Dagboek 2021 – 27 September

₂Hy het gesê:

Ek het U baie lief, Here, my Sterkte.

₃Die Here is my rots, my skuilplek en my redder,

my God, my rots, by wie ek skuil,

my skild en sterk verlosser, my veilige vesting.

₄Onder bespotting roep ek na die Here,

dan word ek van my vyande verlos.

₅Bande van die dood het my omsluit,

strome van onheil het my verskrik.

₆Bande van die doderyk het my vasgetrek,

strikke van die dood het my bedreig.

₇In my nood roep ek na die Here,

ja, ek roep om hulp na my God.

In sy paleis hoor Hy my geroep.

Ek roep na Hom om hulp, en Hy luister na my.

₈Die aarde het geskud en gebewe,

die fondamente van die berge het getril en geskud,

want Hy was vertoorn.

₉Rook het uit sy neus getrek,

vuur uit sy mond het alles verteer,

gloeiende kole uit sy binneste.

₁₀Hy het die hemel afgebuig en afgekom,

onder sy voete was duisternis.

₁₁Hy het op 'n gerub geklim en gevlieg;

op die vleuels van die wind het Hy nadergesweef.

₁₂Hy het Hom in donkerte gehul,

donker waters en wolkemassas was sy bedekking.

₁₃Uit die gloed voor Hom het wolke getrek,

hael en weerligstrale.

₁₄Die Here het dit uit die hemel laat dreun,

die Allerhoogste het sy stem laat hoor

in hael en weerligstrale.

₁₅Hy het sy pyle afgeskiet

en die vyand uitmekaar gejaag,

hulle met 'n menigte weerligstrale op loop gejaag.

₁₆Die seebodem het sigbaar geword,

die fondamente van die aarde is blootgelê

deurdat U, Here, op hulle gebulder het met die orkaan van u toorn.

₁₇Van bo af het Hy sy hand uitgestrek en my gegryp,

my uit geweldige waters uitgelig.

₁₈Hy het my gered van my vyand wat sterk was,

van my haters toe hulle vir my te magtig was.

₁₉Die dag toe hulle my aangeval het,

was my ondergang naby,

maar die Here het my daarvan bewaar.

₂₀Hy het my in vryheid laat uitgaan,

my gered omdat Hy my liefhet.

₂₁Die Here het aan my reg laat geskied,

Hy het my onskuld aanvaar,

₂₂want ek het die wil van die Here gehoorsaam

en my nie teenoor my God skuldig gemaak nie;

₂₃ek het my deur al sy bepalings laat lei en nie van sy voorskrifte afgewyk nie.

₂₄Ek was opreg voor Hom,

ek was op my hoede teen enige ongeregtigheid.

₂₅Die Here het aan my reg laat geskied,

want ek was onskuldig in sy oë.

₂₆U betoon U getrou teenoor die getroue,

opreg teenoor die opregte,

₂₇rein teenoor die reine,

maar U verwerp die huigelaar.

₂₈U red die verdrukte volk,

U verneder die trotses.

₂₉U, Here, laat my lamp helder skyn;

my God gee lig as dit donker is om my.

₃₀Met u hulp loop ek 'n oormag storm,

met my God by my is geen stadsmuur vir my te hoog nie.

₃₁Wat God doen, is volmaak;

wat die Here sê, is suiwer.

Elkeen wat by Hom skuiling soek, beskerm Hy.

₃₂Waarlik, wie anders as die Here is God?

Ja, wie anders as ons God is 'n rots?

₃₃God omgord my met krag;

Hy maak my pad voorspoedig.

₃₄Hy maak my voete soos dié van 'n ribbok;

op hoë plekke laat Hy my stewig staan.