Bybelleesrooster – Dag 101

₁Dit gaan goed met die mens

wat nie die raad van goddeloses volg nie,

nie met sondaars omgaan

en met ligsinniges saamspan nie,

₂maar wat in die woord van die Here sy vreugde vind,

dit dag en nag oordink.

₃Hy is soos 'n boom wat by waterstrome geplant is,

wat op die regte tyd vrugte dra

en waarvan die blare nie verdroog nie.

Hy is voorspoedig in alles wat hy aanpak.

₄So is die goddeloses nie.

Hulle is soos kaf wat deur die wind uitmekaar gewaai word.

₅Daarom sal goddeloses hulle nie kan handhaaf wanneer die Here oor hulle oordeel nie

en sondaars nie 'n plek hê in die vergadering van regverdiges nie.

₆Waarlik,

die Here lei die regverdiges op hulle pad,

maar die pad van die goddeloses lei tot ondergang.

₁Waarom is daar onrus onder die volke,

waarom smee die nasies planne – en dit tevergeefs?

₂Die konings van die aarde is in opstand,

die leiers span saam teen die Here

en teen sy gesalfde en sê:

₃“Kom ons maak ons vry

en gooi hulle juk af!”

₄Hy wat in die hemel woon, lag hulle uit,

die Here spot met hulle.

₅Hy spreek hulle aan in sy toorn,

in sy gramskap jaag Hy hulle op loop:

₆“Dit is Ek wat hom as my koning gesalf het op Sion, my heilige berg.”

₇Ek wil vertel wat die Here aangekondig het.

Hy het vir my gesê:

“Jy is my seun,

van vandag af is Ek jou Vader.

₈Vra My, en Ek gee volke vir jou as eiendom,

die hele aarde as jou besitting.

₉Jy sal hulle verpletter met jou ystersepter,

hulle flenters slaan soos 'n kleipot.”

₁₀Wees dan nou verstandig, konings,

wees gewaarsku, regeerders van die aarde!

₁₁Julle moet die Here met ontsag dien,

Hom met vrees en bewing toejuig

₁₂en Hom onderdanig wees,

sodat Hy nie toornig word

en julle op die pad omkom nie,

want sy toorn ontvlam gou.

Dit gaan goed met almal

wat by Hom skuiling soek.

₂Ek het so baie vyande, Here!

Baie kom in opstand teen my.

₃Daar is talle wat van my sê:

“Van God kom daar vir hom geen hulp nie!” Sela

₄Maar U, Here, beskerm my aan alle kante,

U herstel my eer en aansien.

₅As ek na die Here roep,

antwoord Hy my van sy heilige berg af. Sela

₆As ek gaan lê, slaap ek goed;

ek word ook weer wakker,

want die Here sorg vir my.

₇Ek is nie bang vir tienduisende mense

wat van alle kante af op my toesak nie.

₈Kom tog, Here,

help my, my God!

U het nog altyd my vyande se mag verbreek,

U het die aanval van die goddeloses afgeslaan.

₉Hulp kom net van die Here af.

U laat dit goed gaan met u volk.Sela

₂O God wat aan my reg verskaf,

antwoord my as ek roep.

Toe ek in die nood was,

het U my bevry.

Wees my ook nou genadig

en hoor my gebed!

₃Hoe lank gaan julle my eer nog skend, mense,

gaan julle valsheid liefhê

en voorkeur gee aan leuens? Sela

₄Besef tog dat die Here wonders gedoen het

vir dié wat aan Hom getrou is.

Die Here hoor as ek na Hom roep.

₅As jy ontsteld raak, moenie sondig nie;

dink in stilte daaroor na as jy gaan lê,

en laat dit daarby! Sela

₆Julle moet die offers bring

wat aan julle voorgeskryf is,

en julle moet op die Here vertrou.

₇Daar is baie wat sê:

“Wie sal dit weer met ons goed laat gaan?”

Wees ons tog weer goedgesind, Here, help ons!

₈U het my reeds groter vreugde laat belewe

as wat daar is by mense

wat koring en wyn in oorvloed het.

₉Nou sal ek onbesorg gaan lê

en dadelik aan die slaap raak,

want, Here, U alleen laat my veilig woon.

₂Luister tog na my woorde, Here,

hoor hoe ek sug.

₃Gee tog aandag aan my hulpgeroep, my Koning en my God,

want tot U bid ek.

₄U luister na my stem in die môre, Here,

in die môre terwyl ek voor U verskyn en op U wag.

₅U is nie 'n God wat onreg verdra nie,

die kwaad het by U geen plek nie.

₆Hooghartiges durf nie voor U kom nie.

U haat almal wat onreg doen,

₇U roei alle leuenaars uit.

Die Here verafsku moordenaars en bedrieërs.

₈Maar ek, ek mag deur u groot liefde in u huis ingaan

en in u heilige tempel buig

met die eerbied wat aan U verskuldig is.

