Bybelleesrooster – Dag 102

₂Met my hele hart wil ek U prys, Here,

wil ek van u magtige reddingsdade vertel.

₃Oor U wil ek my verbly en vrolik wees,

u Naam wil ek besing, o Allerhoogste.

₄Toe U verskyn het, het my vyande gevlug,

hulle het gestruikel en omgekom.

₅Toe U op die troon gaan sit het as betroubare regter,

het U aan my reg laat geskied.

₆U het die nasies met vernietiging gedreig,

die skuldiges laat omkom,

hulle naam vir altyd uitgewis.

₇Dit is klaar met die vyand,

daar bly net puinhope oor.

U het hulle stede verwoes,

niemand dink eers meer aan hulle nie.

₈Die Here is altyd op sy troon;

op sy regterstoel is Hy steeds gereed vir die regspraak.

₉Hy lewer 'n regverdige uitspraak oor alle mense,

Hy vel 'n billike vonnis oor die nasies.

₁₀Vir die mens wat in gevaar verkeer,

is die Here 'n toevlug,

'n skuilplek in tye van nood.

₁₁Daarom vertrou almal wat u Naam bely, op U,

want U, Here,

laat dié wat vra na u wil, nie in die steek nie.

₁₂Sing tot eer van die Here wat op Sion woon,

vertel die volke van sy dade!

₁₃Hy dink aan die onskuldiges

en wreek hulle dood,

Hy verontagsaam nie die geroep

van dié wat in nood verkeer nie.

₁₄Wees my genadig, Here,

aanskou die ellende wat my haters my aangedoen het,

U wat my terugruk uit die poorte van die dood.

₁₅Dan kan ek van al u roemryke dade vertel,

in die poorte van Sion kan ek juig

oor die uitkoms wat U gegee het.

₁₆Die nasies het in die gat geval

wat hulle gegrawe het,

hulle voete is vasgevang in die net

wat hulle gespan het.

₁₇So het die Here Hom bekend gemaak,

Hy het reg laat geskied,

en die skuldige is deur sy eie handewerk gevang. Higgajon Sela

₁₈Die doderyk is die bestemming van die skuldiges,

van al die nasies wat aan God nie dink nie.

₁₉Waarlik, die behoeftiges word nie vir altyd vergeet nie,

nie vir ewig sal die verwagting van dié wat in nood is, vrugteloos wees nie.

₂₀Gryp tog in, Here,

sodat die mens hom nie verhef nie.

Laat die nasies voor U teregstaan.

₂₁Vervul hulle so met vrees, Here,

dat hulle erken dat hulle net mense is. Sela

₁Waarom staan U so ver weg, Here?

Waarom trek U U terug in tye van nood?

₂Die goddeloses is vol van hulleself, hulle vervolg 'n hulpelose man.

Laat hulle gevang word deur die sluwe planne

wat hulle self uitgedink het.

₃Die goddelose verlustig hom nou al

in wat hy hoop om in die hande te kry.

Die een wat hom wil verryk ten koste van 'n ander,

wens homself by voorbaat geluk.

Hy verag die Here.

₄Neus in die lug sê hy:

“God vra tog geen rekenskap nie!”

In al sy planne is daar geen plek vir God nie.

₅Dit gaan mos altyd goed met wat hy aanpak.

U oordele is vir hom te ver weg, buite sy gesigsveld.

Hy snork met veragting oor al sy vyande.

₆Hy dink: ek sal nie wankel nie

en die ongeluk sal my nooit tref nie.

₇Hy lê 'n vloek op almal,

hy onderdruk en bedrieg,

hy bedink onheil en onreg.

₈Hy lê onskuldiges voor agter die heinings

en vermoor hulle in die geheim.

Hy loer rond in die donker.

₉Hy lê op die loer in 'n wegkruipplek soos 'n leeu agter 'n bos,

hy lê op die loer om die hulpelose te vang.

Hy vang hom en trek hom vas in sy net,

₁₀hy slaan hom dat hy inmekaar sak.

So kry hy die arme mens in die hande.

₁₁Hy sê vir homself:

“God steur Hom nie daaraan nie,

Hy kyk weg,

Hy sal dit nooit raaksien nie.”

