Bybelleesrooster – Dag 109

₃Wees my genadig, o God, in u troue liefde,

wis my oortredings uit in u groot barmhartigheid!

₄Was my skoon van my skuld,

reinig my van my sonde!

₅Ja, my oortredings ken ek

en van my sonde bly ek altyd bewus.

₆Teen U alleen het ek gesondig,

ek het gedoen wat verkeerd is in u oë.

U uitspraak is dus reg

en u oordeel regverdig.

₇Ek was al skuldig toe ek gebore is,

met sonde belaai toe my moeder swanger geword het.

₈Maar U verwag opregtheid diep in 'n mens se hart:

laat ek dan diep in my binneste weet

hoe U wil dat ek moet lewe.

₉Neem tog my sonde weg dat ek rein kan wees,

was my dat ek witter as sneeu kan wees.

₁₀Laat my weer blydskap en vreugde belewe.

U het my verbrysel; laat my weer jubel.

₁₁Moet tog nie ag slaan op my sondes nie,

wis al my skuld uit!

₁₂Skep vir my 'n rein hart, o God,

vernuwe my gees en maak my standvastig.

₁₃Moet my tog nie van U af wegdryf

en u Heilige Gees van my af wegneem nie!

₁₄Laat my weer die blydskap ervaar

van iemand wat deur U verlos is,

laat my U weer met toewyding dien.

₁₅Dan sal ek oortreders leer wat U van 'n mens verwag;

dat die sondaars hulle tot U sal bekeer.

₁₆Red my van ondergang, o God, my Redder,

dat ek kan jubel oor u verlossingsdaad.

₁₇Here, gee my die woorde

om u lof te verkondig.

₁₈'n Offer vra U nie,

anders sou ek dit bring;

'n brandoffer wil U nie hê nie.

₁₉Die offer wat U wil hê, o God, is verootmoediging:

U sal 'n hart vol ootmoed en berou nie gering ag nie, o God.

₂₀Laat Sion u liefde en u goedheid ondervind:

herbou tog die mure van Jerusalem.

₂₁Dan sal die offers wat voorgeskryf is,

weer vir U aanneemlik wees:

offerdiere wat heeltemal verbrand word.

Dan sal hulle weer bulle op u altare offer.

₃Jy wat jou groot hou,

jy spog verniet oor jou slegte dade!

Onthou, God sorg altyd vir my.

₄Jy wil ander se ondergang bewerk,

met jou vlymskerp tong pleeg jy bedrog.

₅Jy het die kwaad liewer as die goeie,

en die leuen liewer as die waarheid. Sela

₆Jy saai graag verwarring met jou leuens!

₇Maar God sal jou vir altyd vernietig.

Hy sal jou uitruk en wegsleep uit jou woonplek,

Hy sal jou wegruk uit die land van die lewendes. Sela

₈As die regverdiges dit sien,

sal hulle met ontsag vervul word

en smalend van jou sê:

₉“Dis nou die man

wat nie op God se krag wou steun nie,

maar op sy eie rykdom vertrou het

en hom sterk wou maak deur inhaligheid.”

₁₀Maar ek staan sterk soos 'n welige olyfboom;

ek is in die huis van God

en ek steun altyd daarop dat Hy vir my sorg.

₁₁Ek sal U altyd loof vir wat U gedoen het.

Voor u dienaars sal ek u Naam prys,

want U is goed.

₂Die dwaas dink daar is geen God nie.

Dwase mense vernietig alles;

wat hulle doen, is 'n gruwel vir God.

Daar is nie een wat goed doen nie.

₃Van die hemel af kyk God die mense deur

om te sien of daar één verstandige is,

één wat na die wil van God vra.

₄Almal het afgedwaal,

die laaste een het ontaard,

daar is niemand wat goed doen nie,

selfs nie één nie.

₅Julle wat onreg pleeg,

wat my volk opeet asof julle brood eet,

en wat weier om God te dien –

weet julle dan nie

₆dat daar iets vreesliks met julle gaan gebeur,

so vreeslik soos nooit tevore nie?

God sal die bene van dié wat teen sy volk wil veg,

op die slagveld verstrooi.

Sy volk sal hulle op die vlug laat slaan,

want God het hulle verwerp.

₇Ag, mag daar tog uit Sion vir Israel redding kom!

Wanneer God die lot van sy volk verander,

sal Jakob juig, sal Israel bly wees.

₃Red my deur u mag, o God,

laat aan my reg geskied deur u krag.

₄Hoor my gebed, o God,

luister na my woorde,

₅want vyande staan teen my op,

geweldenaars soek my lewe,

hulle hou geen rekening met God nie. Sela

₆Maar vir my help God altyd,

die Here hou my lewe in stand.

₇Laat die onheil wat my teëstanders beplan, op hulleself neerkom.

U is getrou: vernietig hulle.

₈Dan sal ek offers aan U bring, selfs meer as wat U vra,

ek sal u Naam loof, Here, want U is goed,

₉U het my uit elke benoudheid gered

en my oor my vyande laat triomfeer.

₂Hoor my gebed, o God,

moet tog nie onverskillig staan teenoor my smeking nie.

₃Luister na my gebed en antwoord my:

my sorge gee my geen rus nie.

Ek is hewig ontsteld ₄oor die dreigemente van my vyande

en oor die druk van slegte mense op my.

