Bybelleesrooster – Dag 142

₁'n Man wat hom bly verset teen teregwysings,

kom skielik tot 'n val en staan nie weer op nie.

₂'n Volk juig as regverdige mense die mag kry;

'n volk sug as 'n goddelose mens regeer.

₃'n Man wat wysheid hoog aanslaan, maak sy vader gelukkig;

een wat hom met prostitute ophou, vermors sy besittings.

₄'n Koning wat reg laat geskied, maak 'n land veilig;

een wat net belastings oplê, ruïneer 'n land.

₅'n Man wat 'n ander vlei,

is besig om hom in 'n strik te laat loop.

₆'n Mens se sonde is sy grootste gevaar.

Iemand wat reg doen, kan vrolik sing.

₇'n Regverdige mens is besorg oor die reg van arm mense,

'n goddelose mens het nie begrip vir dié besorgdheid nie.

₈Ligsinnige mense bring 'n stad in oproer;

wyse mense kalmeer die gemoedere.

₉Wanneer 'n wyse man 'n saak maak teen 'n dwaas,

raak die dwaas opgewonde en beledigend,

en kom daar nie vrede nie.

₁₀Moordenaars haat 'n onskuldige mens;

mense wat reg lewe, probeer sy lewe red.

₁₁'n Dwaas gee vrye teuels aan sy woede;

'n wyse mens kry die dwaas naderhand gekalmeer.

₁₂'n Regeerder wat hom aan leuens steur,

het naderhand net goddeloses in sy diens.

₁₃'n Arm mens en sy verdrukker het een ding gemeenskaplik:

die Here hou hulle altwee in die lewe.

₁₄As 'n koning reg aan arm mense laat geskied,

sal hy lank regeer.

₁₅'n Pak slae en 'n teregwysing bring wysheid;

'n kind wat sonder dissipline grootword, steek sy moeder in die skande.

₁₆As goddelose mense regeer, regeer die sonde ook,

maar die mense wat die wil van die Here doen,

sal sien hoe die goddeloses ondergaan.

₁₇Gee jou seun 'n goeie opvoeding

en jy sal gerus wees oor hom;

hy sal jou baie vreugde verskaf.

₁₈Waar die wil van die Here nie bekend gemaak word nie, verwilder 'n volk;

dit gaan goed met elkeen wat die wet van die Here onderhou.

₁₉Met woorde alleen laat 'n slaaf hom nie waarsku nie;

hy verstaan wat jy sê, maar hy reageer nie.

₂₀Jy sien self: vir die man wat praat sonder om eers te dink,

is daar minder hoop as vir 'n dwaas.

₂₁As jy 'n slaaf van kleins af bederf,

is hy rebels as hy groot is.

₂₂'n Opvlieënde mens veroorsaak rusie;

iemand wat kort van draad is, doen sonde op sonde.

₂₃Hoogmoed bring 'n mens tot 'n val;

nederigheid bring eer.

₂₄Iemand wat gesteelde goed ontvang, gee nie om vir sy lewe nie;

hy weet die vloek sal hom tref, maar hy wil nie praat nie.

₂₅As jy vir mense bang is, kan jy in 'n strik beland,

maar as jy jou vertroue in die Here stel, is jy veilig.

₂₆Almal soek die guns van die regeerder,

maar dit is die Here wat aan 'n mens reg laat geskied.

₂₇Mense wat die wil van die Here doen, het 'n afsku in iemand wat onwys optree;

'n goddelose mens het 'n afsku in dié wat reg lewe.

Die man het vir Itiël gesê, vir Itiël en vir Ukal:

₂Ek is meer dier as mens,

ek het nie die verstand van 'n mens nie.

₃Ek het nie wysheid geleer nie,

ek ken nie die heilige God nie.

₄Wie het na die hemel toe opgegaan en weer afgekom?

Wie het die wind in sy twee hande gevat?

Wie het die water in 'n doek toegedraai?

Wie het die grense van die aarde vasgestel?

Wat is sy naam en wat is sy seun se naam, as jy dit weet?

₅Elke belofte van God is betroubaar;

Hy beskerm dié wat by Hom skuil.

₆Moet niks byvoeg by wat Hy gesê het nie;

Hy sal jou bestraf, en jy sal daar staan as 'n leuenaar.

₇Net twee dinge vra ek van U;

moet my dit tog nie weier nie; daarna kan ek sterf:

₈moenie toelaat dat ek vals is en lieg nie;

moet my nie arm maak of ryk nie,

gee my net die kos wat ek nodig het,

₉sodat ek nie te veel het en U verloën

en sê: “Wie is die Here?” nie,

en sodat ek nie arm word en steel

en my God se Naam oneer aandoen nie.

₁₀Moenie 'n slaaf by sy eienaar beskinder nie;

dalk vervloek die slaaf jou en moet jy die gevolge dra.

₁₁Daar is 'n soort mens wat sy vader vervloek

en vir sy moeder nie 'n goeie woord het nie,

₁₂'n soort mens wat homself as rein beskou,

maar van wie die vuilheid nie afgewas is nie,

₁₃'n soort mens wat vol hoogmoed,

vol eiewaan is,

₁₄'n soort mens wat koelbloedig en wreed is in sy hebsug

en wat teer op die hulpeloses en armes in die land.

₁₅Die bloedsuier het twee dogters, hulle is “Gee!” en “Gee!”

Daar is drie, nee, vier wat nooit genoeg kry nie,

wat nooit sê: “Genoeg!” nie:

₁₆die doderyk,

die onvervulde begeerte om moeder te word,

grond wat nie deurnat is nie

en 'n vuur wat nooit sê “Genoeg!” nie.

