Kandelaar

Die kandelaar of menorah was ʼn staander waarop een of meer olielampe geplaas kon word.

Die woord menorah laat mens hedendaags dink aan die sewearmige lampstaander wat ʼn belangrike simbool in Judaïsme is. Maar in die Bybel word die woord nie net gebruik vir die kandelaar in die tabernakel en die tempel nie. In die verhaal van Elisa en die vrou van Sunem in 2 Konings 4:10 staan daar byvoorbeeld: “Kom ons bou ʼn klein bovertrekkie en sit vir hom ʼn bed, ʼn tafel, ʼn stoel en ʼn lamp daarin. Wanneer hy by ons aankom, kan hy daar intrek.” Ons weet ook nie vir seker hoe die kandelaar in die tempel van Salomo gelyk het nie.