Bybelleesrooster – Dag 105

Prys die Here, julle hemelinge!

Prys die Here om sy eer en mag!

₂Prys die Here om die eer van sy Naam!

Buig voor die Here by sy heilige verskyning!

₃Die stem van die Here weerklink oor die waters.

Dit is die magtige God wat die weer laat dreun;

die Here self is op die groot waters!

₄Die stem van die Here is magtig,

die stem van die Here is vol majesteit.

₅Die stem van die Here kloof die seders van die Libanon oop.

₆Hy laat die Libanon bokspring soos 'n kalf en die Sirjon soos 'n jong bees.

₇Die stem van die Here laat weerlig uitslaan.

₈Die stem van die Here laat die woestyn bewe.

Die Here laat die Kadeswoestyn bewe.

₉Die stem van die Here laat die wildsbokke ruk van skrik;

dit stroop die bosse kaal.

In sy paleis roep almal uit: “Hoe geweldig!”

₁₀Die Here heers oor die watermassas,

Hy heers vir altyd as koning.

₁₁Die Here gee krag aan sy volk;

die Here seën sy volk met oorvloed.

₂Ek wil u lof verkondig, Here, want U het my gered

en my vyande nie laat bly wees oor my nie.

₃Here my God, ek het na U geroep om hulp

en U het my gesond gemaak.

₄Here, U het my gered van die doderyk,

my aan die lewe gehou toe ek al op pad was na die dood toe.

₅Sing tot eer van die Here, julle wat Hom getrou dien,

loof sy heilige Naam!

₆Waarlik, sy toorn duur net 'n oomblik,

maar sy goedheid lewenslank.

Gisteraand was daar nog trane

en vanmôre lag ek al weer.

₇Toe dit goed gegaan het, het ek wel gesê:

“Niks sal my ooit laat wankel nie.”

₈Deur u goedheid het U my op 'n veilige berg laat staan, Here.

Maar toe U U aan my onttrek het,

het ek baie bang geword.

₉Ek het na U geroep, Here.

Ek het U om genade gesmeek:

₁₀“Watter voordeel is daar in my ondergang

as ek die graf moet ingaan?

Kan stof U loof?

Kan dit u trou verkondig?

₁₁Luister, Here, en wees my genadig!

Help my, Here!”

₁₂Ek was in die rou,

maar U het my van vreugde laat dans.

U het my rouklere uitgetrek

en vir my feesklere aangetrek.

₁₃Daarom sal ek sing tot u eer;

ek sal nie stilbly nie.

Here my God, vir altyd sal ek U loof!

₂By U, Here, skuil ek.

Laat my tog nooit teleurgestel staan nie!

Bevry my, want U is getrou.

₃Luister na my, red my tog gou.

Wees vir my 'n rots om na toe te vlug,

'n bergvesting om my te red.

₄Ja, U is my rots en my bergvesting,

ter wille van u Naam sal U my voorgaan en my lei.

₅Bevry my uit die vangnet wat hulle vir my gestel het,

want U is my toevlug.

₆In u hande gee ek my lewe oor,

want, Here, troue God, U het my vrygemaak.

₇Ek haat mense wat waarde heg aan die nikswerd afgode;

my vertroue stel ek in die Here.

₈Ek wil jubel en juig oor u troue liefde:

U was nie onverskillig teenoor my ellende nie;

U het die bedreiging van my lewe raakgesien

₉en my nie aan die mag van die vyand oorgelewer nie;

U het my 'n veilige staanplek gegee.

₁₀Wees my genadig, Here, want ek is in die nood;

van verdriet het my oë swak geword,

ja, alles in my.

₁₁My lewe vergaan van kommer

en my jare van swaarkry;

deur my ellende word my krag geknak

en teer my liggaam uit.

₁₂Ek is die spot van al my teëstanders,

veral van my bure,

'n verskrikking vir al my bekendes.

Dié wat my op straat sien, vlug vir my.

