Bybelleesrooster – Dag 104

₂My God, my God, waarom het U my verlaat

en bly U ver as ek om hulp roep?

₃My God, ek roep bedags en U antwoord nie,

ook snags, maar ek kry geen rus nie.

₄U is tog die Heilige

wat woon waar die lofsange van Israel weerklink!

₅Op U het ons voorvaders vertrou.

Hulle het vertrou en U het hulle gered.

₆Hulle het na U om hulp geroep en hulle is bevry;

op U het hulle vertrou en hulle is nie beskaam nie.

₇Maar ek is 'n wurm, nie 'n mens nie.

Ek word deur die mense bespot en deur die volk verag.

₈Almal wat my sien, spot my,

hulle steek vir my tong uit

en knik met voldoening die kop en sê:

₉“Laat dit aan die Here oor!

Laat Hý hom red, laat Hý hom bevry

as Hy dan so baie van hom hou.”

₁₀U het my die eerste lewenslig laat sien,

my veilig laat rus aan die bors van my moeder.

₁₁Van my geboorte af is ek onder u sorg,

van die begin van my lewe af is U my God.

₁₂Moet tog nie so ver van my af weg bly nie,

want die nood is naby

en daar is niemand wat help nie.

₁₃'n Wreedaardige klomp mense het my omsingel,

soos beeste uit Basan staan hulle my toe.

₁₄Soos verskeurende, brullende leeus storm hulle met oop bekke op my af.

₁₅Ek is soos uitgestorte water,

al my bene het uitmekaar geval,

my hart het soos was geword,

dit smelt weg in my.

₁₆Ek is so min werd soos 'n potskerf,

my tong kleef aan my verhemelte,

U laat lê my asof ek dood is.

₁₇Soos honde omsingel hulle my,

die bende misdadigers sak op my toe,

hulle bind my hande en voete vas.

₁₈Al wat been in my is, kan ek tel;

hulle kyk na my met leedvermaak.

₁₉Hulle verdeel my klere onder mekaar

en trek lootjies oor my mantel.

₂₀En U, Here – moet tog nie so ver bly nie,

Bron van my krag, help my tog gou!

₂₁Red my van die swaard,

my kosbare lewe uit die mag van die honde.

₂₂Red my uit die bek van die leeu

en tussen die horings van die wilde beeste uit.

U het my gebed verhoor!

₂₃Ek sal tot eer van u Naam getuig in die gemeente,

U in die volle vergadering prys.

₂₄Julle wat die Here dien, prys Hom!

Vereer Hom, nageslag van Jakob!

Betoon Hom eerbied, nageslag van Israel!

₂₅Die nood van die hulpelose

het Hy nie verontagsaam en gering geskat nie,

Hom daarvan nie teruggetrek nie,

maar die hulpgeroep na Hom het Hy gehoor.

₂₆My loflied in die volle vergadering kom van Hom af,

my geloftes sal ek nakom voor die mense wat Hom dien.

₂₇By dié offermaaltyd sal die armes genoeg hê om te eet,

en sal dié wat na die wil van die Here vra, Hom prys.

Mag hulle lank en gelukkig lewe.

₂₈Mense oor die hele wêreld sal die Here erken

en hulle tot Hom bekeer.

Alle volke sal Hom as koning erken,

₂₉want die koningskap behoort aan die Here;

Hy heers oor die volke.

₃₀Al die rykes van die wêreld sal ook aan dié maaltyd deelneem

en Hom as koning erken,

ja, alle mense, sterflik en verganklik, sal voor Hom kniel.

₃₁Die nageslag sal Hom dien,

en hulle sal van die Here vertel aan die volgende geslag.

₃₂Dié sal dan aan die volk wat nog gebore moet word

van hierdie verlossingsdaad getuig:

die Here het dit gedoen.

Die Here is my herder, ek kom niks kort nie.

₂Hy laat my rus in groen weivelde.

Hy bring my by waters waar daar vrede is.

₃Hy gee my nuwe krag.

Hy lei my op die regte paaie

tot die eer van sy Naam.

₄Selfs al gaan ek deur donker dieptes,

sal ek nie bang wees nie,

want U is by my.

