Apokaliptiese literatuur: Mitologie

Die stryd tussen goed en kwaad word in beelde, wat nogal mitologies voorkom, beskryf. Dit is ʼn stryd tussen engele en duiwels, vreemde diere en monsters. Tog word die stryd gedeeltelik op aarde gestry, en die mensdom is daarby betrokke. Hoe nader die einde kom – die omverwerping van die bose wêreldorde deur die goeie – hoe verskrikliker raak die situasie. Allerlei kosmiese kragte word losgelaat: die see, die aarde en die hemele. Alles speel ʼn rol in die dramatiese eindspel van die geskiedenis.

Behalwe vir die mitologiese beelde, word kriptiese beskrywings gebruik om die boosheid van die oomblik aan te dui. Een voorbeeld is “Babilon, die moeder van die sedeloses” in die boek Openbaring. Dit verwys na die stad Rome.