Bible Society of South Africa
Leesplanne
Dagboek 2021
Dagboek 2021 – 25 Julie

Dagboek 2021 – 25 Julie

Die Heilige Gees is God

Bybelteks(te)

1 KONINGS 8

Die ark word in die tempel gesit

1Daarna het Salomo die leiers van Israel, al die stamhoofde en die Israelitiese familiehoofde, by hom in Jerusalem bymekaargeroep om die verbondsark van die Here uit die Dawidstad, Sion, te laat uitbring. 2Al die manne van Israel het op die feesdag in die maand Etanim, die sewende maand, by koning Salomo vergader. 3Nadat al die leiers van Israel gekom het, het die priesters die ark opgetel 4en die ark, die tent van ontmoeting en al die toebehore van die heiligdom wat in die tent was, gedra. Die priesters en die Leviete het dit gedra. 5Koning Salomo en die hele gemeente van Israel wat saam met hom voor die ark was, het soveel kleinvee en beeste geoffer dat dit nie getel of bereken kon word nie. 6Toe het die priesters die verbondsark van die Here na sy plek toe gebring onder die vlerke van die gerubs in die binneste heiligdom van die tempel, dit is die Allerheiligste. 7Die gerubs se vlerke was oopgesprei oor die staanplek van die ark. Hulle het die ark en sy draaghoute aan die bokant bedek. 8Die draaghoute was so lank dat hulle punte gesien kon word van die voorkant van die binneste heiligdom af, maar hulle kon nie van buite af gesien word nie. Hulle is vandag nog daar. 9Daar was niks in die ark nie behalwe die twee plat klippe wat Moses by Horeb daarin gesit het toe die Here by die uittog van die Israeliete uit Egipte met hulle 'n verbond gesluit het.

10Toe die priesters uit die heiligdom kom, het 'n wolk die huis van die Here gevul.

1 KONINGS 8:1-10AFR83Maak oop in die Bybelleser

Waar woon God? Kan God ingehok word? Kan God vrygelaat word? Kan God in ’n boks rondgedra word? Israel het gereken dat God se teenwoordigheid deur die verbondsark verseker word. Waar die ark is, daar is God. Binne-in die ark was die twee kliptafels met die gebooie van God daarop geskryf (vers 9). Die twee figure van engele op die deksel van die verbondsark het wakend wag gehou oor die heiligheid van die ark. Die ruimte tussen die vlerke van die twee gerubs is beskou as God se troon. Met groot fanfare word die ark gebring na die nuwe tempel wat Salomo vir God in Jerusalem gebou het. Die grootse geleentheid word gekenmerk deur feesviering en buitengewone hoeveelhede diere wat geoffer word. Buitengewone aksies wat pas by die buiten-die-gewone heiligheid van God. Die ark dien as simbool van God se teenwoordigheid. Die tempel dien as simbool van die woonplek van God by sy volk. En wanneer die ark rusplek in die allerheiligste deel van die tempel vind, dan het God tuisgekom, of hoe?

Kan dit wees dat ’n almagtige God gekarwei word in ’n elegante houtkis soos die verbondsark en te ruste gebring word in ’n glansryke aardse woning? Is God dan so mobiel dat Hy met ’n handvatsel opgetel en verskuif kan word na mense se willekeur?

Die ironie, en tot skok van die volk Israel, is dat wanneer die ark in die allerheilige geplaas word, ’n wolk die huis van God vul (vers 10). Iets so vloeibaar, onaantasbaar en onopsluitbaar soos ’n wolk. God vertoon Homself as die misterie wat nóg deur menslike handewerk nóg deur menslike gedagtes vasgevang kan word. God is die Gans-Andere en Onbeskryflike. Wie dink dat hulle God onder die knie kry deur Hom in menslike konstruksies te wil vasvang, staan telkens verwonderd oor die onbeskryflike omvangrykheid van God.

Dalk is die Gees van God soos ’n wolk, dit beweeg waar en wanneer dit wil. Dit werk terselfdertyd sigbaar en onsigbaar. Wie dink dat hulle God volledig ken en verstaan, moet na die wolke kyk.

Prof Jaco Beyers, Universiteit van Pretoria/Centurion-Oos

Bible Society of South Africav.4.26.9
VOLG ONS