₁₂Kom tog, Here! Toon u mag, o God!

Moet die hulpeloses tog nie vergeet nie.

₁₃Hoe durf die goddeloses God verag

en reken Hy sal hulle nie uitvind nie?

₁₄En die hele tyd het U dit gesien, die lyding en verdriet.

U let daarop en maak daar 'n einde aan.

Op U verlaat die ongelukkige hom,

ook vir die weeskind is U 'n helper.

₁₅Verbreek tog die magsgreep van die goddelose en van die misdadiger,

straf sy misdade!

Moenie een enkele van sy misdade verskoon nie.

₁₆Die Here bly altyd koning,

die vyande is uit sy land verdryf.

₁₇U het die gesmeek van die hulpeloses gehoor, Here.

U gee hulle nuwe moed.

U verhoor hulle gebed.

₁₈U behartig die regsaak van die weeskind en van die mens in nood,

sodat niemand op aarde langer in vrees hoef te lewe nie.

Ek skuil by die Here.

Hoe durf julle vir my sê:

“Vlug na die berge toe soos 'n voël!

₂Kyk, die goddeloses span hulle boë,

en hulle lê aan met die pyl op die snaar;

hulle staan reg om uit die donker

die opregtes van hart te tref.

₃As die fondamente ondermyn word,

wat kan die regverdige daaraan doen?”

₄Die Here is in sy heilige tempel!

Die Here is op sy troon in die hemel!

Sy oë is oop, sy oë keur die mensekinders.

₅Die Here onderskei tussen regverdige en goddelose.

Wie geweld liefhet, haat Hy.

₆Hy laat vuur en swael reën op die goddeloses,

'n skroeiende wind: dit is die beker wat hulle sal drink.

₇Die Here is regverdig.

Hy het die mense lief wat regverdig en opreg handel,

en Hy sal by hulle wees.

₂Help tog, Here,

want daar is geen vrome meer nie,

daar is geen betroubare mens meer oor nie.

₃Die mense bedrieg mekaar;

hulle mislei mekaar met vleitaal.

₄Die Here sal al die vleitaal uitroei

en die grootpratery van die mense ₅wat sê:

“In ons tong lê ons krag.

Ons lippe help ons.

Ons buig vir niemand nie.”

₆Maar die Here sê:

“Die swakkes word mishandel

en die armes kla.

Daarom gryp Ek nou in

en gee uitkoms aan dié wat daarna smag.”

₇Daar is niks vals in wat die Here sê nie.

Sy woorde is soos silwer

wat oor en oor in 'n oond gesuiwer is.

₈U, Here, hou oor ons wag.

U sal ons vir altyd teen sulke mense beskerm,

₉selfs al pronk goddeloses nog rond

en al heers die gemeenheid nog tussen die mense.

₂Hoe lank gaan U my nog bly vergeet, Here?

Vir altyd?

Hoe lank gaan U nog van my af weg kyk?

₃Hoe lank moet ek nog my eie planne maak

en my dae met kommer deurbring?

Hoe lank sal die vyand my nog oorheers?

₄Luister tog en antwoord my, Here my God!

Gee my tog nuwe lewenskrag.

Ek wil nie sterwe nie,

₅anders sê my vyand hy het my oorwin

en juig my verdrukkers oor my ondergang.

₆Ek hou vas aan u troue liefde,

oor die uitkoms wat U gee, juig my hart.

Ek wil sing tot eer van die Here,

omdat Hy aan my goed gedoen het.

Die dwaas dink daar is geen God nie.

Dwase mense vernietig alles;

wat hulle doen, is 'n gruwel vir die Here.

Daar is nie een wat goed doen nie.

₂Van die hemel af kyk die Here die mense deur

om te sien of daar één verstandige is,

één wat na die wil van God vra.

₃Almal het afgedwaal,

die laaste een het ontaard;

daar is niemand wat goed doen nie,

selfs nie één nie.

₄Julle almal wat onreg pleeg,

wat my volk opeet asof julle brood eet

en wat weier om die Here te dien –

weet julle dan nie

₅dat daar iets vreesliks met julle gaan gebeur nie?

