Dissipel in Johannes

In Johannes is Jesus se dissipels bowenal sy vriende wat in Jesus se verbondenheid met God kon deel (Johannes 13 – 17). Vroue, soos Maria Magdalena in Johannes 20:1-18, deel ook in hierdie vriendskap. In die tradisie word sy daarom ook apostola apostolorum (apostel van die apostels) genoem.

Die vierde Evangelie noem nie ʼn afsonderlike groep apostels onder die dissipels nie. Jesus self is die enigste Apostel, in die letterlike betekenis van die woord “gestuurde”. Hy leef voortdurend met die bewustheid dat Hy aan die Vader verbonde is.