₁₃Ek is vergeet soos iemand wat lankal dood is,

ek het geword soos 'n ding wat lê en vergaan.

₁₄Ek hoor dreigemente van baie;

dit dreig van alle kante af.

Baie span teen my saam

en smee planne om my lewe te neem.

₁₅Maar ek vertrou op U, Here,

ek sê: U is my God.

₁₆My tye is in u hand.

Red my uit die hande van my vyande en vervolgers!

₁₇Verskyn tog tot my redding,

red my deur u onfeilbare liefde.

₁₈Here, laat my nie teleurgestel staan in my verwagting as ek U aanroep nie.

Laat die goddelose teleurgestel staan in hulle verwagting,

laat hulle die stilte van die doderyk ingaan.

₁₉Bring die leuenaars tot swye,

dié wat vol is van hulleself en in hoogmoed en veragting teen die regverdige praat.

₂₀Hoe groot is u goedheid:

dit is altyd daar vir dié wat U dien,

U bewys dit voor die oë van die mense aan dié wat by U skuil.

₂₁Deur u teenwoordigheid beskerm U hulle teen die sameswering van mense.

U steek hulle weg vir dié wat vir hulle beskuldig.

₂₂Aan die Here kom die lof toe,

want Hy het sy trou op wonderbaarlike wyse aan my betoon toe ek beleër was.

₂₃Ek het in my angs gedink:

Dit is klaar met my, selfs U het my verwerp.

Tog, U het geluister na my gesmeek

toe ek na U om hulp geroep het.

₂₄Betuig julle liefde vir Hom,

julle almal wat die guns van die Here geniet.

Die Here beskerm dié wat aan Hom getrou is,

maar dié wat teen Hom opstandig is,

straf Hy swaar.

₂₅Wees dus sterk en hou goeie moed,

julle almal wat julle vertroue in die Here stel.

Dit gaan goed met die mens

wie se oortredings nie gestraf word nie,

wie se sonde vergewe word.

₂Dit gaan goed met die mens

vir wie die Here die oortreding nie toereken nie

en in wie se gees daar geen valsheid is nie.

₃Toe ek oor my sonde geswyg het,

het my liggaam uitgeteer soos ek heeldag om hulp geroep het.

₄U hand het dag en nag swaar op my gedruk,

my krag het opgedroog soos water in somerhitte. Sela

₅Toe het ek my sonde bely,

my oortreding nie weggesteek nie.

Ek het gesê:

“Voor die Here bely ek my opstandigheid;”

en U het my skuld vergewe. Sela

₆Dit is waarom elke gelowige in 'n tyd van nood tot U bid;

selfs vloedwaters sal hom nie skielik oorval nie.

₇U is vir my 'n skuilplek,

U beskerm my teen aanvalle,

U laat my oorwinningsliedere sing. Sela

₈Ek wil jou onderrig

en jou die pad leer wat jy moet volg.

Ek wil jou raad gee en my oog oor jou hou.

₉Moenie onverstandig wees nie, soos 'n perd of 'n muil

wat met 'n stang in die bek beteuel moet word as jy hom wil lei.

₁₀Die goddelose het baie smarte,

maar wie op die Here vertrou,

dié omvou Hy met sy liefde.

₁₁Verbly julle in die Here en juig, regverdiges,

jubel, alle opregtes.

₁Jubel in die Here, regverdiges,

sing 'n loflied, opregtes!

₂Loof die Here met die lier,

speel vir Hom op die harp!

₃Sing vir Hom 'n nuwe lied,

speel met volle oorgawe, jubel dit uit!

₄Wat die Here sê, gebeur,

alles wat Hy doen, staan vas.

₅Hy het geregtigheid en reg lief,

die hele wêreld is vol van die Here se troue liefde.

₆Deur die woord van die Here is die hemele gemaak,

deur sy bevel al die hemelliggame.

₇Hy het die seewater laat saamkom soos in 'n dam,

die groot waters op een plek opgegaar.