₁₇Die oë van 'n man wat met sy vader spot

en vir wie dit benede hom is om sy moeder te gehoorsaam,

sal uitgepik word deur die kraaie,

opgevreet word deur die roofvoëls.

₁₈Daar is drie dinge, nee, vier wat bo my begrip is,

wat ek nie verstaan nie:

₁₉hoe 'n aasvoël in die lug bly,

hoe 'n slang teen 'n rots op seil,

hoe 'n skip op die diepsee vaar

en hoe die liefde tussen 'n man en 'n meisie werk.

₂₀Die ontroue vrou het haar eie manier:

sy eet en vee haar mond af en sê:

“Ek het niks verkeerds gedoen nie.”

₂₁Daar is drie, nee, vier wat die lewe ondraaglik maak,

wat onuitstaanbaar is:

₂₂'n slaaf nadat hy koning geword het,

'n ongemanierde sot nadat hy hom vol geëet het,

₂₃'n vrou wat eers nie 'n man kon kry nie en toe tóg getroud is,

en 'n slavin nadat sy haar eienares se plek ingeneem het.

₂₄Daar is vier goed in die wêreld wat klein is

maar buitengewone wysheid het:

₂₅miere is nie sterk nie

en tog sit hulle in die somer vir hulle kos weg;

₂₆dassies het nie veel krag nie

en tog maak hulle hulle tuis teen die kranse;

₂₇sprinkane het nie 'n koning nie

en tog trek die hele swerm in formasie;

₂₈'n geitjie kan jy met die hand vang

en tog kry jy hom in koninklike paleise.

₂₉Daar is drie, nee, vier wat statig stap,

wat 'n statige houding het:

₃₀'n leeu, die magtigste van al die diere,

wat vir niks stuit nie;

₃₁'n spoghaan;

'n bokram;

en 'n koning met sy leër by hom.

₃₂As jy verwaand opgetree en jou aangestel het,

of as jy slegte bedoelings het, hou op daarmee.

₃₃As jy melk karring, kom daar botter;

as jy iemand op die neus slaan, kom daar bloed uit;

as jy mense kwaad maak, kom daar rusie.

Sy moeder het vir hom dié voorskrif gegee:

₂My seun, my kind wat ek in die wêreld gebring het,

oor wie ek 'n gelofte gedoen het,

₃moenie jou krag op vrouens vermors nie,

moenie jou lewe verspil met hulle nie;

hulle bring konings tot 'n val.

₄Dit pas konings nie om te drink nie, Lemuel,

dit pas hulle nie,

dit pas mense met gesag nie om hulle aan drank oor te gee nie.

₅As hulle drink, vergeet hulle wat die wet bepaal

en laat hulle nie reg geskied aan al die minderbevoorregtes nie.

₆Gee drank aan dié wat besig is om onder te gaan,

laat dié wat swaar ly, drink;

₇as so 'n mens drink, vergeet hy van sy armoede

en dink hy nie meer aan sy moeilikheid nie.

₈Praat jý vir dié wat self nie hulle sê mag sê nie,

kom op vir die reg van dié wat te gronde gaan;

₉praat, en lewer regverdige uitsprake,

laat reg geskied aan die armes en ellendiges.

₁₀'n Knap vrou is baie werd,

baie meer as edelstene.

₁₁Haar man steun op haar

en pluk die vrugte van haar werk.

₁₂Sy bring vir hom net voordeel, nie nadeel nie,

haar hele lewe lank.

₁₃Sy maak wol en vlas bymekaar

en geniet dit om dit te verwerk.

₁₄Sy is soos die handelskepe,

sy bring die kos van ver af in.

₁₅Sy staan op as dit nog nag is

en maak kos vir haar huisgesin;

ook haar slavinne kry hulle deel.

₁₆Sy oorweeg die waarde van 'n stuk grond en koop dit,

sy sit dit onder wingerd met geld wat sy self verdien het.

₁₇Sy pak die werk aan met krag,

haar hande staan vir niks verkeerd nie.

₁₈Sy stel vas of die wins goed is,

haar lamp bly heelnag brand.

₁₉Sy werk met die spinwiel,

haar hande bly besig met die weefstoel.

₂₀Sy het 'n oop hand vir die armes,

sy is vrygewig teenoor die behoeftiges.

₂₁Sy is gerus oor haar huisgesin as dit sneeu:

hulle dra almal warm klere.

₂₂Sy maak self vir haar dekens

en sy dra klere van linne en wol.

₂₃Haar man is welbekend by die stadspoort

waar hy saam met die leiers beraadslaag.

₂₄Sy maak klere en verkoop dit,

sy lewer gordels aan die handelaars.

₂₅Alles aan haar spreek van 'n sterk en edel persoonlikheid;

sy ken geen kommer oor die toekoms nie.

₂₆As sy praat, is dit met wysheid;

as sy leiding gee, is dit met liefde.

₂₇Sy hou goeie toesig oor haar huishouding;

lui is sy nie.

₂₈Haar kinders prys haar,

haar man bewonder haar:

₂₉“Daar is baie knap vrouens,

maar jy oortref hulle almal!”

₃₀Uiterlike skoonheid hou nie,

'n mooi voorkoms is nie alles nie;

as sy die Here dien,

dán verdien 'n vrou om geprys te word.

₃₁Gee haar wat haar toekom vir alles wat sy doen;

laat haar werk haar roem wees in die stadspoorte.