Hulle wil my met onreg breek;

verwoed stook hulle vyandskap teen my.

₅My hart krimp inmekaar in my,

doodsangs oorval my,

₆vrees en skrik oorweldig my,

my hele liggaam bewe.

₇Ek het gedink: ag, as ek maar vlerke

soos 'n duif gehad het,

sou ek wegvlieg en 'n woonplek soek;

₈ek sou ver wegvlieg

en in die woestyn gaan bly; Sela

₉ek sou haastig probeer wegkom

van hierdie onstuimige wind, van hierdie storm af.

₁₀Dryf hulle uitmekaar, Here,

maak hulle taal onverstaanbaar vir mekaar.

Ek sien geweld en oproer in die stad;

₁₁dag en nag maal hulle rond op sy mure;

daarbinne is onreg en onheil.

₁₂Daar heers wanorde in die stad,

op sy pleine is daar net verdrukking en bedrog.

₁₃As dit nog my vyand was wat my smaad aangedoen het,

sou ek dit kon verdra;

as dit 'n teëstander was wat my wou verneder,

sou ek hom kon probeer vermy.

₁₄Maar nou is dit jy, 'n man soos ek,

my maat en my goeie vriend.

₁₅Ons was so nou aan mekaar verbonde;

opgewonde het ons saam na die huis van God toe gegaan.

₁₆Mag die dood my vyande oorval!

Mag hulle onverwags neerdaal na die doderyk,

want in hulle huise en harte heers daar boosheid.

₁₇Maar ek roep na God,

na die Here wat my sal red.

₁₈In die aand, in die môre en in die middag,

heeldag kla en sug ek,

en Hy hoor my roep.

₁₉Hy sal my lewe red en my die oorwinning gee,

al is daar so baie teen wie ek moet veg.

₂₀God, wat van ewigheid af regeer,

sal hoor en hulle verneder

omdat hulle hulle nie bekeer nie

en Hom nie dien nie.

₂₁My vyand het skaars 'n ooreenkoms gesluit

of hy verbreek sy beloftes van trou.

₂₂Sy tong is gladder as botter,

maar daar is oorlog in sy hart;

sy woorde is so strelend soos olie,

maar hulle is swaarde wat reg is om te steek.

₂₃Laat jou sorge aan die Here oor,

Hy sal vir jou sorg.

Hy sal die regverdige nie in die steek laat nie.

₂₄Maar daardie mense, o God, U sal hulle in die graf in laat neerdaal.

Sulke moordenaars en bedrieërs

sal in die fleur van hulle lewe sterf.

Maar ek, op U vertrou ek.

₂Wees my genadig, o God, want daar is mense wat my jaag,

vyande wat my vervolg van die môre tot die aand.

₃Vroeg en laat jaag my teëstanders my,

en ek het baie vyande, o Allerhoogste.

₄Die dag as ek bang word,

vertrou ek net op U.

₅In God, wie se woord ek prys,

in God stel ek my vertroue, ek is nie bang nie.

Wat kan 'n blote mens aan my doen?

₆Hulle vergal my lewe gedurig met beskuldigings teen my,

al hulle bose planne is teen my gerig.

₇Hulle lê op die loer en hou my dop,

hulle bly op my hakke,

so gretig wag hulle op my dood.

₈Moenie dat hulle ongestraf bly vir hierdie vyandigheid nie!

Laat u toorn hulle vernietig, o God!

₉My ellende het nie ongemerk by U verbygegaan nie,

U het op my trane gelet.

In u boek staan hulle opgeteken.

₁₀Die dag wanneer ek na U roep om hulp,

val my vyande terug.

Dít weet ek: God is aan my kant.

₁₁In God, wie se woord ek prys,

in die Here, wie se woord ek prys,

₁₂in God stel ek my vertroue, ek is nie bang nie.

Wat kan 'n mens aan my doen?

₁₃Ek moet my geloftes aan U nakom, o God,

ek wil U met dankoffers betaal,

₁₄want U het my van die dood gered,

my voet nie laat struikel nie,

en met God by my kon ek my pad aanhou loop

en die lewenslig bly sien.

₂Wees my genadig, o God! Wees my genadig,

want by U soek ek skuiling.

Onder u vleuels sal ek skuil

tot die bedreiging verby is.

₃Ek roep na God, die Allerhoogste,

na God wat my sal help.

₄Hy sal uit die hemel antwoord en my red,

Hy sal dié wat my jaag, die stryd laat verloor. Sela

God sal antwoord in sy liefde en trou.

₅Ek is hier tussen leeus,

tussen mense wat my wil verskeur.

Hulle tande is spiese en pyle,

hulle tonge is skerp swaarde.

₆Toon u grootheid, o God, hoog bo die hemel,

u mag hoog bo die aarde.

₇Hulle het 'n strik vir my voete gespan,

hulle wou my breek,

hulle het 'n gat vir my gegrawe,

maar self daarin geval. Sela

₈Ek voel weer veilig, o God!

Ek voel weer veilig!

Ek wil 'n lied sing, ja, ek wil sing.

₉Ek wil vroeg opstaan,

met harp en lier wil ek die rooidag wakker maak!

₁₀Onder die volke wil ek U loof, Here,

onder die nasies u lof besing,

₁₁want u liefde reik tot in die hemel,

u trou tot in die wolke!

₁₂Toon u grootheid, o God, hoog bo die hemel,

hoog bo die aarde u mag.