₈Die hele aarde moet die Here vrees,

al die bewoners van die wêreld moet vir Hom ontsag hê,

₉want Hy het gepraat en dit was so,

Hy het beveel en dit was daar.

₁₀Die Here verydel die planne van die nasies,

Hy laat hulle besluite op niks uitloop.

₁₁Maar die planne van die Here staan vir altyd vas,

sy besluite van geslag tot geslag.

₁₂Dit gaan goed met die nasie wie se God die Here is,

met die volk wat Hy vir Hom as sy eie gekies het.

₁₃Die Here kyk uit die hemel

en sien al die mense.

₁₄Van die plek waar Hy as koning sit,

sien Hy almal wat onder op die aarde woon.

₁₅Dit is Hy wat hulle verstand gevorm het,

wat al hulle werk deurgrond.

₁₆Dit is nie deur 'n groot leër dat 'n koning wen nie,

en nie deur groot krag dat 'n held behoue uitkom nie.

₁₇Dit is nie waar dat die perd die oorwinning gee

en dat sy groot krag redding bring nie.

₁₈Dit is die Here wat sorg vir dié wat Hom eer,

vir dié wat op sy mag vertrou

₁₉om hulle van die dood te red

en hulle in die lewe te hou in hongersnood.

₂₀Ons vertrou op die Here:

Hy is ons hulp en ons beskermer.

₂₁Ja, in Hom is ons hart bly,

op sy heilige Naam vertrou ons.

₂₂Hou u liefde oor ons, Here,

want ons stel ons vertroue in U.

₂Ek sal die Here altyd weer prys,

sy lof sal altyd op my lippe wees.

₃Ek sal die roem van die Here sing;

dié wat swaar kry, sal dit hoor en daaroor bly wees.

₄Sing saam met my oor die grootheid van die Here

en laat ons saam sy Naam prys.

₅Ek het die Here aangeroep en Hy het my geantwoord,

Hy het my gered uit alle doodsgevare.

₆Dié wat swaar kry, sien op na Hom en straal van blydskap,

hulle word nie teleurgestel in hulle verwagting nie.

₇Ek is een van die ellendiges wat geroep het.

Die Here het gehoor,

uit al my benoudhede het Hy my gered.

₈Die Engel van die Here slaan sy laer op

rondom dié wat die Here dien, en red hulle.

₉Kom ondervind en sien self dat die Here goed is!

Dit gaan goed met die mens wat by Hom skuil.

₁₀Julle wat aan die Here behoort, dien Hom!

Wie Hom dien, het geen gebrek nie.

₁₁Selfs leeus ly gebrek en kry honger,

maar wie die Here se hulp vra,

kom niks kort van al die goeie dinge nie.

₁₂Kom, kinders, luister na my!

Ek wil julle leer hoe om die Here te dien.

₁₃As iemand die lewe liefhet

en 'n lang lewe begeer om die goeie te geniet,

₁₄moet hy sy tong weerhou van kwaadpraat

en sy lippe van leuens.

₁₅Bly weg van die kwaad af en doen wat goed is,

soek vrede en jaag dit na!

₁₆Die Here sorg vir die regverdiges

en luister na hulle hulpgeroep.

₁₇Maar Hy tree op teen dié wat kwaad doen

en vee selfs die herinnering aan hulle van die aarde af.

₁₈As die regverdiges om hulp roep,

hoor die Here hulle

en red Hy hulle uit al hulle benoudhede.

₁₉Die Here is naby die gebrokenes,

Hy help die moedeloses.

₂₀Al word die regverdige ook deur hoeveel rampe getref,

die Here red hom uit almal.

₂₁Die Here sorg vir die hele liggaam van die regverdige:

geen been word gebreek nie.

₂₂Die kwaad wat die goddelose doen,

bewerk sy eie ondergang:

vir sy vyandskap teen die regverdige sal hy boet.

₂₃Die Here maak sy dienaars vry.

Wie by Hom skuil, sal nie as skuldige behandel word nie.