet voortgaan selfs wanneer dit makliker sal wees om ons eie kop te volg.