Bible Society of South Africa
Leesplanne
Dagboek 2021
Dagboek 2021 – 6 November

Dagboek 2021 – 6 November

Ons bly hoop

Bybelteks(te)

ROMEINE 8

Die heerlikheid wat kom

18Ek is daarvan oortuig dat die lyding wat ons nou moet verduur, nie opweeg teen die heerlikheid wat God vir ons in die toekoms sal laat aanbreek nie. 19Die skepping sien met gespanne verwagting daarna uit dat God bekend sal maak wie sy kinders is. 20Die skepping is immers nog aan verydeling onderworpe, nie uit eie keuse nie, maar omdat God dit daaraan onderwerp het. Daarby het Hy die belofte van hoop gegee: 21die skepping sal self ook bevry word van sy verslawing aan die verganklikheid, om so tot die vryheid te kom van die heerlikheid waaraan die kinders van God deel sal hê. 22Ons weet dat die hele skepping tot nou toe sug in die pyne van verwagting. 23En nie net die skepping nie, maar ook ons wat die Gees ontvang het as die eerste gawe van God, ons sug ook. Ons sien daarna uit dat God sal bekend maak dat Hy ons as sy kinders aangeneem het: Hy sal ons van die verganklikheid bevry. 24Ons is immers gered, en ons het nou hierdie hoop. Wat 'n mens al sien, hoop jy tog nie meer nie. Wie hoop nog op wat hy reeds sien? 25Maar as ons hoop op wat ons nie sien nie, wag ons daarop met volharding.

26Die Gees staan ons ook in ons swakheid by: ons weet nie wat en hoe ons behoort te bid nie, maar die Gees self pleit vir ons met versugtinge wat nie met woorde gesê word nie. 27En God, wat die harte deurgrond, weet wat die bedoeling van die Gees is, want Hy pleit, volgens die wil van God, vir die gelowiges. 28Ons weet dat God alles ten goede laat meewerk vir dié wat Hom liefhet, dié wat volgens sy besluit geroep is. 29Dié wat Hy lank tevore verkies het, het Hy ook bestem om gelykvormig te wees aan die beeld van sy Seun, sodat sy Seun baie broers kan hê van wie Hy die Eerste is. 30Dié wat Hy daartoe bestem het, het Hy ook geroep. En dié wat Hy geroep het, het Hy ook vrygespreek. En dié wat Hy vrygespreek het, het Hy ook verheerlik.

ROMEINE 8:18-30AFR83Maak oop in die Bybelleser

Paulus begin hierdie gedeelte deur twee sake met mekaar te vergelyk. Enersyds die lyding van nou. Dit is die lewe met sy swaarkry van die huidige tyd, die tyd wat eindig met Christus se tweede koms. Die apostel dink aan alle swaarkry van die huidige tyd, die tyd wat eindig met Christus se tweede koms. In die wêreld beleef ons pyn, siekte, teleurstelling, werkloosheid, armoede, hartseer, noem dit op. Teenoor hierdie lewe in die huidige tydsgewrig, hierdie lewe in ’n stukkende wêreld, stel hy dan die lewe wat God vir sy kinders in die toekoms belowe. Dit is ’n lewe in onbeskryflike heerlikheid. Hierdie toekomstige heerlikheid word nie net aan ons geopenbaar nie, maar deur die kragtige werking van die Heilige Gees in ons geopenbaar. Dit is so ’n oorweldigende heerlikheid dat die skepping, die mens en die Gees in groot afwagting sug.

Die hele skepping sug in pyne van verwagting. Die sonde van die mens laat die ganse skepping stukkend en verganklik. God se reddende genade werk so kragtig, dat die skepping tot sy aanvanklike glorie herstel sal word. Ook die mens verlang na hierdie volmaaktheid. Ons kan nie wag om die allesoortreffende heerlikheid te ontvang nie.

Terwyl ons hierdie lyding verduur, bly ons hoop. Ons hoop op ’n heerlike lewe met God. Eendag sal ons heeltemal van sonde bevry wees, heeltemal verander word, sodat ons aan Jesus Christus self gelykvormig kan wees. Op daardie dag en daardie verandering bly ons hoop. Ons Christelike hoop is ’n anker vir ons siel, veilig en seker. Ons hoop is gevestig op Jesus, ons voorganger wat reeds deur die hemele gegaan het. Geloof en hoop loop hand aan hand. Ons glo in Jesus Christus, in sy kruis en opstanding en die redding wat dit vir ons bring. Ons glo ook dat Christus ons lewende hoop is. Hy het immers ons plek gaan voorberei. Christus is ons waarborg dat daar vir ons ’n onuitspreeklike en heerlike toekoms wag. Daarom bly ons hoop.

Ds Willem Kok, Potchefstroom

Bible Society of South Africav.4.26.9
VOLG ONS