Bybelleesrooster – Dag 108

₂Mooi woorde roer in my hart;

ek dra my gedig voor aan die koning;

my tong is soos die pen van 'n vaardige skrywer.

₃U is mooier as alle mense;

oor u lippe vloei net vriendelike woorde,

want u hele lewe lank seën God u.

₄Kom, held, maak u reg vir die stryd,

kom in u koninklike luister.

₅Mag u oorwin!

Knoop die stryd aan vir die waarheid

en vir die reg van die hulpelose!

U is geroepe tot magtige dade.

₆U skerp pyle laat volke voor u voete val;

hulle deurboor die hart van die koning se vyande.

₇U troon, verhewe wese, staan vir altyd vas,

met u koninklike septer laat u geregtigheid geskied.

₈U het die reg lief en u haat die onreg,

want, verhewe wese, onder groot vreugde het u God u bo u tydgenote tot koning gesalf.

₉Die geur van mirre, aalwyn en kaneel deurtrek al u klere;

musiek uit u ivoorversierde paleis maak u bly.

₁₀Voor u staan prinsesse, getooi met u juwele,

en aan u regterhand die koningin, versier met goud van Ofir.

₁₁Luister, dogter, luister goed:

neem afskeid van u volk en u familie,

₁₂want u skoonheid bekoor die koning.

U behoort aan hom, u moet hom eer.

₁₃Dogter van Tirus, die rykes van die volk sal u guns soek met geskenke.

₁₄In louter prag staan die koningin daar

in haar kleed van goudbrokaat;

₁₅in haar veelkleurige rok word sy na die koning toe gelei;

sy en haar gevolg van jong meisies, haar vriendinne, word na u toe gebring.

₁₆Onder uitbundige vreugde word hulle ingelei,

betree hulle die paleis van die koning!

₁₇Mag u seuns hê om u geslag voort te sit

dat u hulle kan aanstel as regeerders in die hele land!

₁₈Mag deur my lied die roem van u naam oor geslagte strek,

sodat volke u vir altyd sal prys.

₂God is vir ons 'n toevlug en 'n beskerming;

Hy was nog altyd bereid om te help in nood.

₃Daarom is ons nie bang nie,

al gee die aarde pad,

al skuif die berge tot in die dieptes van die see,

₄al druis en skuim die waters van die see,

al skud die berge deur sy onstuimigheid. Sela

₅Oor die strome van die rivier is daar blydskap in die Godstad,

in die heilige woning van die Allerhoogste.

₆God is daar; die stad sal nie wankel nie.

God sal hom help nog voor die môre kom.

₇Nasies kan raas en koninkryke wankel,

maar as God sy stem laat hoor,

smelt die aarde weg.

₈Die Here, die Almagtige, is by ons,

die God van Jakob is vir ons 'n beskutting. Sela

₉Kom kyk wat die Here gedoen het,

watter ontsettende dinge Hy op die aarde tot stand bring:

₁₀die oorloë oor die hele aarde laat Hy ophou,

pyle en boë verbreek Hy, spiese slaan Hy stukkend,

oorlogswaens verbrand Hy met vuur.

₁₁Bedaar en erken dat Ek God is,

hoog bo die nasies, hoog bo die aarde.

₁₂Die Here, die Almagtige, is by ons,

die God van Jakob is vir ons 'n beskutting. Sela

₂Al julle volke, klap julle hande;

juig tot eer van God met 'n jubelende stem,

₃want aan die Here, die Allerhoogste, kom eerbied toe;

Hy is die Groot Koning oor die hele aarde:

₄Hy het volke aan ons onderwerp

en nasies aan ons onderhorig gemaak;

₅Hy het ons besitting vir ons uitgekies,

die pragtige land van Jakob, wat Hy liefhet. Sela

₆God gaan op na sy tempel toe onder gejubel,

die Here gaan op terwyl die ramshorings blaas.

₇Prys God, prys Hom met psalms,

prys ons Koning, prys Hom met psalms!

₈God is koning oor die hele aarde;

sing vir Hom 'n lied.

₉God is koning oor die nasies,

God is op sy heilige troon.

₁₀Die leiers uit elke volk sal hulle verenig met die volk van die God van Abraham.

Die heersers van die aarde is onderworpe aan God,

Hy is bo almal verhewe.

₂Die Here is groot!

Aan Hom kom al die lof toe

hier in die stad van ons God,

hier op sy heilige berg,

₃mooi, hoog geleë, en 'n vreugde vir die hele aarde,

Sionsberg teen die noorde,

die stad van die Groot Koning.

₄In hierdie goed versterkte stad

het God Hom as beskermer geopenbaar.

₅Konings het bymekaargekom

en as een mag opgetrek,

₆maar skaars het hulle die stad gesien

of hulle het bang geword

en verskrik op die vlug geslaan.

₇Angs het hulle daar beetgepak,

vrees soos dié van 'n vrou wat 'n kind in die wêreld bring,

₈angs soos toe U met die oostewind

die skepe van Tarsis verpletter het.

₉Soos ons daarvan gehoor het, het ons dit self ervaar

hier in die stad van die Here, die Almagtige,

in die stad van ons God,

die stad wat Hy vir altyd vas laat staan. Sela

₁₀Hier in u tempel oordink ons u trou, o God.

₁₁Net soos u Naam, o God, so strek u lof oor die hele aarde.

U mag het groot redding gebring.

₁₂Sionsberg moet bly wees,

die stede van Juda moet oor u reddingsdade juig!

