Asjera

Asjera is die naam van ʼn Kanaänitiese godin wat in ʼn groot gebied van die Ou Nabye Ooste aanbid is. In die Ou Testament word die Hebreeuse woord Asjera ook dikwels gebruik om te verwys na ʼn houtpaal wat die godin verteenwoordig het.

In die antieke Babiloniese era was Asjera na bewering die vrou van die Amoritiese god Amurru. In Ugarit was sy die vrou van El, die oppergod. Sy was die moeder van 70 gode, wat Baäl ingesluit het.

In Israel is verskeie inskripsies gevind wat melding maak van Asjera. Daardie inskripsies praat van “JHWH en sy Asjera”. Waarskynlik is Asjera soms gesien as die vrou van JHWH en op daardie wyse aanbid. Haar rol sou dan ingesluit het om vir die volk van JHWH in te tree.

Ons weet ook uit die Ou Testament van Asjera. Asjera word as die naam van ʼn godin genoem, maar dikwels verwys die woord Asjera na ʼn houtpaal wat die godin verteenwoordig het. Sulke Asjerapale is vermoedelik ʼn vaste voorwerp by die plaaslike offerplekke in Israel waar die gode aanbid is. Soms is Asjera naas die God van Israel aanbid, en soms naas Baäl. Hierdie godsdienstige praktyke word in die Bybel gekritiseer.

Die tekste in die Ou Testament wat Asjera vermeld, staan baie negatief teenoor die aanbidding van die godin. Deur Asjera te aanbid, het die Israeliete na bewering bygedra tot die ondergang van die noordelike ryk van Israel en die suidelike ryk van Juda (sien bv 2 Konings 17:16).