Bible Society of South Africa
Leesplanne
Dagboek 2021
Dagboek 2021 – 12 Desember

Dagboek 2021 – 12 Desember

Die Kind van Betlehem is die brood uit die hemel

Bybelteks(te)

JOHANNES 6

Die vermeerdering van die brood

1Hierna het Jesus na die oorkant van die See van Galilea toe gegaan, wat ook die See van Tiberias genoem word. 2'n Groot klomp mense het agter Hom aan gekom omdat hulle die wondertekens gesien het wat Hy aan die siekes gedoen het. 3Jesus het toe teen die berg opgegaan en met sy dissipels daar gaan sit.

4Die paasfees van die Jode was naby.

5Toe Jesus rondkyk en sien dat 'n groot klomp mense na Hom toe aankom, sê Hy vir Filippus: “Waar kan ons brood gaan koop sodat die mense kan eet?”

6Dit het Hy net gesê om hom op die proef te stel, want Hy het self goed geweet wat Hy gaan doen.

7Filippus antwoord Hom toe: “Twee honderd mense se dagloon is nie eers genoeg om elkeen van hulle 'n stukkie brood te laat kry nie.”

8'n Ander dissipel, Andreas, die broer van Simon Petrus, sê toe vir Hom: 9“Hier is 'n seuntjie met vyf garsbrode en twee vissies; maar wat is dit vir so baie mense?”

10Toe sê Jesus: “Laat die mense gaan sit.”

Daar was baie gras op daardie plek en die mense het gaan sit. Die mans alleen was omtrent vyf duisend. 11Daarna het Jesus die brood geneem, God daarvoor gedank en dit uitgedeel aan die mense wat daar gesit het, en net so ook soveel van die vis as wat hulle wou hê.

12Nadat die mense versadig was, sê Hy vir sy dissipels: “Maak die stukke bymekaar wat oorgebly het sodat daar niks verlore gaan nie.”

13Hulle het dit toe bymekaargemaak. Daar was twaalf mandjies vol met die stukke wat van die vyf garsbrode oorgebly het nadat die mense klaar geëet het.

14Toe die mense die wonderteken sien wat Jesus gedoen het, het hulle gesê: “Hy is werklik die Profeet, die Een wat na die wêreld toe moes kom.”

15Toe Jesus merk dat hulle Hom met geweld wil kom koning maak, het Hy verder die berg op gegaan, Hy alleen.

JOHANNES 6:1-15AFR83Maak oop in die Bybelleser

Vyf brode en twee vissies is nie naastenby genoeg vir vyf duisend mense nie. Maar in Jesus se teenwoordigheid is daar altyd oorvloed – méér as genoeg vir elkeen. Hierdie wonder illustreer simbolies die betekenis van sy lewe en sterwe. Daar is ’n duidelike verband tussen die gewone brood wat Hy so mildelik aan die skare uitdeel en die uiteindelike opoffering van sy eie liggaam aan die kruis.

Soos wat Hy hierdie groot skare met verganklike brood voed, só is Hyself die brood wat aan mense die ware geestelike lewe gee. Die groot skare het niks hiervan gesnap nie. Hulle het slegs die brood raakgesien wat hul mae vol gemaak het. Daarom is hulle die volgende dag terug by Jesus, want hulle sien Hom as ’n gratis broodverskaffer.

Jesus se wonderdade is gewoonlik tekens wat op God se genade wys. In hierdie geval, die ware brood uit die hemel wat God aan die ganse mensdom skenk. Jesus is die brood wat lewe gee, die Een wat ons diepste honger en dors kom stil.

Dit is die wese, die essensie van ons Christelike geloof – ons het Hom persoonlik nodig. Sonder Hom bly ons soekers wat nooit vind nie, bly ons hart onrustig totdat dit rus vind in Hom. Partykeer maak ons ook soos die skare: Ons sien Jesus as ’n goeie kontak, ’n gratis broodverskaffer. En dan gebruik ons Nagmaal en dink die tekens van brood en wyn moet asof outomaties die heil bewerk.

Om in Christus te glo, beteken om sy liggaam te eet en sy bloed te drink – ’n persoonlike toe-eiening! Geloof in Christus is ’n intieme, persoonlike verbondenheid met Hom, net soos die brood en wyn deel van jou word. Vanuit hierdie geloof volg die bereidheid om vanuit sy versoening te gaan leef – versoen met God en jou naaste. Om nie langer in vyandskap met enigeen te lewe nie. Vir dié wat glo, is dit die enigste lewensmoontlikheid.

Gesang 299: 1; Gesang 568: 3

Ds Petri de Kock, Pierneef

Bible Society of South Africav.4.26.9
VOLG ONS