Is jy dankbaar? – Dag 17

Dink vir ʼn oomblik aan iemand in jou lewe wat die wêreld vir jou moeilik maak. Is dit jou huweliksmaat? ʼn Knorrige kollega of bestuurder by die werk? ʼn Kritiese skoonma? ʼn Boukontrakteur wat nie by sy beloftes gehou het nie? Jou rebelse tiener? Of dalk die stadige of onverantwoordelike motoris wat vanoggend op pad werk toe voor jou ingesny het? Hoe hanteer jy hierdie moeilike mense wat ongemaklike situasies in jou lewe veroorsaak? Verwens jy hulle of dank jy God vir hulle?

Om dankbaar te wees vir die bogenoemde groep mense klink amper onmoontlik en ongehoord. Tog, besef jy dat hierdie groep mense ʼn belangrike rol in jou lewe speel? Hier volg twee moontlike redes:

Rede 1: Moeilike mense of situasies openbaar wat in jou hart aangaan

In Psalm 139:23-24 bid die psalmdigter: “Deurgrond my, o God, en ken my hart; toets my en ken my gedagtes … en lei my op die ewige weg!” Hoekom is dit vir hom belangrik dat God aan hom moet uitwys wat in sy hart aangaan? Ons kry ʼn antwoord hierop in Psalm 24:3-4: “Wie mag klim op die berg van die HERE? En wie mag staan in sy heilige plek? Hy wat rein van hande en suiwer van hart is …” God is heilig en hoe nader ons aan Hom beweeg, hoe groter word ons behoefte om soos Hy te word. Ongemaklike situasies en moeilike mense help ons om te identifiseer wat ons in ons lewens moet aanpas terwyl die Heilige Gees ons in staat stel om dit te doen.

Rede 2: Moeilike mense of situasies vorm ons karakter

Ons karakter is vir God belangriker as ons gerief. Moeilike tye en mense help ons groei, dit verander ons perspektief op die lewe en die belangrikste punt – dit hou ons afhanklik van God. Dit is dus te verstane dat ons in Romeine 5:3-5 lees: “Ons verheug ons ook in die swaarkry, want ons weet: swaarkry kweek volharding, en volharding kweek egtheid van geloof, en egtheid van geloof kweek hoop; en dié hoop beskaam nie …”

Ek vra jou weer, wie maak die lewe vir jou ongemaklik? Onthou, die stadige of onverantwoordelike bestuurder in die verkeer openbaar dalk aan ons ons ongeduld en onnodige woede in ons harte. Die knorrige kollega of baas in die werkplek help ons om te onthou dat ons moet werk asof ons vir God werk en nie vir mense nie, en hulle help ons terselfdertyd om ons selfbeheersing te verbeter. Ons rebelse tiener, kritiese skoonma of moeilike huweliksmaat bring ons weer op ons knieë waar ons ons afhanklikheid van God beleef – en ook sy krag wanneer Hy verandering teweegbring.

Kom ons dank God vir moeilike mense en omstandighede. Hy is dalk besig om ons karakter te vorm en te slyp soos diamante sodat ons lig voor die mense om ons kan skyn. Sterkte.