Bible Society of South Africa
Leesplanne
Dagboek 2021
Dagboek 2021 – 14 Augustus

Dagboek 2021 – 14 Augustus

Twee kragte

Bybelteks(te)

HANDELINGE 12

Jakobus word doodgemaak en Petrus gevange geneem

1In dié tyd het koning Herodes party van die gemeentelede laat vang en hulle mishandel. 2Hy het vir Jakobus die broer van Johannes met die swaard laat doodmaak.

3Toe Herodes sien dat dit by die Jode byval vind, het hy nog verder gegaan en ook vir Petrus gevange laat neem. Dit het tydens die fees van die ongesuurde brood gebeur. 4Nadat Herodes vir Petrus laat vang het, het hy hom in die tronk gesit en hom deur vier afdelings van vier soldate elk laat bewaak. Herodes wou hom ná die paasfees voor die volk bring. 5So is hy dan in die tronk bewaak, maar die gemeente het aanhoudend vir hom tot God gebid.

Petrus word uit die tronk bevry

6Die nag voordat Herodes hom voor die volk sou bring, het Petrus tussen twee soldate geslaap. Hy was met twee kettings geboei, en voor die deur het wagte die tronk bewaak.

7Meteens staan daar 'n engel van die Here en skyn daar 'n lig in die sel. Die engel vat toe aan Petrus se sy om hom wakker te maak en sê vir hom: “Staan gou op.”

Onmiddellik het die boeie van sy hande afgeval. 8Toe sê die engel vir hom: “Maak jou gordel vas en trek jou skoene aan.”

Petrus het dit gedoen, en toe sê die engel vir hom: “Trek jou bokleed aan en kom saam met my.”

9Petrus het agter die engel aan uitgegaan sonder om te besef dat hy werklik bevry word. Vir hom het dit gelyk asof hy 'n gesig sien. 10Hulle is by die eerste wag verby en ook by die tweede, en toe hulle by die ysterdeur kom wat na die stad toe lei, het dit vanself vir hulle oopgegaan. Toe hulle buite kom en 'n ent met die straat af was, het die engel vir Petrus skielik verlaat. 11Toe dring dit tot Petrus deur wat met hom gebeur het en hy dink: nou besef ek eers regtig dat die Here sy engel gestuur het om my uit die hande van Herodes te red en van alles wat die Joodse volk van plan was om te doen.

HANDELINGE 12:1-11AFR83Maak oop in die Bybelleser

Twee kragte is aan die werk. Die krag van boosheid – Petrus is in die tronk en vrees vir sy lewe. Die krag van gebed – gelowiges bly vashou aan God se goedheid. Die Christene se lewe was moeilik. Één magtige man doen wat vir homself goed en reg is. Om die Jode se guns te wen, val die koning die Christene aan. Die goeie is óók aan die werk. Gelowiges doen God se werk. Ten spyte van gevaar, bring hulle die boodskap van hoop met geloof en moed. God beskerm hulle en seën die werk. Die nuus van die goeie werk kom by Jerusalem uit en die moederkerk bied hulp aan. Die moederkerk in Jerusalem is weer arm en daar is hongersnood. Die dogterkerk help, want Antiogië was ’n ryk stad.

Twee kragte is aan die werk: boosheid en goedheid. So was dit altyd, so is dit steeds. In ons wêreld sien ons wreedheid, selfsug, eiebelang en eiegeregtigheid. Daar is egter ook goedheid, deernis en liefde aan die werk. In onsself werk twee kragte. Ons het almal ’n donker kant, sê Jung, die psigoloog. Die self, eie belang en die eie oorlewing is belangrik bo alles, maar ons het ook die wil om goed te wees, menslik, medemenslik. Aan die groot kragte kan ons nie veel doen nie. Oor die kragte in ons, het ons ’n keuse: óf eiebelang, óf God se werk. Goeie werk dra vrug, maar ’n selfgerigte lewe is vrugteloos. Goeie werk kring uit, is aansteeklik, inspireer, het effek.

Albei kragte is aan die werk. Wie die krag van die goeie kies, hoef nie slagoffer te word van negatiewe reaksies, maniere van dink en doen nie, maar kan aktief help bou aan die groot netwerk van positiewe krag en sonder ophou bly bid. As ons in ons wêreld, soms ook in onsself, dinge sien wat ons moedeloos maak, is dit maar één van die kragte aan die werk. Die ander krag is altyd óók daar.

Kies die goeie werk van hoop en vrede vir almal.

Prof Yolanda Dreyer, Universiteit van Pretoria / Nederlandssprekende Gemeente

Bible Society of South Africav.4.26.9
VOLG ONS