In u hande is ek veilig.

₅U laat my by 'n feesmaal aansit,

terwyl my teëstanders moet toekyk.

U ontvang my soos 'n eregas,

ek word oorlaai met hartlikheid.

₆U goedheid en liefde sal my lewe lank by my bly

en ek sal tuis wees in die huis van die Here

tot in lengte van dae.

Die aarde en alles wat daarop is,

die wêreld en dié wat daar woon,

alles behoort aan die Here,

₂want Hy het die fondamente daarvan in die see gelê

en dit stewig gevestig in die waters.

₃Wie mag die berg van die Here opgaan

en wie mag in sy heiligdom gaan staan?

₄Dié een wie se hande rein en wie se hart suiwer is,

wat alle bedrog vermy en geen vals eed aflê nie.

₅So iemand sal van die Here seën ontvang,

en God, sy redder, sal reg aan hom laat geskied.

₆Die mense wat na sy wil vra en Hom dien,

is die geslag van Jakob. Sela

₇Verbly julle, poorte,

wees bly, eeue-oue deure,

want die magtige Koning wil ingaan!

₈Wie is hierdie magtige Koning?

Die Here, sterk en geweldig,

die Here, oorwinnaar in elke stryd.

₉Verbly julle, poorte,

wees bly, eeue-oue deure,

want die magtige Koning wil ingaan!

₁₀Wie is Hy, hierdie magtige Koning?

Die Here, die Almagtige,

Hy is die magtige Koning. Sela

Tot U, Here, rig ek my,

₂my God, op U vertrou ek.

Laat my vertroue tog nie tevergeefs wees nie,

laat my vyande nie juig oor wat met my gebeur nie.

₃Niemand wat sy verwagting in U stel,

sal beskaam word nie.

Dié wat nie op U vertrou nie,

hulle kom in die skande.

₄Maak my u wil bekend, Here,

leer my u paaie.

₅Laat u waarheid my lei en onderrig my daarin,

want U is God, my redder.

In U stel ek elke dag my verwagting.

₆Dink aan die liefde en trou, Here,

wat U van altyd af betoon het.

₇Moet tog nie dink aan die sondes en oortredinge van my jeug nie.

Dink aan my in u trou, Here, omdat U goed is.

₈Die Here is goed en regverdig:

Hy wys selfs vir sondaars die pad aan,

₉Hy laat aan hulpeloses reg geskied

en Hy leer hulle sy pad.

₁₀Liefde en trou is die paaie wat die Here bewandel

met dié wat sy verbond en verordeninge bewaar.

₁₁Ter wille van u Naam, Here,

vergewe my my sonde,

want dit is groot.

₁₂As iemand die Here dien,

leer Hy hom watter pad hy moet kies,

₁₃sodat hy voorspoed sal geniet

en sy nageslag die land sal bly bewoon.

₁₄Die Here neem dié wat Hom dien, in sy vertroue

en maak sy verbond aan hulle bekend.

₁₅My oë is altyd op die Here gerig,

want dit is Hy wat my voete uit die vangnet sal hou.

₁₆Sien my in genade aan, Here,

want ek is eensaam en verstote.

₁₇Ek verkeer in die allergrootste nood;

bevry my tog uit my ellende.

₁₈Kyk hoe sleg gaan dit met my

en hoe swaar kry ek.

Vergewe tog al my sondes.

₁₉Kyk hoe baie vyande het ek

en hoe fel haat hulle my.

₂₀Beskerm my en red my,

laat my nie beskaamd staan nie,

want by U skuil ek.

₂₁Laat onskuld en opregtheid oor my die wag hou,

want op U vertrou ek.

₂₂O God, red Israel uit al sy nood.

Laat reg aan my geskied, Here,

want ek is onskuldig.

Ek het op die Here vertrou

en nie getwyfel nie.

₂Toets my, Here, keur my,

ondersoek my deur en deur.

₃Ek laat my deur u liefde lei

en ek lewe deur u trou.

₄Ek hou my nie op met bedrieërs nie

en met agterbakse mense gaan ek nie om nie.