Omdat God aan die kant van die regverdiges is,

₆sal daar niks kom van julle planne teen die hulpelose nie:

die Here bly sy toevlug.

₇Ag, mag daar tog uit Sion vir Israel redding kom!

Wanneer die Here die lot van sy volk verander,

sal Jakob juig, sal Israel bly wees.

Wie het die reg om in u woonplek te kom, Here?

Wie mag op u heilige berg vertoef?

₂Hy wat onberispelik wandel

en doen wat reg is,

wat met sy hele hart die waarheid praat,

₃nie kwaadpraat nie,

sy medemens nie kwaad aandoen nie

en niemand beledig nie;

₄hy wat dié verag wat deur God verwerp is,

maar almal eer wat die Here dien;

wat sy woord hou, selfs tot sy eie skade,

₅sy geld nie op rente uitleen nie

en hom nie laat omkoop om die onskuldige te kort te doen nie.

Wie hom hieraan hou,

sal nooit wankel nie.

Neem my in beskerming, o God;

ek soek skuiling by U.

₂Ek het vir die Here gesê:

“Ek behoort aan U,

daar is vir my niks goeds nie behalwe by U.

₃Die afgode in die land, so aantreklik vir baie –

met hulle wil ek niks te doen hê nie.

₄Mag elkeen wat 'n ander god vereer, baie smart beleef.

Vir afgode sal ek nie bloedoffers uitgiet nie,

hulle name sal ek nie op my lippe neem nie.”

₅Here, U is my lewe, U sorg vir my.

Wat ek ontvang, kom alles van U af.

₆'n Pragtige deel is vir my afgemeet,

ja, wat ek ontvang het, is vir my mooi.

₇Ek sal die Here loof wat my tot die regte insig gebring het;

selfs in die nag bly ek bewus van wat Hy my leer.

₈Ek het die Here altyd by my:

omdat Hy by my is, sal ek nie struikel nie.

₉Daarom is ek bly en juig ek

en voel ek my veilig.

₁₀U gee my nie oor aan die dood nie.

U laat u troue dienaar nie in die graf kom nie.

₁₁U leer my hoe om te lewe.

By U is daar oorvloedige blydskap.

Uit u hand kom net wat mooi is.

Luister tog, Here, na my regverdige saak,

let op my hulpgeroep.

Hoor tog die gebed wat ek in alle opregtheid bid.

₂U sal uitspraak lewer in my guns:

u oë sien immers self wat reg is.

₃As U my sou toets,

my selfs in my slaap sou ondersoek,

my deeglik sou keur,

sou U niks verkeerds vind nie.

₄Oor die doen en late van mense

het ek niks verkeerds gesê nie:

ek het my aan u bevel gehou.

₅Elke stap van my was vas

op die koers wat U aangewys het.

My voete het nie daarvan afgewyk nie.

₆Ek roep U aan, want U sal my antwoord, my God!

Luister tog na my en hoor wat ek sê.

₇Toon u wonderlike trou,

U wat almal help wat vir hulle vyande by U skuil.

₈Beskerm my soos die appel van u oog,

steek my weg in die skaduwee van u vleuels

₉vir die goddeloses wat my wil oorweldig,

die doodsvyande wat my omsingel.

₁₀Sonder enige meegevoel,

met monde wat aanmatigende dinge sê,

omsingel hulle my ₁₁waar ek ook gaan.

Hulle soek my ondergang.

₁₂Hulle is soos leeus, oorgehaal om te verskeur,

soos jong leeus wat iets voorlê.

₁₃Kom tog, Here, staan hulle voor,

dwing hulle op die knieë.

Red my met u swaard uit die mag van die goddeloses,

₁₄met u eie hand, Here, van hierdie mense.

Laat hulle ontydig omkom, sny hulle lewens af;

laat hulle hulle vol eet aan die onheil

wat U vir hulle gereed hou;

laat daar oorgenoeg wees vir hulle kinders

en laat daar nog oorbly vir die kindskinders.

₁₅Maar wat my betref,

omdat die reg aan my kant is, sal ek weer voor U staan.

As ek wakker word, sal ek my verbly in u teenwoordigheid.