₁₃Gaan om Sion, trek reg rondom,

tel sy torings,

₁₄bewonder sy mure,

bekyk sy versterkings,

sodat julle dit aan 'n volgende geslag kan vertel!

₁₅Dié God is ons God vir altyd;

Hy sal ons altyd lei.

₂Luister hierna, al julle volke,

gee aandag, julle almal wat die wêreld bewoon,

₃elke mens, sonder uitsondering,

ryk en arm!

₄My mond gaan suiwer wysheid praat;

wat ek gaan sê, sal van insig getuig,

₅want ek hoor 'n woord wat my wysheid gee

en terwyl ek op die lier speel, wil ek 'n geheimenis verklaar.

₆Waarom sou ek my in moeilike tye kwel

as ek bedreig word deur die onreg van bedrieërs,

₇van mense wat net op hulle besittings vertrou

en met hulle groot rykdom spog?

₈Een mens kan tog nie 'n ander loskoop van die dood

en aan God 'n losprys vir hom betaal nie?

₉Die prys vir 'n mens se lewe is te hoog.

Wat hy kan betaal, sal nooit genoeg wees

₁₀dat hy vir altyd sal lewe

en die dood nooit sal smaak nie.

₁₁Elkeen sien dit tog:

wyse mense sterwe net soos dwase en sotte,

en laat hulle besittings aan ander na.

₁₂Die graf is vir altyd hulle tuiste;

van geslag tot geslag is dit hulle woonplek,

al het hulle eenmaal grond op hulle naam gehad.

₁₃Met weelde en al leef die mens nie vir altyd nie;

soos die diere, so kom die mens ook tot 'n einde.

₁₄Dit is die lot ook van mense wat op hulleself vertrou,

die uiteinde van dié wat ingenome is met hulleself. Sela

₁₅Soos skape is hulle bestem om te sterwe;

die dood is hulle wagter.

Sonder meer daal hulle in die graf in;

in die doderyk verdwyn alles waarop hulle vertrou het;

vir hulle bestaan dit nie meer nie.

₁₆Maar vir my sal God loskoop uit die mag van die dood;

ek sal aan Hom behoort. Sela

₁₇Moet jou nie daaroor kwel dat mense ryk word,

dat hulle besittings baie word nie,

₁₈want as hulle sterf, neem hulle niks saam nie;

hulle besittings sal hulle nie volg nie.

₁₉Al verlustig 'n mens hom in 'n voorspoedige lewe,

en al prys die mense hom omdat dit met hom goed gaan,

₂₀soos sy voorvaders sal ook hy moet sterwe

en hy sal die lig nooit weer sien nie.

₂₁Die mens wat met weelde en al 'n dwaas bly,

is soos 'n dier wat vergaan.

Die Here is God, Hy alleen is God.

Hy spreek, Hy roep die hele wêreld op,

van waar die son opkom tot waar hy ondergaan.

₂Uit Sion, stad van volmaakte prag,

verskyn God in glans.

₃Ons God kom, Hy bly nie stil nie.

Voor Hom uit brand 'n vuur,

rondom Hom woed 'n storm.

₄Hy roep die hemel en die aarde op vir die saak teen sy volk:

₅“Maak bymekaar dié wat aan My getrou is

en met 'n offer 'n verbond met My gesluit het.”

₆Die hemel getuig: “God is regverdig, en Hý is die regter.” Sela

₇“Luister, my volk, Ek wil my saak stel,

Ek wil teen jou getuig, Israel.

Ek is God, Ek is jou God!

₈Dit is nie omdat jy nie offer dat Ek rekenskap van jou eis nie;

jou brandoffers is immers gedurig voor My.

₉Ek wil geen jong bul uit jou stal hê

of bokke uit jou krale nie,

₁₀want al die diere in die bos is Myne,

die wild op duisende berge.

₁₁Ek ken al die voëls van die berge;

al wat roer op die veld, is Myne.

₁₂Ek sou jou nie vra as Ek honger sou kry nie,

want die aarde en alles wat daarop is, behoort aan My.

₁₃Eet Ek miskien die vleis van die bulle wat julle offer,

of drink Ek die bloed van bokke?

₁₄Lof is die offer wat jy aan God moet bring.

Betaal jou geloftes aan die Allerhoogste.

₁₅Roep My aan in die dag van benoudheid:

Ek sal jou uithelp en jy sal My eer.”

₁₆Maar vir die goddelose sê God:

“Waarom sê jy my voorskrifte een vir een op

en beroep jy jou op my verbond,

₁₇jy wat 'n afkeer het van wat Ek jou leer

en jou nie steur aan wat Ek sê nie?

₁₈As jy 'n dief raakloop, breek jy saam met hom in,

en as jy die kans kry, pleeg jy egbreuk.

₁₉As jy jou mond oopmaak, praat jy kwaad;

jou tong ryg bedrog aanmekaar.

₂₀Jy sit en praat teen jou broer,

jou eie broer beswadder jy.

₂₁“Moet Ek stilbly as jy sulke dinge doen?

Dan sal jy dink Ek het soos jy geword!

Nee, Ek eis rekenskap van jou, Ek kla jou aan!

₂₂Julle moet luister na hierdie waarskuwing,

julle wat nie met God rekening hou nie,

anders verskeur Ek julle sonder dat iemand kan red.

₂₃“Die mens wat My eer,

is die een wat lof as 'n offer bring.

Hy wat reg lewe,

vir hom sal Ek red.”