₅Ek vermy die geselskap van misdadigers

en hou my nie op met goddeloses nie.

₆As 'n onskuldige, Here, was ek my hande

en draai ek na u altaar toe

₇om my loflied te sing

en van al u wonders te vertel.

₈Here, u woonplek,

die tuiste van u heerlikheid, het ek lief.

₉Moet my tog nie saam met die sondaars,

met die moordenaars laat omkom nie.

₁₀Daar is bedrog in hulle hande,

hulle regterhande is vol omkoopgeld.

₁₁Maar ek is onskuldig.

Red my en wees my genadig;

₁₂dan is my pad vorentoe gelyk

en sal ek die Here prys in die samekoms van die gemeente.

Die Here is my lig en my redder,

vir wie sou ek bang wees?

Die Here is my toevlug,

vir wie sou ek vrees?

₂As misdadigers op my afstorm om my dood te maak,

my teëstanders en my vyande,

dan is dit juis húlle wat struikel en val.

₃Al sou 'n leër teen my stelling inneem,

sal ek nie bang word nie.

Selfs al sou die aanval op my begin,

sal ek nog steeds vertroue hê.

₄Net een ding het ek van die Here gevra

en dit sal ek najaag:

dat ek my hele lewe lank in sy huis mag woon

om sy goedheid te belewe

en daaroor na te dink in sy tempel.

₅Op die dag van gevaar sal die Here my wegsteek in sy huis,

my veilig laat skuil in sy woonplek,

my hoog op 'n rots laat staan;

₆ek sal in sy woonplek onder trompetgeklank my offers bring,

ek sal 'n lied sing,

ek sal sing tot die eer van die Here

terwyl ek neerkyk op die vyande rondom my.

₇Luister tog na my, Here, as ek roep;

wees my genadig en verhoor my gebed.

₈Ek onthou wat U gesê het:

“Julle moet My kom dien!”

Ek is hier om U te dien, Here.

₉Moet U tog nie vir my verberg nie,

moet my tog nie wegstuur terwyl U toornig is nie,

want U was nog altyd my hulp.

Moet my tog nie verstoot en verlaat nie,

want U alleen is die God wat my red.

₁₀Al sou my vader en my moeder my verlaat,

die Here sal my onder sy sorg neem.

₁₁Leer my u wil, Here,

en lei my op 'n gelyk pad

sodat my vyande nie hulle sin kry nie.

₁₂Moet my tog nie oorgee aan die venyn van my teëstanders nie,

want daar staan vals getuies teenoor my

en hulle blaas geweld teen my aan.

₁₃As ek darem nie geglo het dat ek die goedheid van die Here sal sien in die land van die lewendes nie ...!

₁₄Vertrou op die Here!

Wees sterk en hou goeie moed!

Ja, vertrou op die Here!

Ek roep na U, Here, my Rots,

moet tog nie doof wees vir my nie.

As U bly swyg, sal ek wees soos 'n sterwende.

₂Hoor my smeekstem

as ek na U roep om hulp,

as ek my hande in gebed uitsteek na die allerheiligste deel van u tempel.

₃Moet my tog nie uitroei saam met die goddeloses,

die mense wat onreg doen nie.

Hulle praat vriendelik met hulle bure,

maar daar is kwaadwilligheid in hulle harte.

₄Vergeld hulle volgens hulle dade

en volgens hulle skandelike gedrag.

Vergeld hulle volgens die werk van hulle hande

en laat hulle kry wat hulle verdien,

₅want hulle let nie op die dade van die Here

en op die werk van sy hande nie.

Daarom sal Hy hulle afbreek

en nooit weer opbou nie.

₆Aan die Here kom die lof toe,

want Hy het my smeekstem gehoor.

₇Die Here is my sterkte en my beskermer,

op Hom het ek vertrou.

Hy het my gehelp.

Daarom is ek bly en wil ek Hom loof met my lied.

₈Die Here is 'n sterkte vir sy volk,

'n veilige beskutting vir sy gesalfde.

₉Red u volk en seën dié wat aan U behoort;

wees vir hulle 'n herder

en sorg altyd vir hulle.