₉Omdat ek vyande het, Here,

leer my tog wat reg is

en help my om u wil te doen.

₁₀Niks wat hulle sê, is waar nie;

al waaraan hulle dink, is my ondergang;

hulle vlei my,

maar hulle wil my in die graf laat beland.

₁₁Laat hulle daarvoor boet, o God,

laat hulle deur hulle eie planne tot niet gaan.

Dryf hulle weg oor hulle baie sondes,

want hulle is opstandig teen U.

₁₂Maar laat almal wat by U skuil, bly wees,

laat hulle altyd jubel.

U beskerm dié wat u Naam liefhet,

en hulle juig oor U.

₁₃U laat dit goed gaan met die regverdige, Here,

u goedheid beskerm hom soos 'n skild.

₂Moet my tog nie in u toorn straf nie, Here,

en my in u gramskap tugtig nie.

₃Ontferm U oor my, Here, want ek kwyn weg,

maak my gesond, Here, want my liggaam is uitgeteer.

₄Ek is heeltemal gedaan.

Hoe lank nog, Here, voordat U uitkoms gee?

₅Neem my weer onder u sorg, Here, en red my lewe.

Help my, want U is getrou.

₆Iemand wat dood is, kan tog nie u Naam bely nie.

Kan iemand in die doderyk U prys?

₇Ek is uitgeput van verdriet,

ek huil die hele nag deur,

ek deurweek my bed met trane.

₈My oë het dof geword van verdriet,

verswak deur wat my teëstanders my aandoen.

₉Gee pad van my af, julle almal wat onreg doen,

want die Here het ag geslaan op my geroep om hulp,

₁₀die Here het geluister na my smeking,

die Here het my gebed aangeneem.

₁₁Al my vyande sal beskaamd daarvan afkom,

hulle sal verslae staan;

in 'n oogwink sal hulle beskaamd moet padgee.

₂By U soek ek beskerming, Here my God.

Help my, red my van almal wat my vervolg,

₃sodat hulle my nie verskeur soos 'n leeu sy prooi nie,

my nie uitmekaar skeur sonder hoop op redding nie.

₄As ek iets verkeerds gedoen het, Here my God,

as daar onreg aan my hande kleef,

₅as ek 'n vriend van my kwaad aangedoen het,

as ek 'n teëstander van my sommer goedsmoeds kaalgestroop het,

₆mag die vyand my dan agtervolg en inhaal,

my in die grond in trap,

my tot in die stof in verneder. Sela

₇Kom tog, Here, in u toorn,

tree op teen die verwoede aanslag van my teëstanders.

Kom my te hulp,

U wat bepaal het dat reg sal geskied.

₈Laat al die volke rondom U kom staan;

neem hoog bo hulle u plek in op u regterstoel!

₉U wat regspreek oor die volke, Here,

bevind tog dat ek reg het, Here,

dat ek onskuldig is.

₁₀Maak 'n end aan al die bose dade van die goddelose mense.

Stel tog die onskuldige in die gelyk.

U wat die mens deur en deur toets,

U is die regverdige God.

₁₁God wat die opregtes help,

is my beskermer.

₁₂God is 'n betroubare regter,

'n God wat altyd die skuldiges straf.

₁₃Hy maak sy swaard elke keer weer skerp,

Hy span sy boog en lê aan.

₁₄Hy hou dodelike wapens gereed

en maak vir Hom brandpyle.

₁₅Die skuldige is soos iemand

wat swanger geraak het van onreg,

swanger is van kwaad

en leuens voortbring.

₁₆Hy grawe 'n diep gat

en val self daarin.

₁₇Sy boosheid tref homself,

en die geweld wat hy beplan het,

kom op sy eie kop af.

₁₈Ek wil die Here prys omdat Hy reg laat geskied.

Die Naam van die Here, die Allerhoogste,

wil ek besing.

₂Here, ons Here,

hoe wonderbaar is u Naam oor die hele aarde,

hoe glansryk alles wat U in die hemelruim geplaas het!

₃Kinders en suigelinge besing die magtige werk

wat U tot stand gebring het.

So word u teëstanders,

die vyande en wraakgieriges, tot swye gebring.

₄As ek u hemel aanskou,

die werk van u vingers,

die maan en die sterre waaraan U 'n plek gegee het,

₅wat is die mens dan

dat U aan hom dink,

die mensekind dat U na hom omsien?

₆U het hom net 'n bietjie minder as 'n hemelse wese gemaak

en hom met aansien en eer gekroon,

₇U laat hom heers oor die werk van u hande,

U het alles aan hom onderwerp:

₈skape en beeste, alles;

selfs die diere in die veld,

₉die voëls in die lug,

en die visse in die see

wat die oseane deurkruis.

₁₀Here, ons Here,

hoe wonderbaar is u Naam oor die hele aarde!