Bible Society of South Africa
Leesplanne
Dagboek 2021
Dagboek 2021 – 10 September

Dagboek 2021 – 10 September

Die ewige wingerd

Bybelteks(te)

JESAJA 5

Wat kan Ek nog vir my wingerd doen?

1Ek wil sing oor Hom wat ek liefhet,

ek wil my liefdeslied sing oor sy wingerd:

Hy wat ek liefhet, besit 'n wingerd op 'n vrugbare heuwel.

2Hy het die grond omgespit en die klippe verwyder,

dit beplant met veredelde wingerdstokke.

Hy het 'n wagtoring daarin gebou

en 'n parskuip uitgekap.

Hy het verwag dat dit goeie druiwe sou dra,

maar toe bring dit druiwe voort wat suur bly.

3En nou, inwoners van Jerusalem en manne van Juda,

beslis tog tussen My en my wingerd.

4Wat kan Ek nog vir my wingerd doen

wat Ek nie reeds gedoen het nie?

Wat is dan die rede dat dit suur druiwe voortgebring het

terwyl Ek verwag het dat dit goeie druiwe sou dra?

5Ek maak julle nou bekend wat Ek met my wingerd gaan doen:

Ek gaan die doringheining verwyder en verbrand,

sy muur afbreek, sodat die wingerd vertrap kan word.

6Ek gaan hom tot niet maak.

Hy sal nie meer gesnoei of geskoffel word nie,

maar ingeneem word deur doringbosse en onkruid.

Ek sal die wolke verbied om daarop te reën.

7Die wingerd van die Here die Almagtige,

die wingerd wat Hy geplant het en waarin Hy Hom wou verlustig,

is die Israeliete, die volk van Juda.

Die Here het verwag dat daar reg sou wees,

maar daar was net onreg,

dat daar geregtigheid sou wees,

maar daar was net die hulpgeroep van veronregtes.

JESAJA 5:1-7AFR83Maak oop in die Bybelleser

LUKAS 20

Die gelykenis van die boere en die wingerd

9Verder het Jesus aan die volk hierdie gelykenis vertel: “Daar was 'n man wat 'n wingerd aangeplant en dit aan boere verhuur het. Daarna was hy 'n hele ruk weg van die huis af. 10Toe dit tyd was daarvoor, stuur hy 'n slaaf na die boere toe om sy deel van die wingerd se opbrengs te gaan haal. Maar die boere het die slaaf geslaan en met leë hande weggejaag. 11Die eienaar het weer geprobeer en 'n ander slaaf gestuur. Maar hulle het hierdie een ook geslaan en uitgeskel en met leë hande weggejaag. 12Die eienaar het nog 'n keer geprobeer en 'n derde slaaf gestuur. Hulle het hom geslaan dat die bloed loop, en hom uit die wingerd uitgegooi.

13“Toe sê die eienaar van die wingerd: ‘Wat moet ek nou doen? Ek sal my geliefde seun stuur. Miskien sal hulle hom ontsien.’ 14Maar toe die boere hom sien, het hulle onder mekaar geredeneer: ‘Dit is die erfgenaam dié. Kom ons slaan hom dood, dan is die erfenis ons s'n.’ 15Toe gooi hulle hom uit die wingerd uit en slaan hom dood. Wat sal die eienaar van die wingerd dan met hulle doen? 16Hy sal kom en daardie boere om die lewe bring en die wingerd vir ander mense gee.”

Dié wat dit gehoor het, sê toe: “Nee, dit moenie gebeur nie!”

17Maar Jesus het hulle aangekyk en gesê: “Wat beteken hierdie Skrifwoord dan:

“ ‘Die klip wat deur die bouers afgekeur is,

juis hy het die belangrikste klip in die gebou geword’?

18Elkeen wat op hierdie klip val, sal verpletter word;

elkeen op wie hy val, sal hy vermorsel.”

19Die skrifgeleerdes en die priesterhoofde het besef dat Jesus met hierdie gelykenis op hulle gesinspeel het. Daarom wou hulle Hom sommer daar en dan gevange neem, maar hulle was bang vir die volk.

LUKAS 20:9-19AFR83Maak oop in die Bybelleser

In die koninkryk van God sal dit nooit met enige iemand heeltemal so goed gaan as met die magtige mense in aardse koninkryke nie. Die vorm wat voorspoed van die magtiges in aardse koninkryke aanneem, kan immers nie sonder onreg en die hulpgeroep van verontregtes bestaan nie. Dit maak aanspraak op oorvloed te midde van skaarste. Dit dring aan op meer as wat nodig is, selfs ten koste van wat nodig is in ander se lewens. Dit vereis die demonisering van magtelose mense sodat magtiger mense hul weerhouding van liefde kan regverdig. Goed wat nie in God se koninkryk beoefen word nie.

En wanneer ons die teiken van onreg word, wanneer die hulpgeroep van verontregtes uit ons geledere begin opklink, soos onder die Judeërs van Jesus se tyd, is die antwoord vir seker nie dieselfde onreg waaroor ons roep nie (naamlik geweld, haat en skeiding). Die antwoord is die koninkryk van God, wat deur genade as wingerd geplant is in elkeen van ons se eie lewens, afgesien van wie regeer of die onreg wat ons moet verduur. Die leringe van Christus is as wagtoring en doringheining opgerig om daardie wingerd te bewaar, sodat dit goeie druiwe volgens daardie leringe kan voortbring. Sodat God die omstandighede waaroor ons roep, met daardie oes kan verander.

Dis die wingerd wat sal vrug dra vir sy koninkryk. Óf in ons eie leeftyd indien ons afstand kan doen van die menslike skeidings wat ons as klipmure vir sy wingerd probeer vestig, óf ná ons leeftyd wanneer daardie skeidings saam met ons gesterf en vergete geraak het. Soos die skeidings tussen Judeër en Samaritaan. Soos die skeidings tussen Griek en Jood. Soos die skeidings tussen Romein en watter etnisiteit ook al wat destyds so belangrik was dat die hoeksteen daarvoor afgekeur is, terwyl dit nou nie eens onthou word nie. Maar Christus as voorbeeld van God se regering in ons lewens, is ewig. Dit is ’n hoeksteen wat bly staan millennia nadat die klipmure omgeval het.

Ds Gerrit-Daan van der Merwe, Strand

Bible Society of South Africav.4.26.9
VOLG ONS